ასამბლეამ დღეს ორი მნიშვნელოვანი დოკუმენტი მიიღო, ესაა სუამ-ის ასამბლეის შიდა დოკუმენტი – კომუნიკე, რომელიც ასახავს სამომავლო თანამშრომლობის გეგმებს და შეიცავს შეფასებებს ასამბლეის წევრი ქვეყნების ტერიტორიებზე არსებულ კონფლიქტებთან მიმართებაში. დოკუმენტში აღნიშნულია, რომ კონფლიქტები საფრთხეს უქმნის არა მხოლოდ სუამ-ის წევრი სახელმწიფოების, არამედ მთელი ევროპის უსაფრთხოებასა და სტაბილურობას.
კომუნიკეში სუამ-ის საპარლამენტო ასამბლეა კიდევ ერთხელ ადასტურებს ტერიტორიული მთლიანობის, სუვერენიტეტისა და საერთაშორისოდ აღიარებული საზღვრების დაურღვევლობის პრინციპებისადმი ერთგულებას. დაგმობილია ის უკანონო ქმედებები, რასაც ადგილი აქვს საქართველოს ტერიტორიაზე მავთულხლართების გავლების სახით. კომუნიკეში ნათქვამია – “საპარლამენტო ასამბლეა მხარს უჭერს წევრი სახელმწიფოების ძალისხმევას, რომელიც მიმართულია კონფლიქტების მშვიდობიანი დარეგულირებისკენ საერთაშორისო პრინციპებისა და სამართლის ნორმების შესაბამისად. საპარლამენტო ასამბლეა წუხს აგრესიული სეპარატიზმისა და ოკუპაციის ლეგიტიმაციისკენ მიმართული მოქმედებების გამო (ოკუპირებულ ტერიტორიებზე ოფიციალური პირების კანონსაწინააღმდეგო ვიზიტები; სეპარატისტთა ლიდერების სტუმრობა სხვადასხვა ქვეყნის დედაქალაქებში; უკანონო ეკონომიკური საქმიანობა კონფლიქტის რეგიონებში და ოკუპირებულ ტერიტორიაზე; ხელოვნური ბარიერების და მავთულხლართების აღმართვა საქართველოს აფხაზეთისა და ცხინვალის რეგიონების საოკუპაციო ხაზზე) და შესაბამის მხარეებს მოუწოდებს, მიიღონ ზომები საერთაშორისო ნორმებთან და საერთაშორისო სამართლით ნაკისრ ვალდებულებებთან შეუთავსებელი ქმედებების აღსაკვეთად”.
სუამ-ის საპარლამენტო ასამბლეა კონფლიქტის მშვიდობიანი დარეგულირების მიმართულებით წევრი ქვეყნების თანამშრომლობისა და ერთობლივი ძალისხმევის გაძლიერების აუცილებლობაზეც მიუთითებს. გარდა ამისა, საპარლამენტო ასამბლეა ხაზგასმით აღნიშნავს სახელმწიფოების სუვერენულ უფლებას, თავად აირჩიონ საგარეო პოლიტიკური პრიორიტეტები და ყოველგვარ ზეწოლას ამ მიმართულებით მიუღებლად მიიჩნევს.
“საპარლამენტო ასამბლეა ეწინააღმდეგება სუამ-ის წევრ ქვეყნებზე ზეწოლის ნებისმიერ მეთოდს და შესაბამის მხარეებს საერთაშორისო სამართლის პრინციპებისა და ნორმის სრული დაცვისკენ, სუვერენიტეტის პრინციპების პატივისცემისა და შიდა საქმეებში ჩაურევლობისკენ მოუწოდებს. საპარლამენტო ასამბლეა ხაზს უსვამს სუამ-ის წევრ სახელმწიფოებსა და ევროკავშირს შორის თანამშრომლობის მნიშვნელობას ვილნიუსის სამიტის შემდგომ პერიოდში”.
სუამ-ის საპარლამენტო ასამბლეამ დღეს სხდომის მონაწილე ბალტიის ასამბლეისა და პოლონეთის სეიმის მონაწილეობით ერთობლივი განცხადებაც მიიღო. ეს არის საერთაშორისო ფორმატის დოკუმენტი, რომელშიც გაზიარებულია ის პოლიტიკური შეფასებები, რაც კომუნიკეშია ასახული. რადგანაც დოკუმენტი ევროპელი კოლეგების მიერაა მხარდაჭერილი, ის უფრო ფართო მნიშვნელობისაა. დოკუმენტი ასევე ბალტიის ასამბლეასთან თანამშრომლობის გეგმებსაც შეიცავს, რასაც ეს თანამშრომლობა თვისობრივად ახალ ეტაპზე გადაჰყავს. კერძოდ, თანამშრომლობა დაიწყება კონკრეტული კომიტეტებისა და კომისიების დონეზე.
სხდომების დასრულების შემდეგ სუამ-ის საპარლამენტო ასამბლეის თავმჯდომარემ, საქართველოს პარლამენტის თავმჯდომარის მოადგილემ ზურაბ აბაშიძემ და ასამბლეის მომავალმა თავმჯდომარემ, მოლდოვას წარმომადგენელმა, ანატოლიე დიმიტრიუმ პრესკონფერენცია გამართეს.
ზურაბ აბაშიძის განცხადებით, „სუამის წევრი სახელმწიფოების, ასევე ბალტიის ასამბლეის სამივე ქვეყნისა და პოლონეთის წარმომადგენელთა გაერთიანებული განცხადების პათოსია, რომ სუამის წევრი სახელმწიფოები თავად გადაწყვეტენ რა მიმართულებით უნდა წავიდნენ. ჩვენ ამით კიდევ ერთხელ ვადასტურებთ, რომ ის პრობლემები, რომელიც სუამის ქვეყნებს აქვთ, მოგვარდება. დოკუმენტში ჩვენ კიდევ ერთხელ ხაზს ვუსვამთ, რომ უკრაინა, საქართველო და მოლდოვა, ასევე აზერბაიჯანი რჩებიან ერთგულები ევროკავშირის და ეს სახელმწიფოები ამ საქმეს ბოლომდე მიიყვანენ. კომუნიკეში ასევე აღნიშნულია, რომ არცერთ სახელმწიფოს არ აქვს უფლება ჩაერიოს მათ საქმიანობაში და სუამის ასამბლეის სახელმწიფოები თავად გადაწყვეტენ რა მიმართულებით უნდა წავიდნენ“, – განაცხადა ზურაბ აბაშიძემ.
ჟურნალისტთა შეკითხვებს უპასუხეს ასევე მოლდოვას წარმომადგენელმა, ანატოლიე დიმიტრიუმ, სუამ-ის ასამბლეის გენერალურმა მდივანმა, ვალერი ჩეჩელაშვილმა, აზერბაიჯანის მილი მეჯლისის თავმჯდომარის პირველმა მოადგილემ ზაიფატ ასკეროვმა.
