ანგარიში შეეხებოდა მზრუნველობამოკლებულთათვის უფასო სასადილოში ჩატარებულ შიდა აუდიტის შემოწმების შედეგს. როგორც ანგარიშიდან გაირკვა, აღნიშნულ ა(ა)იპ-ში საკმაოდ ბევრი დარღვევებია აღმოჩენილი:
“შემოწმება ჩატარებულ იქნა მიმდინარე წლის 23 ივლისიდან 8 აგვისტომდე. ა(ა) იპ- ი ფუნქციონირებს 2007 წლის 1 მარტიდან. შემოწმებამ მოიცვა 2007 წლიდან 2013 წლის 1 ივლისამდე პერიოდი. შიდა აუდიტის სამსახურმა მუშაობა 7 აგვისტოს დაასრულა.
შემოწმების ძირითადი მიმართულება იყო ბენეფიციართა რეალური კონტიგენტის დადგენა და მისი აღრიცხვიანობის მდგომარეობა, საბაზო ბენეფიციართა აღრიცხვიანობა, ბენეფიციართა გაზრდის საფუძვლიანობა, გარდაცვალებით გამოკლებული კონტინგენტის ჩანაცვლების აღრიცხვიანობა, საბიუჯეტო თანხის ხარჯვის კანონიერება და ბენეფიციართა კვების მდგომარეობა.”
როგორც კომისიას გოგი ფაცურიამ აუწყა, “2009 წლის 1 ნოემბრამდე უფასო სასადილოში იკვებებოდა 115 კაცი. ნოემბერში საკრებულოს თავმჯდომარეს თხოვნით მიმართა სასადილოს მენეჯერმა დაფინანსების გაზრდის თაობაზე. დაფინანსების გაზრდა მოთხოვნილ იქმნა არაკანონიერი გზით, რადგან დაფინანსებისა და ბენეფიციართა რიცხოვნობის 20 კაცით გაზრდა მოხდა საკრებულოს სოციალურ საკითხთა კომისიის გვერდის ავლით.”
“2010 წელს, კონტიგენტის 110 კაციდან 135 კაცამდე საკრებულოს თავმჯდომარის 2009 წლის 6 ნოემბერს #19 განკარგულებით გაზრდამ გამოიწვია დაფინანსების გაზრდა 74 666 ლარამდე, შესაბამისად, ხელფასის ხარჯი გაიზარდა და გახდა 18 360 ლარი, კვების ხარჯი _ 48 950 ლარი, ერთ კაცზე ხარჯმა დღეში შეადგინა 1.48 ლარი.
2011 და 2012 წლებში კონტიგენტი 135 კაციდან შემცირდა 60 კაცამდე, დაფინანსებამ შეადგინა 57 947 ლარი. საგულისხმოა ის ფაქტი, რომ კონტიგენტის 75 კაცით შემცირების მიუხედავად, ხელფასის ფონდი არ შეცვლილა და დარჩა 18 360 ლარი, ერთი კაცის გამოკვებაზე დაიხარჯა დღეში 2.65 ლარი. 2012 წელს კი ხელფასის ხარჯი გაიზარდა 22 950 ლარამდე, კვების ხარჯი შემცირდა და შეადგინა 33 257 ლარი.
სასადილოში სრულიად მოშლილია კონტიგენტის აღრიცხვიანობა, ყველა წლის სია, რომელიც იქნა მოპოვებული, შედგენილია წლის ბოლოს არსებული მდგომარეობით. განსაკუთრებით ხაზგასასმელია გარდაცვალებით გამოკლებული კონტიგენტის ჩანაცვლების აღრიცხვიანობა. ადგილზე არსებული წიგნის ჩანაწერებით შეუძლებელია დადგინდეს, თუ როდის გარდაიცვალა ესა თუ ის პირი, როდის იქნა ის ამოღებული სიიდან და როდის ჩანაცვლდა ახალი ბენეფიციარით. 2008 წლიდან 2013 წლამდე პერიოდში სულ გარდაიცვალა 32 ბენეფიციარი. 2010 წელს მოქმედ სიაში დაფიქსირდა 2 გარდაცვლილი, კერძოდ, ცუცა ჩხაიძე და მედიკო სარჯველაძე. მაშინ, როცა, წესის თანახმად, უნდა მოხდეს გარდაცვლილის სიიდან დაუყოვნებლივ ამოღება. ზემოთ აღნიშნულ ორ პირზე, პირველ შემთხვევაში, ჩხაიძეზე ფიქსირდება 197 დღის ფაქტიურად გამოწერილი ხარჯი, რაც თანხობრივად შეადგენს 291 ლარს, მეორეს შემთხვევაში _ 66 ლარს.
