“საქართველოსთვის გაცილებით უკეთესი იქნებოდა, თუ მეზობელი ქვეყნებიც სწრაფი ტემპით ივლიან ევროინტეგრაციის გზაზე. თუმცა, გუშინდელი აქცია ერევანში, რომელიც პუტინის ვიზიტის პარალელურად გაიმართა, იმედს მაძლევს, რომ სომეხი ხალხი აუცილებლად იპოვის თავის ადგილს ევროპულ ოჯახში. თუმცა, როგორც ჩანს, ეს პროცესი დროებით შეჩერდა და სხვა მიმართულებით წავიდა. არ ვაპირებ სხვა ქვეყნის პოლიტიკის განხილვას, ეს მათი ხელისუფლების არჩევანია, მაგრამ ვისურვებდი, რომ ევროპული ოხაჯის წევრები ვყოფილიყავით ერთად. საქართველოს გადაწყვეტილებას ვერაფერი შეცვლის და ჩვენ აუცილებლად გავხდებით ევროკავშირის წევრი ქვეყანა. საქართველო სუვერენული ქვეყანაა, რაც ასევე ნიშნავს, რომ ის თავად იღებს გადაწყვეტილებას ბედზე და მომავალზე,” _ აღნიშნა ხიდაშელმა.
მისივე თქმით, ბოლო ერთი წლის განმავლობაში ბევრი განცხადება გაკეთდა ეუთოსთან მიმდინარე მოლაპარაკებების შესახებ, მნიშვნელოვანია ეუთოს სადამკვირვებლო მისიის აღდგენა არა მხოლოდ ოკუპირებულ ტერიტორიებზე, არამედ მთელ საქართველოში.
“ეუთო ბევრი სხვადასხვა მიმართულებით საქმიანობს, მათ შორის საქმიანობდა საქართველოში, ფუნქციონირებდა ადამიანთა უფლებების ოფისი, მათ ჰქონდათ მედიის თავისუფლების საკმაოდ კარგი პროგრამა, ციხეებში მონიტორინგი, რაც უფრო მეტი მსგავსი საქმიანობის და რეპუტაციის ორგანიზაცია შევა ოკუპირებულ რეგიონებში, ეს მხოლოდ სასარგებლოა საქართველოსთვის, მინიმუმ დამოუკიდებელი და მიუკერძოებელი წყაროსგან გვექნება ზუსტი ინფორმაცია. დღეს უკვე მე ვხედავ შანსს, სოჭის ოლიმპიადამდე რუსეთს უნდა გამოჩნდეს კარგ მეზობლად და თუ ამ პერიოდში ეუთოში ეს საკითხი დადგება, ვფიქრობ შესაძლებელია პოზიტიური გადაწყვეტილება მივიღოთ,” _ განაცხადა ხიდაშელმა.
ამასთან, როგორც მან აღნიშნა, საქართველოს მთავრობის სოჭის ოლიმპიადაზე არ გამგზავრება მნიშვნელოვანი ნაბიჯია და ძალიან არასწორი ინტერპრეტაცია მოჰყვა საქართველოს პრემიერ-მინისტრის განცხადებას.
“არასოდეს არ უთქვამს საქართველოს ხელისუფლებას, რომ ის მიდიოდა სოჭში. საქართველოს მონაწილეობა ყოველთვის ნიშნავდა იმას, რომ სოჭის ოლიმპიადაში მონაწილეობდა საქართველოს ოლიმპიური ნაკრები. ვფიქრობ, ძალიან კარგია ამ ნაკრების მონაწილეობა ამ ოლიმპიადაში და ცუდია, რომ ბოიკოტში საკუთარ თავთან რჩები მარტო”.
ხიდაშელმა კომენტარი გააკეთა ვილნიუსის სამიტზე “შალახოს” დაკვრის შესახებ და განაცხადა, რომ ყველაფერს ორგანიზატორები წყვეტენ.
“ეს დაახლოებით ისეთია, თქვენთან სახლში მოვიდე და შეგიკვეთოთ მუსიკა, ყველა ნიუანსს წყვეტს ორგანიზატორი, ბუნებრივია ჩვენთვის რომ ეკითხათ სხვა მუსიკას ავარჩევდით, მაგრამ ასე არ ხდება და სამწუხაროა, რომ ასეთი არასწორი გადაწყვეტილება მიიღეს, მაგრამ ეს მათი გადაწყვეტილებაა, რომელიც პირადად ჩემთვის გაუგებარია. როგორც ჩანს არსებობენ ადამიანები, რომლებისთვისაც საქართველო შალახოსთან ასოცირდება,” _ განაცხადა თინა ხიდაშელმა.
