კომპანიას ტყის ფონდით სპეციალური სარგებლობის ვადა განესაზღვრა შემდეგნაირად: ა) წალკის მუნიციპალიტეტში, წალკის სატყეოს ტყის ფონდში (საერთო ფართობი – 8400 კვ.მ): ა.ა) 4327 კვ.მ ფართობზე – არა უმეტეს 7 წელი; ა.ბ) 4073 კვ.მ ფართობზე – არა უმეტეს 49 წელი; ბ) მარნეულის მუნიციპალიტეტში, წერაქვის სატყეოს ტყის ფონდში, ყოფილ საკოლმეურნეო ტყეში (საერთო ფართობი – 4527 კვ.მ): ბ.ა) 799 კვ.მ ფართობზე – არა უმეტეს 7 წელი; ბ.ბ) 3728 კვ.მ ფართობზე – არა უმეტეს 49 წელი.
აღნიშნული ბრძანებით კომპანიას “ლიმიტედი საქართველო” მიეცა უფლება, წერაქვის სატყეოს ტყის ფონდში (მარნეულის მუნიციპალიტეტი), კანონმდებლობით დადგენილი წესით, გარემოდან ამოიღოს საქართველოს “წითელ ნუსხაში” შეტანილი მერქნიან მცენარეთა სახეობები.
მთავრობის მიერ მიღებული ბრძანების საფუძველზე, რომელსაც ხელს პრემიერ-მინისტრი ირაკლი ღარიბაშვილი აწერს, კომპანია ვალდებულია, მოჭრილი მერქნული რესურსი დაასაწყობოს სააგენტოს მიერ მითითებულ ტერიტორიაზე და ამ განკარგულების ძალაში შესვლიდან ორი თვის ვადაში, სააგენტოს შესათანხმებლად წარუდგინოს ბიომრავალფეროვნებისათვის მიყენებული ზემოქმედების საკომპენსაციო ქმედებების პაკეტი.
გარემოს დაცვის სამინისტროს წარმომადგენლები თითქმის ყველა შეხვედრაზე აცხადებენ, რომ ლიცენზიებით ტყის მართვა არის ძალიან ცუდი ფორმა და საუბრობენ მის შეცვლაზე. ჩვენ კითხვით მივმართეთ გარემოს დაცვის სამინისტროს, თუ რატომ გასცეს ახალი ლიცენზიები.
სამინისტრომ განმარტა, რომ ამ შემთხვევაში საქმე ეხება არა გრძელვადიანი სარგებლობის ლიცენზიის გაცემას, არამედ სპეციალური სარგებლობის უფლების მინიჭებას კომპანიისთვის.
სამინისტროს ინფორმაციით, კომპანია “ლიმიტედი საქართველომ” წერილობით დააყენა საკითხი, გაზსადენისა და გაზსადენთან მისასვლელი გზის მშენებლობა/ექსპლუატაციის მიზნით, გამოეყოთ მისთვის ტყის ფონდის ნაწილი.
“საქართველოს გარემოსა და ბუნებრივი რესურსების დაცვის სამინისტროს მიერ შესწავლილი იქნა განმცხადებლის მიერ წარმოდგენილი მასალები და დადგინდა, რომ დოკუმენტაცია წარმოდგენილია სრულად და იგი შეიცავს გადაწყვეტილების მისაღებად საჭირო ყველა ინფორმაციას, რომელიც დადასტურებულია კანონმდებლობით დადგენილი წესით,” _ ნათქვამია სამინისტროდან “გურია ნიუსითვის” მოწოდებულ ინფორმაციაში.
კითხვაზე, რატომ გაჩნდა საჭიროება “წითელ ნუსხაში” შეტანილი მერქნიან მცენარეთა სახეობების გარემოდან ამოღებაზე და რა რაოდენობის იქნება ზიანი, სამინისტროდან ამგვარი პასუხი გაგვცეს:
“სამხრეთ კავკასიის მილსადენის კომპანია ლიმიტედი საქართველო”-სთვის სახელმწიფო ტყის ფონდით სპეციალური დანიშნულებით სარგებლობის ვადის განსაზღვრისა და წითელი ნუსხით დაცული სახეობების გარემოდან ამოღებაზე ნებართვის მიცემის შესახებ” საქართველოს მთავრობის 2013 წლის 17 დეკემბრის №1975 განკარგულების თანახმად, “სამხრეთ კავკასიის მილსადენის კომპანია ლიმიტედი საქართველო” ვალდებულია მოჭრილი მერქნული რესურსი დაასაწყობოს სსიპ – ეროვნული სატყეო სააგენტოს მიერ მითითებულ ტერიტორიაზე და მიღება-ჩაბარების აქტის საფუძველზე გადასცეს სააგენტოს, ასევე ზემოაღნიშნული განკარგულების ძალაში შესვლიდან ორი თვის ვადაში სსიპ – ეროვნული სატყეო სააგენტოს შესათანხმებლად წარუდგინოს სპე¬ციალური ტყითსარგებლობის შედეგად ბიომრავალფეროვნებისათვის მიყენებული ზემოქმედების საკომპენსაციო ქმედებების პაკეტი.
აქვე, ავღნიშნავთ, რომ ტყით სარგებლობის ლიცენზიების გაცემის წესს არეგულირებს “ტყით სარგებლობის ლიცენზიების გაცემის წესისა და პირობების შესახებ დებულების დამტკიცების თაობაზე” საქართველოს მთავრობის 2005 წლის 11 აგვისტოს №132 დადგენილება”.
