(გურია ნიუსი, ჩოხატაური) _ საატესტატო გამოცდებში მოსწავლეების მიერ გამოვლენილი ცოდნის დაბალი დონის გამო, გურიაში რამდენიმე საჯარო სკოლის დირექტორი განათლების მინისტრის ბრძანებით გაათავისუფლეს. ჩოხატაურის მუნიციპალიტეტში თანამდებობების დატოვება მოუხდათ ერკეთის საჯარო სკოლის დირექტორს ციალა ჭიხვარიას და გუთურის საჯარო სკოლის დირექტორს მიხეილ შონიას.
ჩოხატაურის საგანმანათლებლო რესურსცენტრის ხელმძღვანელის, ხათუნა წილოსანის თქმით, აღნიშნული სკოლის მოსწავლეებმა ძალიან დაბალი დონე აჩვენეს: _ ვერც ერთმა მათგანმა 8 ქულაზე მეტი ვერ აიღო, _ აღნიშნა წილოსანმა.
ამავე მიზეზით ოზურგეთში სამსახური კიდევ ხუთ დირექტორს დაატოვებინეს: გურიანთა _ იზო შათირიშვილი; კონჭკათი _ რომან სირაძე; ჯუმათი _ ნესტორ მეგრელაძე; კვირიკეთი _ ნანი გრძელიძე; ასკანა _ ნინო მამალაძე.
ლანჩხუთის საგანმანათლებლო რესურსცენტრის ხელმძღვანელის, ნათია ურუშაძის თქმით, ჯერჯერობით არ არის ცნობილი, რამდენი დირექტორი დატოვებს სკოლას ლანჩხუთში: _ ამ ეტაპზე ჩემთვის ცნობილი არ არის გათავისუფლებული დირექტორების ვინაობა. სავარაუდოდ, დღეს ან ხვალ დაზუსტდება, _ აღნიშნა ურუშაძემ.
დაუდასტურებელი ინფორმაციით, სამინისტროს “ოპოზიციურ მიდრეკილებებში შემჩნეული” არასასურველი დირექტორების გათავისუფლება გაცილებით ადრე ჰქონდა დაგეგმილი და საატესტატო გამოცდები შედეგები მხოლოდ საბაბია.
განათლებისა და მეცნიერების მინისტრი დიმიტრი შაშკინი, “გურია ნიუსთან” საუბრისას ამბობს, რომ სკოლებში, სადაც დირექტორები გაათავისუფლეს, ბავშვთა უფლებები იყო დარღვეული:
_ ბატონო დიმიტრი, სკოლის დირექტორების გათავისუფლება იმის გამო, რომ მისი სკოლის მოსწავლეებმა საატესტატო გამოცდებში მაღალი ქულები ვერ მიიღეს გამართლებულად მიგაჩნიათ? არსებობს მოსაზრება, რომ ეს წინასწარ იყო გათვლილი და ამით “არასასურველი” დირექტორები მოიცილეთ…
_ სასწავლო პროცესის გამართულად წარმართვაზე პასუხისმგებელია სკოლის ადმინისტრაცია. ზოგადი განათლების შესახებ საქართველოს კანონის 35-ე მუხლი _ “პასუხისმგებლობა და სტრუქტურა”, განმარტავს: “საჯარო სკოლის მიერ ეროვნული სასწავლო გეგმის, ზოგადი განათლების სფეროში საქართველოს კანონმდებლობისა და საქართველოს განათლებისა და მეცნიერების სამინისტროს ინდივიდუალური ადმინისტრაციულ-სამართლებრივი” აქტების შესრულებაზე, სასწავლო-სააღმზრდელო პროცესსა და ფინანსების მიზნობრივ ხარჯვაზე, თავისი კომპეტენციის ფარგლებში, პასუხისმგებელია დაწესებულების დირექტორი, შესაბამისი სტრუქტურული ერთეული ან/და სტრუქტურული ერთეულის წევრი”. შესაბამისად, ზემოაღნიშნულ სკოლებში კანონის ეს მუხლი დარღვეულია, ასევე დარღვეულია ყველა მოსწავლის უფლება, მიიღოს სრულყოფილი საშუალო განათლება. მე, როგორც მინისტრი, ვალდებული ვარ დავიცვა ყველა ბავშვის უფლება, მიიღონ სრულყოფილი განათლება, _ გვითხრა მინისტრმა.
ამ ეტაპზე უცნობია, გაასაჩივრებენ თუ არა გათავისუფლებული დირექტორები მინისტრის გადაწყვეტილებას და დადგება თუ არა იმ პედაგოგების პასუხისმგებლობის საკითხი, რომლებიც დაბალშედეგიან მოსწავლეებს ასწავლიდნენ. ჩვენი წყაროს ინფორმაციით, “ჯოხი” მხოლოდ დირექტორებზე გადატყდება.
“გურია ნიუსი” ამ თემას ისევ მიუბრუნდება.
