პარლამენტიოს პრესსამსახურის ინფორმაციით, ინფორმაცია აღნიშნულთან დაკავშირებით შრომის, ჯანმრთელობისა და სოციალური დაცვის სამინისტროს სოციალური მომსახურების სააგენტომ წარმოადგინა.
სააგენტოს ხელმძღვანელის, მამუკა მაჭავარიანის ინფორმაციით, რეფორმის ძირითად მიღწევად ბავშვთა სახლების დახურვა და მათ ნაცვლად, მცირე საოჯახო ტიპის სახლების გახსნა მიიჩნევა, რაც მისი შეფასებით, წინ გადადგმული ნაბიჯია. მისივე განცხადებით, სააგენტომ გაეროს ბავშვთა ფონდის და არასამთავრობო ორგანიზაციების ერთობლივი ძალისხმევით დიდი შრომა გასწია, თუმცა რეფორმა კვლავაც საჭიროებს გაგრძელებას და ბოლომდე მიყვანას. მაჭავარიანის მოსაზრებით, აუცილებელია შესაბამის კონვენციასთან საკანონმდებლო აქტების ჰარმონიზაცია და სოციალური აგენტების სათანადო რესურსებით შევსება. რეფორმის წინა პერიოდი მიმოიხილა თავის გამოსვლაში სააგენტოს თანამშრომელმა ეკა სანებლიძემ, რომელმაც კომიტეტის წევრებს და მოწვეულ სტუმრებს რეფორმის მიმდინარეობის პრეზენტაცია წარუდგინა. მისი ინფორმაციით, რეფორმის დაწყებამდე 45 დიდი ზომის სააღმზრდელო დაწესებულებებში 5200 ბავში იყო განთავსებული, რომლებიც ყოველგვარ სათანადო საცხოვრის პირობებს და საზოგადოებაში ინტეგრაციას იყვნენ მოკლებულნი. 2000 წლიდან საპილოტო პროგრამა დაიწყო, რასაც 2004 წელს ბავშვთა კეთილდღეობის რეფორმის დაწყება მოჰყვა. მისივე განცხადებით, რეფორმის ფარგლებში სააგენტოში ტრენინგი და სპეციალური სწავლება გაიარა 239 სოციალურმა მუშაკმა, რომლებიც დღეისათვის ყველა რაიონშია წარმოდგენილი. ასევე ქვეყნის მასშტაბით შეიქმნა 11 მეურვეობა-მზრუნველობის რეგიონალური საბჭო, რომლებიც მონიტორინგს უწევენ მცირე საოჯახო ბავშვთა სახლებს. სანებლიძის განცხადებით, ბოლო პერიოდში საგრძნობლად გაიზარდა მინდობით აღზრდის ანაზრაურება და შემწეობები.
_ დღეის მონაცემებით 44 მცირე საოჯახო ტიპის სახლებში 331 ბავშვია განთავსებული, ხოლო 1000-მდე ბავშვი თავის ბიოლოგიურ ოჯახში დარუნდა. მიმდინარე წელს სახელმწიფო პროგრამების ფარგლებში სულ 8 მლნ. ლარი დაიხარჯება, რაც მნიშვნელოვნად მცირე თანხაა, ვიდრე ეს რეფორმამდე იყო. – აღნიშნა ეკა სანებლიძემ
ბავშვთა ზრუნვის რეფორმასთან დაკავშირებით თავისი მოსაზრებები და რეკომენდაციები საქართველოში გაეროს ბავშვთა ფონდის წარმომადგენელმა, საშა გრაუმანმა წარმოადგინა. საკითხის განხილვაში მონაწილეობა არასამთავრობო ორგანიზაციის წარმომადგენლებმაც მიიღეს. კომიტეტის თავმჯდომარემ, დიმიტრი ხუნდაძემ მიმდინარე რეფორმა წარმატებულად შეაფასა და აღნიშნა, რომ ერთობლივი მუშაობით ბავშვთა კეთილდღეობისთვის ბევრი სასიკეთო ნაბიჯი გადაიდგა.
_ რეფორმის დაწყებამდე მძიმე ვითარება იყო. ბავშვებს გაუსაძლის მდგომარეობაში უწევდათ ცხოვრება და მოკლებულნი იყვნენ ყოველგვარ სოციალურ კონტაქტს. დიდი ზომის ინსტიტუციების მცირე საოჯახო ტიპის სახლებით ჩანაცვლებით გაადვილდა საზოგადოებასთან ინტეგრაცია და ბავშვთა ყოფა-ცხოვრებაც გაცილებით უკეთესი გახდა. მიუხედავად გაწეული საქმიანობისა, რეფორმა დამატებით საჭიროებს დახვეწას და რიგი ღონისძიებების გატარებას, ამიტომ გთავაზობთ შევქმნათ სამუშაო ჯგუფი, რომლის ფარგლებში ერთობლივად ვიმუშავებთ რეფორმის წარმატებულად დასრულებისთვის, – განაცხადა დიმიტრი ხუნდაძემ.
