ამის შესახებ “გურია ნიუსს” “ადგილობრივი დემოკრატიის ქსელის ცენტრის” ხელმძღვანელმა დავით ლოსაბერიძემ უთხრა და აღნიშნა, რომ კოდექსში არც ძირეული ცვლილებების შეტანა იგეგმება.
“არჩევნების თარიღთან დაკავშირებით პოლიტიკური და იურიდიული სახის კამათი მიმდინარეობდა, თუმცა იურიდიული კამათი პოლიტიკურიდან გამომდინარეობდა, რადგან საკითხი საარჩევნო თარიღს ეხებოდა. ერთის მხრივ, კანონში დაფიქსირებულია არჩევნების თარიღად ოქტომბერი, მაგრამ იქ თვითმმართველობის არჩევნები არ არის მითითებული. მეორეს მხრივ, თვითმმართველობას ვადა მაისში გადის. თუ უკვე მიღებულია გადაწყვეტილება, რომ არჩევნები ივნისში უნდა ჩატარდეს ე.ი. ჩატარდება კიდეც. რაც შეეხება კოდექსის მიღებას, ალბათ, იმედი უნდა გავუცრუო ყველას, ვინც ფიქრობს, რომ კოდექსს პრინციპების დონეზე ვერ მიიღებენ, შეთანხმება ნამდვილად მოხდება. აქ არის საუბარი, რამდენიმე პრინციპზე და არა ძირეულ ცვლილებებზე. თუმცა საშემოდგომო სესიის დასრულებამდე შეთანხმდებიან თუ არა ვერ გეტყვით, ყოველ შემთხვევაში, ვფიქრობ, პარლამენტში კოდექსის პროექტის მესამე მოსმენა საგაზაფხულო სესიის პირველ ნაწილს არ გადაცილდება”, _ ამბობს ლოსაბერიძე.
რაც შეეხება პატრიარქის შენიშვნების შემდეგ კოდექსში შეტანილ ცვლილებებს, ლოსაბერიძე აღნიშნავს, რომ აქ არ იყო ძირეულ ცვლილებებზე საუბარი და აურზაური არაფრის გამო ატყდა.
“როგორც მე ვხვდები, თვითონ საპატრიარქო შეიყვანეს შეცდომაში, რადგან მათ არასწორი ინფორმაცია მიაწოდეს. ვისი ბრალია და რატომ გააკეთეს ეს, ცალკე მსჯელობის საკითხია. თუ ვინმეს ტერმინებზე აქვს გართულება, შეიძლება საპარლამენტო განხილვის პროცესში ესეც დაიხვეწოს. პრინციპულ ცვლილებებზე, ვიმეორებ, საუბარი არ არის. აქ არ არის საუბარი არც რეგიონალური დონის შემოღებაზე, რადგან სურვილის შემთხვევაშიც კი, რეგიონალურ დონეს ვერავინ შემოიღებს, ეს კონსტიტუციას არ აქვს განსაზღვრული და მით უმეტეს, ორგანული კანონიც ვერ განსაზღვრავდა. ამ საკითხს ყური მოება იმ ადამიანებისგან, რომლებსაც უნდათ, რომ ეს რეფორმა შეაჩერონ, თუმცა ხვდებიან, რომ ამას ვერ ახერხებენ. ახლა ცდილობენ პროცესი დააგვიანონ და მერე თქვან, რომ რაღაცეები ვერ ესწრება. იგივე ხალხი ასე მოქმედებდა 1998 წელს, 2001-ში, 2005-ში და დეზინფორმაციის გავრცელების ყველ საშაულებას იყენებდნენ. ასე რომ გასაკვირი აქ არაფერია. რაც შეეხება საზოგადოების შეშფოთებას, თუ ისინი რამეს არასწორად აღიქვამენ და რაიმე გაუგებარია, ბუნებრივია, ეს მათთვის განმარტებული უნდა იყოს და თუ ასეთი შიშების საფუძველი არსებობს, დამატებითი კონსულტაციები და მსჯელობა გამართოს როგორც მთავრობაში ასევე პარლამენტში. თუმცა, ვთვლით, რომ ამ შიშის საფუძველი არ არსებობს”,_ აცხადებს ლოსაბერიძე.