მოუწესრიგებელია ბენეფიციართა გამოცხადება და მათზე კვების პროდუქტების ხარჯვის აღრიცხვა. მაგალითად, 2013 წლის 13 აგვისტოს კვებაზე არ გამოცხადდა 13 ბენეფიციარი, ხოლო 14 აგვისტოს _ 16 ბენეფიციარი, მაშინ როცა ფაქტიური ხარჯთაღრიცხვით კვების ხარჯი სრულ კონტიგენტზეა ნაჩვენები საბუღალტრო დოკუმენტებში.
2008 წლის შესყიდვების გეგმაში მითითებულია 42 067.6 ლარის ღირებულების კვების პროდუქტების შესყიდვის შესახებ. ამასთან, შესყიდვის საშუალებად მითითებულია ერთ პირთან მოლაპარაკება. მეორე და მესამე კვარტალში შესყიდული კვების პროდუქტების ჯამი შეადგენს 21 765 ლარს. სახელმწიფო შესყიდვების სააგენტომ კი არასწორად ჩათვალა სახელმწიფო შესყიდვების შესახებ კანონის მე-10 მუხლის მესამე პუნქტის თანახმად ერთ პირთან მოლაპარაკებით 21 765 ლარის ხარჯი, რადგან თანხა აღემატება 20 000 ლარს და არ ჩატარდა კვების პროდუქტებით მომარაგებაზე ტენდერი.
შემოწმებით დადგინდა, რომ 2008 და 2009 წლებში, სხვადასხვა სახის სასოფლო-სამეურნეო პროდუქტების შესაძენად, ხელშეკრულებები იქნა გაფორმებული არაიურიდიულ ფიზიკურ პირებთან, საერთო თანხით 19 770. 35 ლარი, რომელზეც მენეჯერის ნაცვლად ხელს აწერს სასადილოს ბუღალტერი გ. რიონიძე. მათ შორის, ლანჩხუთში მცხოვრებ ნათელა წილოსანს მიღებული აქვს 10 422 ლარი. მისი ხელწერა თანხის მიღებაზე არ ფიქსირდება. სალაროს გასვლის ორდერზეც იგივე მდგომარეობაა _ მაგალითად, სასაქონლო ზედნადები #77 წარმოდგენილია 2009 წლის 31 მარტს , თანხა 802 ლარი კი გადარიცხულია 2009 წლის 17 მარტს. 1 იანვრისთვის უფასო სასადილოს პროდუქტის ნაშთი არ ერიცხებოდა, რაც მიუთითებს, რომ უფასო სასადილო ხშირ შემთხვევაში აღურიცხავი პროდუქტებით მარაგდებოდა,” _ ნათქვამია ანგარიშში.
“რამდენიმე რეკომენდაციის შემდეგ, რომელიც პრობლემის აღმოსაფხვრელად დაწერა შიდა აუდიტის სამსახურმა, მიზანშეწონილად მიმაჩნია, რომ უფასო სასადილოს მენეჯერმა გელა რიონიძემ დატოვოს თანამდებობა, ვინაიდან მას ეკისრება პასუხისმგებლობა სასადილოს საქმიანობაში, ასევე, ფულადი სახსრების მიზნობრივად და სწორად ხარჯვაში”, – თქვა ფაცურიამ.
თავად გელა რიონიძეს, რომელიც კომისიის სხდომას ესწრებოდა, მიაჩნია, რომ მან უკვე იზრუნა იმ პრობლემების აღმოფხვრაზე, რაზეც რეკომენდაცია გაუწია შიდა აუდიტის სამსახურმა და ნელ-ნელა ყველა პრობლემა მოგვარდება.
რაც შეეხება შტატების მატებას და სიაში გარდაცვლილების ყოფნასა რიონიძე განმარტავს, რომ “შტატების გაზრდა განპირობებული იყო მუშახელის აუცილებლობით, გარდაცვლილთა სიას კი მათ გამგეობის სოციალური სამსახური აწვდიდა, რომელიც ამოწმებდა ბენეფიციართა მდგომარეობას; რაც შეეხება პროდუქტის შეძენას, მას შემდეგ რაც ტენდერი ჩატარდა, ეს პრობლემაც მოგვარდა.”
პროდუქტების შეძენისას დოკუმენტებზე ხელმოწერის არქონის შესახებ მენეჯერი ამბობს, რომ ხელმოწერა დაფიქსირებულია ყველა აქტზე, რომლითაც ფიქსირდება პროდუქტის მიღება.
საფინანსო, საბიუჯეტო და ეკონომიკურ საკითხთა კომისიის თავმჯდომარე პაატა ფირცხალაიშვილმა საკითხი შემდგომი განხილვისთვის საკრებულოს ბიუროს გადასცა.
