წარმოდგენილი პროექტი საქართველოს ოკუპირებულ ტერიტორიებთან “გამყოფი ხაზის” მიმდებარე სოფლებში დაზარალებული სტუდენტებისათვის სოციალური პროგრამის ფარგლებში სამომავლოდ დაფინანსებას შეეხება. უმცირესობის დეპუტატ ჩიორა თაქთაქიშვილის განცხადებით, ტერმინი გამყოფი ხაზი დაბალი მნიშვნელობისაა და უკეთესი იქნებოდა თუ კანონში “გამყოფი ხაზი” “საოკუპაციო ზოლით” შეიცვლებოდა. მისი განცხადებით, საერთაშორისო საზოგადოება დიდხანს ერიდებოდა ტერმინ “საოკუპაციო ზოლის” გამოყენებას, თუმცა, მას შემდეგ, რაც ეს მიღწეულია და საერთაშორისო თანამეგობრობა ოკუპაციას ახსენებს, საქართველოს მთავრობამაც აღნიშნული ტერმინით უნდა ისარგებლოს და არა მისი შესუსტებული ვარიანტით.
“ჩემი კითხვა უკავშირდება ტერმინის გამოყენებას. არგუმენტი ნამდვილად არ არის ის, რომ არსებობს სახელმწიფოს მიერ დამტკიცებული სტრატეგია, ოკუპირებულ ტერიტორიებთან მიმართებაში, სადაც ტერმინი გამყოფი ხაზი გამოყენებულია. ეს არ არის არგუმენტი, იმიტომ რომ ამავე დოკუმენტში გამყოფ ხაზთან ერთად გამოყენებულია ძალიან მკაცრი ტერმინოლოგია ოკუპურებულ ტერიოტორიებთან დაკავშირებით. რატომ არუნდა იყოს გამოყენებული ამ კანონში? ეს იქნება პირველი შემთხვევა, როდესაც საქართველოს კანონში დაშვებული იქნება უფრო დაბალი მნიშვნელობის ტერმინი, როგორიცაა გამყოფი ხაზი, ვიდრე მნიშვნელოვანი პოლიტიკური შინაარსის მქონე ტერმინი, როგორიცაა საოკუპაციო ხაზი. საერთაშორისო თანამეგობრობას, ძალიან დიდი ხანი უჭირდა ტერმინი საოკუპაციო ზოლის გამოყენება. ისინი ყურადღებას ამახვილებდნენ გეოგრაფიაზე. ჩვენი ურყევი პოზიციაა, რომ ეს მავთულხლართები არის საოკუპაციო ხაზი. აქედან გამომდინარე, ჩემი შემოთავაზება იქნება, რომ საქართველოს ოკუპირებული ტერიოტორიებიდან “გამყოფი ხაზი” შეიცვალოს ტერმინით საქართველოს ოკუპირებულ ტერიოტორიებთან “საოკუპაციო ხაზით”, _ განაცხადა ჩიორა თაქთაქიშვილმა.
უმცირესობის დეპუტატი აკაკი მინაშვილიც მიიჩნევს, რომ გამყოფი ხაზი არ შეიძლება ეწოდოს იმ ტერიოტრიას, რომელსაც საერთაშორისო თანამეგობრობა და ქართული სახელმწიფო საოკუპაციო ზოლს უწოდებს.
“არ მესმის ის ტენდენცია, რომელიც ბოლო პერიოდში გამოიკვეთა ამ ტერმინთან მიმართებაში. გამყოფი ხაზის გამოყენება, მაშინ როდესაც, როგორც პოლიტიკურად, ასევე სამართლებრივად, ასევე იმ მიზნებისთვის, რომელიც აქვს საქარათველოს, რომ მოხდეს დეოკუპაცია და ამისათვის ჩვენ გვინდა საერთაშორისო მხარდაჭერის გაძლიერება, ნაცვლად გამყოფი ხაზისა, უნდა იყოს გამოყენებული საოკუპაციო ხაზი”, _ განაცხადა აკაკი მინაშვილმა.
