“კარგია, რომ საზოგადოებაში დაიწყო დისკუსია ამ კოდექსის ირგვლივ, ეს ჯანსაღი პროცესია. გუნდის შიგნითაც არის ბევრი კითხვა, ხედვა და მოსაზრება, რაც გასათვალისწინებელია საბოლოო სახით კანონის მიღებისთვის. დისკუსიები კიდევ გრძელდება. მთავრობამ შემოიტანა ეს პროექტი პარლამენტში და დაიწყო დისკუსია. ხუთშაბათამდე პირველი მოსმენის წესით განიხილება ეს საკითხი საკომიტეტო მოსმენებზე და ხუთშაბათს უკვე შჯერდება ეს განხილვები”.
ბესელია აცხადებს, რომ არის ისეთი ნორმები, რომელთა განხორციელებაც მოხდება ეტაპობრივად და ისეთი ნორმები, როგორიცაა თვითმმართველი ქალაქების გაზრდა, საბჭოების შექმნა პილოტურად განხორციელდება.
“დეცენტრალიზაცია კარგია, მერების და გამგებლების პირდაპირი გზით არჩევა საკმაოდ მნიშვნელოვანია თვითმმართველობებისთვის და ამ პუნქტს აუცილებლად მიიღებს პარლამენტი, მაგრამ საერთო ჯამში რეფორმა არ უნდა იყოს სწრაფი. თეორიული საფრთხის მატარებელი ნორმები, როგორც ამას აღნიშნავს საზოგადოების ნაწილი აუცილებლად გადაიხედება, კიდევ ერთხელ განიხილება, დაზუსტდება და როგორც დავით ნარმანია ამბობს პარლამენტს წარედგინება მოდიფიცირებული და შეცვლილი ნორმები. ისეთი ნორმები, როგორიცაა თვითმმართველი ქალაქების გაზრდა, საბჭოების შექმნა პილოტურად განხორციელდება რამდენიმე ადგილას, ვნახავთ როგორ იმუშავებს და ამის მიხედვით ეტაპობრივად მოხდება მისი განხორციელება”.
უმრავლესობის წევრმა აღნიშნა, რომ ნებისმიერ საკითხში გასათვალისწინებელია პატრიარქის მოსაზრება. მისი თქმით ყოველთვის დასაფიქრებეია, როცა პატრიარქი თავის შეხედულებას აკეთებს.
“უწმინდესის პოზიცია ყოველთვის საყურადღებოა. რადგან პატრიარქმა დაინახა ამ განცხადების გაკეთების აუცილებლობა, საჭიროა იმ ხარვეზების გადახედვა, რომელზეც უწმინდესი საუბრობს. ჩვენ არ მივიღებთ ისეთ კანონს, რომელიც არ იქნება ქვეყნისთვის სასიკეთო. მინდა ერთი აღვნიშნო, ვიდრე პატრიარქი ამ განცხადებას გააკეთებდა წირვის დროს, გუნდის შიგნით უკვე დაწყებული იყო მსჯელობა გარკვეული ნორმების შეცვლაზე. მეც მაქვს შეკითხვები და კიდევ ერთხელ გავივლი ამ ყველაფერს კანონპროექტის ავტორებთან და გუნდის წევრებთან”.
ეკა ბესელია შეეხო სამართლიანობის აღდგენის მოთხოვნას და განაცხადა, რომ სასამართლოს კონტროლის ქვეშ უნდა მოექცეს ნებისმიერი ის უწყება, რომელიც დაზარალებულების საქმეებს განიხილავს, მაგრამ მის შემადგენლობაში უნდა იყვნენ სხვა, ახალი მოსამართლეები, რომლებსაც გადასახედი განაჩენების გამოტანაში, თავის დროზე, მონაწილეობა არ მიუღიათ.
“რაც შეეხება ვადებს, ამ ეტაპზე ზუსტი თარიღის დასახელება შეუძლებელია. ჯერ მთავრობა კონსესუსის გზით უნდა შეჯერდეს მოდელზე, თარიღზე საუბარი ნაადრევია. მთავარია, რომ მთავრობა უარს არ ამბობს ხარვეზების დამდგენი კომისიის შექმნაზე. არსებობს უამრავი მსხვერპლი, რომლებსაც უნდათ სამართლიანობის აღდგენა და მათ აქვთ ამის უფლება”.
