საზოგადოებრივი ორგანიზაციების დღე ყოველწლიურად გაიმართება. მისი მიზანია უზრუნველყოს საზოგადოებრივ ორგანიზაციებსა და პარლამენტს შორის დიალოგის გაღრმავება. ამ დღეს საზოგადოებრივ ორგანიზაციებს საშუალება მიეცემათ პარლამენტარებთან ერთად იმსჯელონ ქვეყნის წინაშე მდგარი მნიშვნელოვანი პრობლემების, ამოცანების და საჯარო პოლიტიკის მიმართულებების შესახებ.
დავით უსუფაშვილმა აღნიშნა, რომ პარლამენტი უნდა იყოს სამოქალაქო საზოგადოების მუდმივი მეთვალყურეობის და მუდმივი თანამშრომლობის ობიექტი.
“დღევანდელ ხელმოწერას აქვს ძალიან დიდი მნიშვნელობა – საქართველოს პარლამენტი და სამოქალაქო საზოგადოება ხდებიან პარტნიორები. პარლამენტი ასრულებს საუბარს იმაზე, რომ უნდა იყოს გახსნილი და თანამშრომლობისთვის მოწადინებული. დღეიდან, ჩვენ გადავდივართ ამ საქმის კეთებაზე,” _ განაცხადა პარლამენტის თავმჯდომარემ.
საქართველოს პარლამენტი მემორანდუმით ხაზს უსვამს საზოგადოებრივი ორგანიზაციების როლსა და მნიშვნელობას გაწონასწორებული დემოკრატიული პოლიტიკური სისტემის ჩამოყალიბების, ადამიანის უფლებათა და თავისუფლებათა დაცვის და ქვეყნის სოციალურ-ეკონომიკური განვითარების საქმეში.
ის ცნობს საზოგადოებრივ ორგანიზაციებთან დიალოგის საჭიროებას და უზრუნველყოფს მათ მონაწილეობას საქართველოს კონსტიტუციისა და პარლამენტის რეგლამენტით გათვალისწინებული უფლებამოსილების განხორციელების პროცესში. თავის მხრივ, საზოგადოებრივი ორგანიზაციები პარლამენტთან თანამშრომლობისას მოქმედებენ საუკეთესო შედეგზე ორიენტირებულობისა და კეთილსინდისიერების პრინციპების დაცვით, კონსტრუქციული ოპონირებისა და თანამშრომლობის რეჟიმში.
მემორანდუმი ღია დოკუმენტია და მასთან მიერთება შეუძლია საქართველოში მომუშავე ნებისმიერ საზოგადოებრივ ორგანიზაციას, რომელიც გაიზიარებს მემორანდუმის შინაარსს. საქართველოს პარლამენტსა და საზოგადოებრივ ორგანიზაციებს შორის თანამშრომლობის მემორანდუმზე ხელის მოწერის საზეიმო ცერემონიას ესწრებოდნენ დიპლომატიური კორპუსისა და საერთაშორისო ორგანიზაციების წარმომადგენლები. დოკუმენტზე ხელმოწერის დასრულების შემდეგ, პარლამენტის პლენარულ სხდომათა დარბაზში პარლამენტისა და საზოგადოებრივი ორგანიზაციების წარმომადგენლების სამუშაო შეხვედრა გაიმართა.
შეხვედრის მონაწილეებს სიტყვით პარლამენტის თავმჯდომარემ მიმართა. დავით უსუფაშვილმა პარლამენტსა და საზოგადოებრივ ორგანიზაციებს შორის თანამშრომლობის პერსპექტივებზე, კრიტერიუმებზე, სტანდარტებზე და მნიშვნელობაზე ისაუბრა.
“ჩვენ ერთმანეთის დახმარებით უნდა ვიაროთ წინ, ერთმანეთს უნდა დავეყრდნოთ და გადავდგათ შემდგომი ნაბიჯები. პარლამენტს სჭირდება უზარმაზარი ძალისხმევა იმისთვის, რომ დამკვიდრდეს ისეთ ინსტიტუტად, როგორიც გვინდა რომ ის იყოს. სამოქალაქო სექტორსაც სჭირდება დიდი ძალისხმევა, რომ კვალიფიკაცია, ხარისხი და მოტივაცია იყოს მაღალ დონეზე,” _ აღნიშნა პარლამენტის თავმჯდომარემ.
სამუშაო შეხვედრაზე საზოგადოებრივი ორგანიზაციების წარმომადგენლებმა სხვადასხვა თემებზე ისაუბრეს, კერძოდ: საქართველოში ინფორმაციული თავისუფლების საკანონმდებლო ცვლილებების პროექტზე; ეკომიგრანტების უფლებების და ინტერესების დაცვის საკითხებზე; კულტურული მემკვიდრეობის კანონში დაგეგმილ ცვლილებებზე; ადგილობრივი თვითმმართველობის ახალი კოდექსის პროექტზე; მომხმარებელთა უფლებების დაცვაზე; შეზღუდული შესაძლებლობის მქონე პირთა არჩევნების პროცესში ჩართულობაზე; უმცირესობათა უფლებების დაცვაზე და სხვა.
