უკვე ცნობილია, რომ საპარლამენტო უმცირესობა ახალი მთავრობის მინისტრთა კაბინეტს მხარს არ დაუჭერს. ზურაბ ჯაფარიძე აცხადებს, რომ დღეს უმცირესობას ბევრი კითხვა ექნება მინისტრთა ახალ კაბინეტთან.
“კითხვების იქნება მრავალფეროვანი და საკმაოდ მწვავე. კითხვები იქნება არა მარტო ეკონომიკასა და ბიუჯეტზე, არამედ ოკუპირებულ ტერიტორიებზეც, ასევე საგარეო პოლიტიკაზეც. ჩვენ მთავრობის ამ შემადგენლობას მხარს არ დავუჭერთ და გულწრფელად არ გვესმის, რატომ არ აქვს ამ შემადგენლობასთსან კითხვები საპარლამენტო უმრავლესობასაც”.
საზოგადოებაში ჩნდება კითხვა, უმცირესობის აზრის გათვალისწინებით და იმ კითხვების მიხედვით, რომელზედაც დღეს პასუხის გაცემა მოუწევთ მინისტრებს, ხომ არ შეიცვლება არსებული სურათი და ხომ არ შეიძლება რაიმე ცვლილებას ჰქონდეს ადგილი.
ამ საკითხთან დაკავშირებით, ექსპერტი ნიკა ჩიტაძე აცხადებს, რომ რაიმე გაუთვალისწინებელ ცვლილებებს არ უნდა ველოდეთ, რადგან გუშინვე მოხდა მინისტრთა კაბინეტის წარდგენა და დღეს ადგილი არ ექნება არც ერთი მინისტრის დამტკიცების ჩავარდნას. ექსპერტის განცხადებით უფრო საინტერესოა როგორ მოახერხებენ მინისტრები უმცირესობის მწვავე კითხვებზე პასუხის გაცემას.
“დღეს არანაირ სიურპრიზებს არ უნდა ველოდეთ. რეალობაა, რომ წარმდენილი მინისტრთა კაბინეტი დამტკიცდება. საინტერესო იქნება, რამდენად შეძლებენ მინისტრები უმცირესობის მწვავე კითხვებზე პასუხის გაცემას. მწვავე კითხვები კი იქნება. საჭიროა ახალმა მთავრობამ შეცვალოს შექმნილი ფონი, უზრუნველყოს პოლიტიკური სტაბილურობა ქვეყანაში, განახორციელოს სისტემური ცვლილებები, რათა ეკონომიკა განვითარდეს. ახალ მთავრობას მეტი პასუხისმგებლობა მართებს, რადგან საზოგადოება უფრო მომთხოვნი იქნება”.
ექსპერტი აცხადებს, რომ კონკრეტული პირის შეცვლა ვერ გამოიწვევს სოციალურ-ეკონომიკურ გარემოში რადიკალურ ცვლილებებს, საჭიროა სისტემის ცვლილება და რადგან დღეს, ხელისუფლება, ქალაქის მერიის გამოკლებით მთლიანად აკონტროლებს ვითარებას ქვეყანაში, საჭიროა მთავრობამ იზრუნოს დემოკრატიული ინსტიტუტების ჩამოყალიბებასა და გამტკიცებაზე. ჩიტაძის განცხადებით, სწორედ ამიტომ არ იქნა შეცვლილი მინისტრთა კაბინეტის შემადგენლობაც, რათა არ დარღვეულიყო ბალანსი და გუნდურობა.
