მინისტრმა ისაუბრა საკანონმდებლო ცვლილებებზე, ეროვნული სატყეო პოლიტიკის დოკუმენტზე, რომელიც პარლამენტამ ახლახან დაამტკიცა, გარემოსაცვითი ზედამხედველობის ინსპექციის ჩამოყალიბებაზე, ბუნების ძეგლებისთვის სტატუსის მინიჭებაზე, ნარჩენების მართვის კანონპროექტის შემუშავებასა და ყველა იმ სამუშაოს შესახებ, რომლის განხორციელება ერთი წლის მანძილზე გარემოს დაცვის სამინისტრომ მოახერხა.
“სამინისტროს ერთწლიანი მუშაობა შეიძლება შეფასდეს ძალიან დადებითად. ბევრი სამუშაო ჩატარდა ყველა მიმართულებით. სამინისტრომ მოახერხა საკანონმდებლო ცვლილებების შემუშავება და კონკრეტულად რაც ჩვენ გვეხებოდა, მოსახლეობის სათბობი შეშით უზრუნველყოფისთვის მთავრობის დადგენილებაში შევიტანეთ ცვლილება, რომლითაც უფრო გაიოლდა გამოყოფილ ტეკაფებში სოციალური ჭრა”, _ აღნიშნა ეროვნული სატყეო სააგენტოს უფროსმა ბიძინა გიორგობიანმა.
სამინისტროს ერთწლიან მუშაობას ნაყოფიერი უწოდა პარლამენტის გარემოსა და ბუნებრივი რესურსების დაცვის კომიტეტის თავმჯდომარე გიორგი ცაგარეიშვლიმა.
“ჩემი კომიტეტი პარლამენტში გარემოს დაცვის სამინისტროზე ზედამხედველია და ვფიქრობ, წელს ძალიან ნაყოფიერად იმუშავეს. იყო შეცდომები, მაგრამ ისეთი ტრაგიკული არა, რაც წინა წლებში ხდებოდა. მობილიზებული იყო უწყება, რომ დაეცვა გარემო. ძალიან რთული იყო სტრუქტურული ცვლილებები. რთული რეფორმების წელი იყო, თუმცა გამოცდა კარგად ჩააბარა გარემოს დაცვის სამინისტრომ. არის საკითხები, სადაც ჩვენ სამუშაო კიდევ ბევრი გვაქვს. მე არ მეგულება გარემოს დაცვის სამინისტროზე გამჭვირვალე უწყება. კრიტიკასაც მივესალმები, ოღონდ არა ჩასაფრებული პოზიციიდან. არასამთავრობო სექტორის მსგავსი ჩართულობა, მგონი, არცერთ სამინისტროში არ ყოფილა. 20-მდე საჯარო განხილვა მოეწყო მარტო ეროვნული სატყეო პოლიტიკის დოკუმენტზე. გარემოს დაცვის კომიტეტმა 48 სხდომა ჩაატარა, რეკორდი მოხსნა და სხვათაშორის, არცერთ სხდომას უმცირესობის არცერთი დეპუტატი არ დასწრებია. 2 წელიწადში გვექნება სრულყოფილი კანონმდებლობა გარემოს დაცვის სფეროში. 23 წლის მანძილზე რაც არ განხორციელებულა, ახლა ვაკეთებთ. ვმუშაობთ იმისთვის, რომ ეს ყველაფერი ჰარმონიზებული იყოს ევროპულ კანონმდებლობასთან”, _ განაცხადა გიორგი ცაგარეიშვილმა.
არასამთავრობო ორგანიზაცია “გარემოს დაცვის და მდგრადი განვითარების ცენტრის” ხელმძღვანელმა მალხაზ ადეიშვილმა დიდი შემობრუნება უწოდა გარემოს დაცვის სამინისტროს მუშაობას და იმ პრობლემებზეც გაამახვილა ყურადღება, რომლებზე ფიქრიც, მისი აზრით, სამომავლოდ აუცილებელია.
“დღევანდელი სამინისტროს მუშაობა მართლა მიმართულია გარემოს დაცვისკენ და მდგრადი განვითარებისკენ. ამ ეტაპზე ყველაზე მეტად გვაწუხებს ტრანსპორტის მიერ ატმოსფერული ჰაერის დაბინძურება. ვფიქრობ, ამ პრობლემის მოსაგვარებლად უნდა აღდგეს ავტოტრანსპორტის ტექნიკური დათვალიერება. მნიშვნელოვანი საკითხია ასევე სოფლის მეორნეობის განვითრების პროცესში გარემოსდაცვითი ფაქტორების გათვალისწინება. სამინისტროს ამ მხრივ უფრო მეტი საფიქრალი აქვს. საქართველოს მოსახლეობის ნახევარზე მეტი აწყდება იმ პრობლემებს, რაც ეროზიასთანაა დაკავშირებული. გასათვალისწინებელია ასევე სუფთა წყალზე ხელმისაწვდომობა და ა.შ. ამ მხრივ კიდევ ბევრი სამუშაოა”, _ აღნიშნა ადეიშვილმა.
რაც შეეხება თავად უწყების ხელმძღვანელს, ხათუნა გოგალაძე აღნიშნავს, რომ მართლაც ბევრი გააკეთეს, თუმცა თავს თვითკმაყოფილების უფლებას არ აძლევს.
“ყოველგვარი თავმდაბლობის გარეშე ვიტყვი, რომ ეს იყო ძალიან გადატვირთული ერთი წელიწადი. თუნდაც კონკურსების თვალსაზრისით. თანამშრომელთა შერჩევამ მიიღო დაუსრულებელი ხასიათი. ახლაც მიმდინარეობს რეორგანიზაცია. ვიტყოდი, რომ ბევრი რაღაც გაკეთდა ამ ერთი წლის განმავლობაში: ჩვენთვის ამ ეტაპზე პრიორიტეტია ტყე, ნარჩენების მდგრადი მართვა, მიმდინარეობს აგრეთვე ნებართვებთან, ჰაერთან დაკავშირებით კანონმდებლობის მოწესრიგება, მაგრამ აბსოლუტურ თვითკმაყოფილებაში ჩავარდნა არ იქნება სწორი. ჩვენ გარემოს დაცვის სექტორი შემოვაბრუნეთ იქით, საითაც არის ევროკავშირი, საერთაშორისო კანონმდებლობა. შემოვბრუნდით და მივდივართ სწორი მიმართულებით. ამაზეც მუდმივად გავდივართ კონსულტაციებს და თუ ვინმე თვლის, რომ ჩვენ მიერ არჩეული კურსი არასწორია, ამაზეც შეგვიძლია ვიმსჯელოთ. ჩვენ მოვუსმენთ ყველას მოსაზრებას”, _ განაცხადა გარემოსა და ბუნებრივი რესურსების დაცვის მინისტრმა.
