“
საზოგადოებისთვის, ალბათ, საინტერესო უნდა იყოს შპს “საქართველოს გაერთიანებული წყალმომარაგების კომპანიის” ოფიციალური მონაცემები ქ. ოზურგეთში მცხოვრები მომხმარებლების წყალმომარაგების მდგომარეობის შესახებ. მუნიციციპალური ცენტრების სასმელი წყლით უზრუნველყოფის მდგომარეობის შესახებ “საქართველოს გაერთიანებული წყალმომარაგების კომპანიის” მიერ თავის ოფიციალურ ვებგვერდზე გამოქვეყნებული ინფორმაცია იუწყება, რომ ოზურგეთს 2013 წელს (იანვრის მონაცემებით) სასმელი წყალი მიეწოდება: 65%-ს – 24 საათი ყოველდღე, 35%-ს – 8 საათი ყოველდღე (შემოქმედის ამღვრევის შემთხვევაში 8 საათი). ანუ, კომპანიის ოფიციალური მონაცემებით, გამოდის, რომ ოზურგეთელი მომხმარებლების 65% ყოველდღიურად უწყვეტი, 24-საათიანი წყალმომარაგებითაა უზრუნველყოფილი და მხოლოდ 35%-ს შეადგენს იმ აბონენტების რაოდენობა, რომელსაც სასმელი წყალი, მართალია, ყოველდღიურად, მაგრამ მხოლოდ 8 საათის განმავლობაში მიეწოდება. ერთადერთი გამონაკლისი შემთხვევა, როგორც ირკვევა, ეს “შემოქმედის ამღვრევაა” (?!), როდესაც ოზურგეთელ მომხმარებლებს (ასივე პროცენტს) დღის განმავლობაში 8 საათს მიეწოდება სასმელი წყალი. ყოველ შემთხვევაში, წყალმომარაგების კომპანიის ოფიციალურ ვებგვერდზე (ყოველგვარი ქვეტექსტების გარეშე) სწორედ ასეთი ინფორმაციაა განთავსებული,” _ ამბობენ “საქართველოს დემოკრატიული განვითარების კავშირში”.
“ჩვენ დავინტერესდით და გაერთიანებული წყალმომარაგების კომპანიისაგან გამოვითხოვეთ ქ. ოზურგეთში მდებარე იმ ქუჩების სახელობითი ჩამონათვალი, რომლებზე მცხოვრებ აბონენტებსაც კომპანიის მიერ უწყვეტად, 24 საათის განმავლობაში მიეწოდებათ სასმელი წყალი. წყალმომარაგების კომპანიისაგან პასუხად მიღებულ 2013 წლის 20 ნოემბრის #7555/1 წერილში ვკითხულობთ: “უწყვეტად, 24 საათის განმავლობაში შემოქმედის თვითდენითი სათავისა და #2 სატუმბი სადგურის მუშაობის დროს წყალი მიეწოდება ქ. ოზურგეთის კოსტავას, ბათუმის, ლალიონის, ქუთაისის, დუმბაძის, გენიჩესკის, ჯორჯიაშვილის, მგელაძის და ლერმონტოვის ქუჩებს”. ანუ გამოდის, რომ: (1) ზემოაღნიშნულ ქუჩებს უწყვეტად, 24 საათის განმავლობაში სასმელი წყალი მხოლოდ იმ შემთხვევაში მიეწოდებათ, როდესაც შემოქმედის თვითდენითი სათავე და #2 სატუმბი სადგური მუშაობს; (2) აქედან გამომდინარე, შემოქმედის თვითდენითი სათავე და #2 სატუმბი სადგური უწყვეტ, 24-საათიან რეჟიმში არ მუშაობს; (3) შესაბამისად, ვერც ზემოაღნიშნული ქუჩების წყალმომარაგება შეიძლება იყოს უწყვეტი და 24-საათიანი; (4) წყალმომარაგების კომპანიის მიერ თავის