სახელმწიფო მინისტრი მრჩეველთა საბჭოს წევრებს ვილნიუსის სამიტის შემდეგ საქართველოს ევროკავშირში ინტეგრაციის კუთხით მდგარ ამოცანებსა და გამოწვევებზე ესაუბრა. მრჩეველთა საბჭოზე სახელმწიფო მინისტრმა, საზოგადოების მხრიდან ევროინტეგრაციისა და მასთან დაკავშირებული საკითხებისადმი მაღალი ინტერესიდან გამომდინარე, კიდევ ერთხელ აღნიშნა ევროინტეგრაციის საკითხთა კომუნიკაციისა და ინფორმაციის შესახებ საქართველოს მთავრობის მიერ 2014-2017 წლებისთვის შემუშავებული სტრატეგიის მნიშვნელობა და მის განხორციელებასთან დაკავშირებული საკითხები განიხილა.
შეხვედრა კითხვა-პასუხის რეჟიმში წარიმართა. მრჩეველთა საბჭოს წევრები განსაკუთრებით დაინტერესდნენ საქართველოს ევროკავშირში ინტეგრაციის დინამიკით, ასოცირების შეთანხმების პარაფირებიდან მის ხელმოწერამდე საქართველოს წინაშე მდგარი გამოწვევებით, საქართველო-რუსეთის ურთიერთობების დარეგულირების პერსპექტივებითა და ასევე, თუ რა გავლენას მოახდენს უკრაინაში განვითარებული მოვლენები აღმოსავლეთ პარტნიორობის მონაწილე სხვა ქვეყნებზე.
“ძალიან მნიშვნელოვანია განვიხილოთ ვილნიუსის სამიტის შემდგომი გეგმები საქართველოს მთავრობის. საქართველოს საზოგადოების, ბიზნესსამყაროს და არასამთავრობო სექტორის ერთობლივი ღონისძიებების დაგეგმვის გათვალისწინებით, ვინაიდან ძალიან მნიშვნელოვანია, რომ თითოეულ ჩვენს მოქალაქემდე მივიდეს ზედმიწევნით ზუსტი ინფორმაცია, თუ რა მოლოდინები გვაქვს ჩვენ ასოცირების შეთანხმების ძალაში შესვლიდან, რა მოლოდინები გვაქვს ჩვენ უახლოესი თვეების და წლების განმავლობაში და რა გამოწვევები და ვალდებულებები გვექნება. ყველა ამ საკითხთან დაკავშირებით ძალიან ღიად გულწრფელად და აქტიურად ვიმსჯელებთ”, _ განაცხადა შეხვედრამდე სახელმწიფო მინისტრმა.
ცნობისთვის, საქართველოს ევროკავშირში ინტეგრაციის საკითხებზე საზოგადოებრივ მრჩეველთა საბჭო 2005 წელს შეიქმნა. მრჩეველთა საბჭოს მუშაობაში არასამთავრობო ორგანიზაციების, აკადემიური წრეების, მედიის წარმომადგენლები და დამოუკიდებელი ექსპერტები მონაწილეობენ. საზოგადოებასთან აქტიური დიალოგის მიზნით შეხვედრები პერიოდულად იმართება, სადაც საქართველოს ევროკავშირში ინტეგრაციის პრიორიტეტული და სხვა აქტუალური საკითხები განიხილება.
