მინისტრმა ანგარიში თავდაცვის სისტემაში განხორციელებული ინსტუტუციური რეფორმების მიმოხილვით დაიწყო. ირაკლი ალასანიამ გადაწყვეტილებების მიღების პროცესზე ისაუბრა და ასევე, ყურადღება გაამახვილა თავდაცვის უწყების მიერ შემუშავებულ სტრატეგიულ დოკუმენტებზე და თავდაცვისუნარიანობის გაზრდის მნიშვნელობაზე:
“დოკუმენტები არაფერს არ ნიშნავს, თუკი ამ დოუმენტებმა, სტრატეგიებმა და კონცეფციებმა კონკრეტული სარგებელი არ მოუტანა ჯარისკაცებს. ჯარისკაცს, რომელიც არის ბრძოლის ველზე გასული. ყველა სისტემური გადაწყვეტილება ემსახურება, რომ ჯარისკაცი იყოს უზრუნველყოფილი შეიარაღებით, წვრთნით, რათა მათ შეძლონ მთავარი ამოცანის შესრულება – ქვეყნის დაცვა.”
თავდაცვის მინისტრმა ხაზგასმით აღნიშნა შეიარაღებული ძალების დეპოლიტიზაცია, რაც 2013 წლის ერთ-ერთი ყველაზე მნიშვნელოვანი და დიდი მიღწევაა. მისი თქმით, საპრეზიდენტო არჩევნები ამის ნათელი მაგალითია.
მინისტრი თავდაცვის სამინისტროს ერთ-ერთ პრიორიტეტს – უწყების მუშაობის გამჭვირვალობის გაზრდასაც შეეხო. ამ მხრივ, სამინისტროში მნიშვნელოვანი ნაბიჯები გადაიდგა – გაიზარდა საპარლამენტო ზედამხედველობა, თავდაცვის სამინისტრო ოფიციალურად შეუერთდა ნატოს გამჭვირვალობისა და ანგარიშვალდებულების/კეთილსინდისიერების ამაღლების (Building Integrity) პროგრამას, გაიხსნა სამოქალაქო მისაღები, გააქტიურდა თანამშრომლობა სამოქალაქო საზოგადოებასთან, დაარსდა ჯარის მეგობართა საზოგადოება.
მიმდინარე წლის განმავლობაში თავდაცვის სამინისტროს ერთ-ერთი მთავარი ამოცანა შესყიდვების პროცედურების დახვეწა და მაქსიმალური ტრანსპარენტულობის მიღწევა იყო. სახელმწიფო შესყიდვების განხორციელების გამჭვირვალობამ, გამოიწვია მაღალი კონკურენტუნარიანი გარემოს შექმნა და შედეგად თავდაცვის სამინისტრომ მიიღო 6,556,145 ლარის საბიუჯეტო სახსრების ეკონომია. აკუმულირებული თანხები, რომელიც ტრანსპარენტულობის, ანგარიშვალდებულების და სწორი მუშაობის ხარჯზე იზოგება, ხმარდება ჯარისკაცების კეთილდღეობას და მათთვის უკეთესი პირობების შექმნას. ამ მიზნით არაერთი ინფრასტრუქტურული პროექტი განხორციელდა, გაუმჯობესდა სამხედრო მოსამსახურეების კვება.
თავდაცვის სამინისტრო განსაკუთრებულ ყურადღებას უთმობს ადამიანური რესურსების მართვისა და პროფესიული განვითარების სისტემების დახვეწას. დეტალურად გაწერილი პროცედურების დაცვით და ღია კონკურსის წესით ხდება სამოქალაქო თანამშრომლების შერჩევა. მიმდინარეობს აქტიური მუშაობა სრულ პროფესიულ სამხედრო სამსახურზე გადასვლასთან დაკავშირებით.
მინისტრმა თავდაცვის უწყების ერთ-ერთ პრიორიტეტზე – სამხედრო განათლებაზე გააკეთა აქცენტი. თავდაცვის სამინისტროსთვის უდიდესი მნიშვნელობა აქვს სამხედრო მოსამსახურეებისთვის ღირსეული პირობების შექმნას და ქვეყნის წინაშე მათი დამსახურების სათანადოდ დაფასებას. ამისთვის არაერთი ნაბიჯი გადაიდგა – 25%-ით გაიზარდა სამხედრო მოსამსახურეების ხელფასი, ავღანეთის მისიაში მონაწილე სამხედროებს ხელფასი 300 აშშ დოლარით გაეზარდათ, გაუმჯობესდა სამხედრო მოსამსახურეების ჯანმრთელობის დაზღვევის პაკეტი, დაწესდა სხვადასხვა სახის ფულადი კომპენსაცია.
2013 წელს განსაკუთრებული აქცენტი გაკეთდა მძიმედ დაჭრილი სამხედრო მოსამსახურეების მხარდაჭერაზე. სამინისტრომ ამერიკულ კლინიკასთან ხელშეკრულება გააფორმა, რომლის საფუძველზეც ორმაგი ამპუტაციის მქონე სამხედრო მოსამსახურეებს მექანიკურ პროტეზებს “ორთობიონიკური” (ჩიპიანი) პროტეზებით შეუცვლიან. ეს პროგრამა მომავალში ყველა ამპუტირებულ სამხედრო მოსამსახურეზე გავრცელდება.
“ჯარისკაცის მოვალეობაა დაიცვას სამშობლო, ღირსება და ერთგულება. სახელმწიფოს მოვალეობა კი ჯარისკაცის და მისი ოჯახის დაცვაა”, _ განაცხადა ირაკლი ალასანიამ. ანგარიშში ყურადღება გამახვილდა დაღუპული სამხედრო მოსამსახურეების ოჯახების ზრუნვაზეც. საქართველოს მთავრობა ყველაფერს აკეთებს იმისთვის, რომ მათი ოჯახები უზრუნველყოფილნი იყვნენ. დაღუპული გმირების ოჯახებს ერთჯერადი დახმარების სახით 100 ათასი ლარი გადაეცათ. 2013 წელს მიღებული გადაწყვეტილებით, დაღუპულთა ოჯახები 2014 წელს 500 ლარს, ხოლო 2015 წლიდან 1000 ლარს ყოველთვიური კომპენსაციის სახით მიიღებენ. ასევე, 2013 წელს მთავრობის მიერ მიღებული გადაწყვეტილებით, დაღუპული სამხედრო მოსამსახურეების ოჯახებს ბინები გადაეცათ.
საქართველოს შეიარაღებული ძალების რეფორმირების პროცესის და სამომავლო გეგმების შესახებ ინფორმაცია ჟურნალისტებს გენერალური შტაბის უფროსმა, გენერალ-მაიორმა ვახტანგ კაპანაძემ მიაწოდა. მან ყურადღება გაამახვილა გენერალური შტაბის რესტრუქტურიზაციაზე, დაგეგმილ საერთაშორისო სწავლებებზე, სპეციალური და საინჟინრო ძალების განვითარებაზე, საჰაერო სისტემის ჩამოყალიბებაზე, რეზერვის სისტემის შემუშავებასა და სამხედრო ინდუსტრიის განვითარებაზე. გენერალ-მაიორის განცხადებით, 2013 წელი იყო გეგმების შემუშავების წელი, ხოლო 2014 წელი შეიარაღებულ ძალებში შედეგების მიღწევის წელი იქნება.
