“შეზღუდული შესაძლებლობების მქონე პირებთან დამოკიდებულებით ჩანს, რა გზას ადგას სახელმწიფო”

როგორც პრემიერმა აღნიშნა, შეზღუდული შესაძლებლობების მქონე პირები საზოგადოების ის ნაწილია, ვის მიმართაც სახელმწიფოს განსაკუთრებული პასუხისმგებლობა აკისრია.

“ხელისუფლება ვალდებულია, თქვენ შეგიქმნათ ღირსეულად ცხოვრების პირობები. არა არსებობის, არამედ – ღირსეულად ცხოვრების! სწორედ შეზღუდული შესაძლებლობების მქონე პირებთან დამოკიდებულებით ჩანს ყველაზე მკაფიოდ, რა გზას ადგას სახელმწიფო. ჩვენი ქვეყანა და ჩვენი მთავრობაც სწორედ მათთან დამოკიდებულებით დაადასტურებს, თუ რა არის მისი არჩევანი. საქართველოს მთავრობამ 2013 წელი გამოაცხადა შეზღუდული შესაძლებლობის მქონე პირთა უფლებების დაცვის წლად”, _ აღნიშნა პრემიერმა.

მისივე თქმით, მთავრობამ აქტიურად ითანამშრომლა პარლამენტთან და საქართველოს პარლამენტი სულ მალე “შეზღუდული შესაძლებლობების მქონე პირთა უფლებების” გაერო-ს კონვენციის რატიფიცირებას მოახდენს.

“იმ პოლიტიკით, რომლის განხორციელებაც ჩვენმა მთავრობამ დაიწყო შეზღუდული შესაძლებლობების მქონე პირთა უფლებების დაცვის მიმართულებით, დარწმუნებული ვარ, რომ აღმოიფხვრება ხარვეზები, რომლებიც ამ სფეროში წლების განმავლობაში არსებობდა. ყველაზე მთავარი, რომელიც საქართველოში გადაუჭრელ პრობლემად იყო ქცეული და ყველაზე მეტად აწუხებთ შეზღუდული შესაძლებლობის მქონე პირებს, ეს საზოგადოებრივი და სახელმწიფო ორგანიზაციების, ქუჩებისა და გადასასვლელების, საზოგადოებრივი ტრანსპორტის მოწყობაა ისე, რომ მათ თავისუფლად შეძლონ გადაადგილება და თავი იგრძნონ საზოგადოების სრულუფლებიან წევრებად. სწორედ ამ პრობლემის აღმოსაფხვრელად საქართველოს მთავრობამ მოამზადა და უახლოეს მომავალში დაამტკიცებს “შეზღუდული შესაძლებლობის მქონე პირებისათვის სივრცის მოწყობისა და არქიტექტურული და გეგმარებითი ელემენტების ტექნიკურ რეგლამენტს“,_  განაცხადა ირაკლი ღარიბაშვილმა.

მისი თქმით, ტექნიკური რეგლამენტის ძირითადი მიზანია თანამედროვე საზოგადოებაში შეზღუდული შესაძლებლობის მქონე პირთა ადაპტაციის, ინდივიდუალური განვითარებისა და მათი საზოგადოებრივ ცხოვრებაში ჩართვის ხელშეწყობა და მშენებლობის პროცესში ხელმისაწვდომი ფიზიკური გარემოს სტანდარტების გათვალისწინება.

“ჩვენი თანამოქალაქეები, რომლებსაც შეზღუდული შესაძლებლობების მქონე პირის სტატუსი აქვთ, საზოგადოების ისეთივე წევრები არიან, როგორიც თითოეული ჩვენგანი. ვერც ერთი სოციალური შეღავათი, ვერც ერთი სახისა და ოდენობის დახმარება ვერ გაუჩენს მათ საზოგადოების სრულუფლებიანი წევრის განცდას, თუკი საზოგადოება ინერტული იქნება მათ მიმართ. მე მჯერა, რომ ჩვენ, ხელისუფლება, სწორედ საზოგადოების მხარდაჭერით მივაღწევთ იმას, რომ შეზღუდული შესაძლებლობების მქონე პირების ცხოვრება თვისებრივად შეიცვალოს და სწორედ ამ სფეროში მიღწეული ცვლილებები გახდეს ჩვენი სახელმწიფოს ჰუმანურობის ერთ-ერთი მთავარი ნიშანი. მე დარწმუნებული ვარ, ჩვენ ამას შევძლებთ და ისე ვიცხოვრებთ, როგორც დემოკრატიულ საზოგადოებას ეკადრება”, _ განაცხადა პრემიერ-მინისტრმა.