ოფიციალურ ვებგვერდზე განთავსებული ინფორმაცია ოზურგეთის სასმელი წყლით უზრუნველყოფის მდგომარეობის შესახებ სიმართლეს არ შეესაბამება. აქვე ხაზი უნდა გაესვას იმ გარემოებასაც, რომ შპს “საქართველოს გაერთიანებული წყალმომარაგების კომპანია” (რომელიც ადგილზე ოზურგეთის, ჩოხატაურისა და ლანჩხუთის გაერთიანებული სერვის-ცენტრითაა წარმოდგენილი) ქ. ოზურგეთში 77 ქუჩაზე მცხოვრებ აბონენტებს ემსახურება; ამათგან, კომპანიის ოფიციალური მონაცემებით, უწყვეტად, 24 საათის განმავლობაში წყალი მხოლოდ ზემოაღნიშნულ 14 ქუჩას (ანუ კომპანიის სერვისით მოსარგებლე ქუჩების საერთო რაოდენობის 18%-ს) მიეწოდება. ამ 14 ქუჩაზე მცხოვრები აბონენტები რამდენად შეადგენენ კომპანიის სერვისით მოსარგებლე აბონენტების საერთო რაოდენობის (კომპანიის ინფორმაციით, ასეთი სულ 4.788 აბონენტია) 65%-ს, ეს კიდევ ცალკე საკითხავია; ისე კი, – ის, თუ რამდენად შეესაბამება სინამდვილეს წყალმომარაგების კომპანიის ოფიციალური მონაცემები ოზურგეთის სასმელი წყლით უზრუნველყოფის მდგომარეობის შესახებ, – ეს ყველაზე უკეთ ქ. ოზურგეთში მცხოვრებ მოსახლეობას მოეხსენება და თუკი ვინმეს, მართლაც, სურს რეალური სურათის ხილვა და სიტუაციაში გარკვევა, პირველ რიგში, სწორედ მასთან (პირველწყაროსთან) უნდა გადაამოწმოს საქმის რეალური მდგომარეობა.
და ბოლოს, კიდევ ერთი მნიშვნელოვანი მომენტი უნდა აღინიშნოს: მიუხედავად იმისა, რომ, თუნდაც იგივე წყალმომარაგების კომპანიის ოფიციალური მონაცემებით, ქ. ოზურგეთში აბონენტების მნიშვნელოვანი ნაწილი (35%) ჯერ კიდევ არ არის უზრუნველყოფილი უწყვეტი, 24-საათიანი წყალმომარაგებით, გაერთიანებული წყალმომარაგების კომპანიას არანაირი წინასწარ დადგენილი გრაფიკი არ გააჩნია ქ. ოზურგეთში მცხოვრები იმ აბონენტებისათვის, რომლებსაც სასმელი წყალი ყოველდღიურად 8 საათის განმავლობაში მიეწოდებათ. თანაც, აქ კიდევ ნიშანდობლივი და საგულისხმოა ის ფაქტიც, რომ, წყალმომარაგების კომპანიის მონაცემებით, უწყვეტი, 24-საათიანი წყალმომარაგებით უზრუნველყოფილი გაუმრიცხველიანებელი მომხმარებელიცაა და ის გაუმრიცხველიანებელი აბონენტიც, რომელსაც, ასევე კომპანიის ოფიციალური მონაცემებით, ყოველდღიურად მხოლოდ 8 საათის განმავლობაში მიეწოდება სასმელი წყალი (ანუ კომპანიისაგან განსხვავებულ სერვისს იღებს), ერთი და იგივე ტარიფით იხდის მოხმარებული წყლის საფასურს. სამართლებრივი თვალსაზრისით, ეს გარემოება, მსუბუქად რომ ვქთვათ, მთლად კორექტულად ვერ გამოიყურება,” _ ნათქვამია “საქართველოს დემოკრატიული განვითარების კავშირის” მიერ გავრცელებულ განცხადებაში.
