“დღეს ძეგლთა დაცვის სააგენტოს თანამშრომლებთან ერთად საყდრისის ძველი საბადოს ტერიტორია მოვინახულე. გუშინ გავრცელდა ინფორმაცია, რომ საბადოს ტერიტორიაზე RMG გოლდმა მიწის სამუშაოები დაიწყო, რაც არქეოლოგიურ ობიექტს საფრთხეს უქმნიდა.
კულტურის სამინისტროს ინიციატივით დღეს ვიმყოფებოდით სამშენებლო მოედანზე. ვადასტურებ, რომ კარიერი უკვე ამოქმედდა და იქიდან მადანი გააქვთ. ვადასტურებ, რომ არქეოლოგიური ობიექტი დაზიანებულია. ვადასტურებ, რომ კომპანიის წარმომადგენლებმა ვერ გვაჩვენეს დოკუმენტი, რომელიც სამუშაოების დაწყების უფლებას მისცემდა კომპანიას.
ჩემი ინფორმაციით ასეთი დოკუმენტი არ არსებობს ჯერ-ჯერობით. კომპანიის წარმომადგენლებმა არც ძველი საბადოს დატვალიეტრების და არც ფოტოფიქსაციის საშუალება მოგვცეს.
კითხვა მაქვს კულტურის სამინისტროსთან, რატომ აწარმოებს სამუშაოებს RMG გოლდი, გაცემულია თუ არა თქვენს მიერ შესაბამისი ნებართვა”, _ ნარიმანიშვილმა ეს განცხადება ფეისბუქით გაავრცელა.
შეგახსენებთ, რომ საყდრისის უძველეს საბადოსთან დაკავშირებით 9 დეკემბერს ბერლინში ორმხრივი შეხვედრა გაიმართა, რომელშიც საქართველოს მხრიდან საგარეო საქმეთა, კულტურისა და განათლების მინისტრების მოადგილეები მონაწილეობდნენ. მხარეები შეთანხმდნენ, რომ საყდრისის საბადოსთან დაკავშირებით საბოლოო გადაწყვეტილებას საერთაშორისო ექსპერტებით დაკომპლექტებული კომისია მიიღებს.
“ქართული მხარისათვის ცნობილია რურის უნივერსიტეტისა და გერმანიის სამთო მუზეუმის მიერ საკუთარ თავზე აღებული ვალდებულების შესახებ. 2004 წელს ამ ინსტიტუტების მეშვეობით ცნობილი გახდა ის ადრეული აღმოჩენები, რომლებიც მათ საქართველოს ტერიტორიაზე განახორციელეს საქართველოს ეროვნულ მუზეუმთან ერთად. ორივე მხარე ხაზგასმით ადასტურებს საყდრისის საბადოს საკითხის გარშემო დიალოგის გაგრძელების აუცილებლობას. გერმანული მხარე გამოვიდა ინიციატივით, რომ ეს საკითხი უნდა გადაეცეს შესასწავლად და გადაწყვეტილების მისაღებად საერთაშორისო ექსპერტებით დაკომპლექტებულ კომისიას, რაც უზრუნველყოფს საკითხის სწორად შეფასებასა და გადაწყვეტას. ქართული მხარე ითვალისწინებს ზემოთ აღნიშნულ წინადადებას და მზადაა შემდგომი ურთიერთობებისათვის შესაბამის ორგანოებთან, რომლებთანაც ის გააგრძელებს მოლაპარაკებებს ამ თემაზე”, _ ეს იმ დოკუმენტის შინაარსი, რომელიც შეხვედრის შემდეგ გაფორმდა.
ჟურნალისტ ნინო მიქიაშვილთან საუბრისას კულტურის სამინისტროს კულტურული მემკვიდრეობის სტრატეგიის, ორგანიზაციების კოორდინაციისა და ნებართვების დეპარტამენტის დირექტორი ბესიკ მაცაბერიძე განმარტავდა:
“მიუხედავად იმისა რომ ამ ეტაპზე საყდრისის მაღაროს ძეგლის სტატუსი არა აქვს და არქეოლოგიური დაცვის ზონაც გაუქმებულია, ის დღემდე რჩება არქეოლოგიურ ობიექტად. იქ ოქროს მომპოვებელი კომპანია აპირებს წიაღისეულის მოპოვებას. ჩვენი კანონის მიხედვით, ესაა მეხუთე კატეგორიის, განსაკუთრებული სახის სამუშაოები, რომლის დაწყებამდე აუცილებელია ტერიტორიის სრული არქეოლოგიური შესწავლა. ამას გაკეთებას კანონი პირდაპირ ავალდებულებთ.
არქეოლოგიური შესწავლის ანგარიში სამინისტროში უნდა წარმოადგინონ. ეს ანგარიში უნდა ადასტურებდეს იმ არქეოლოგიური ობიექტის სრულფასოვნად შესწავლას, მის სრულად გამოვლენას, რომ სამინისტროს ჰქონდეს წარმოდგენა რასთან არის საქმე, რა ხდება იქ. მოკლედ, ამომწურავი ინფორმაციის წარდგენას კანონი ავალდებულებთ.”
წარმოდგენილი ანგარიშის შემდეგ სამინისტრომ უნდა გასცეს წიაღისეულის მოპოვებაზე სამუშაოების დაწყების ნებართვა.სამინისტროს ნებართვის გარეშე წიაღისეულის მოსაპოვებლად სამუშაოების დაწყება კი კანონდარღვევაა.
“გურია ნიუსი” ამოწმებს ინფორმაციას საყდრისში განახლებული ოქროსმოპოვებითი სამუშაოების შესახებ და მასალას უახლოეს მომავალში შემოგთავაზებთ.
