“ჩვენ სტუდენტები, არქეოლოგები და სამოქალაქო საზოგადოების სხვა წარმომადგენლები მოვითხოვთ, სასწარფოდ იქნას მიღებული შესაბამისი ზომები საყდრის-ყაჩაღიანის ტერიტორიაზე არსებული უძველესი ოქროს სამთო-არქეოლოგიური მაღაროს განადგურების პროცესის შესაჩერებლად. ჩვენ მოვითხოვთ, მსოფლიო სამეცნიერო საზოგადოების ნების გათვალისწინებას და საერთაშორისო სამეცნიერო კომისიის შექმნას ამ თემასთან დაკავშირებით, რაც არაერთგზის გამოიხატა სამეცნიერო დასკვნების წერილების, მიმართვების და პეტიციების სახით. ისევე როგორც ეს მოხდა 2013 წლის დეკემბრის თვეში გერმანიისა დდა საქართველოს საგარეო საქმეთა მინისტრების შეხვედრაზე. მიგვაჩნია რა უკანონოდ მთელი ის პროცედურული ჯაჭვი, რომელმაც დღევანდელ კატასტროფულ მდგომარეობამდე მიგვიყვანა, მოვითხოვთ, დაუყონებლივ დაიწყოს მუშაობა საყდრისის უძრავი ძეგლის სტატუსის აღსადგენად, წინააღმდეგ შემთხვევაში ჩნდება ეჭვი, სახელმწიფოში ელიტური კორუფციული გარიგებების არსებობისა. კულტურის მინისტრისა და პრემიერმინისტრის გადაწყვეტილებების საყდრისისთვის ძეგლისა და შემდგომში არქეოლოგიური ზონის სტატუსების მოხსნის შესახებ, რომელსაც საფუძვლად დაედო აბსოლუტურად არაკომპეტენტური და მიკერძოებული კომისიის დასკვნა, არის უკანონო, ვინაიდან კანონი კულტურული მემკვიდრეობის დაცვის შესახებ განმარტავს, რომ ძეგლისთვის სტატუსის მოხსნის უფლება აქვს მხოლოდ და მხოლოდ საბჭოს და არა მინისტრს.
ამ გადაწყვეტილებებით დაირღვა ადამიანის საყოველთაო უფლებები, დაირღვა კონსტიტუცია და საქართველოს კანონი. გვინდა შეგახსენოთ, რომ სახელმწიფოს კონსტიტუციით აკისრია კულტურული მემკვიდრეობის დაცვის ვალდებულება, ისევე როგორც ყველა მოქალაქეს, რაც ითვალისწინებს ღონისძიებათა ერთობლიობას „რომლის მიზანია კულტურული მემკვიდრეობის სრული მრავალფეროვნებით შენარჩუნება და მისი მდგრადი განვითარების უზრუნველოფა“.
მივმართავთ გარემოს დაცვის სამინისტროს, დაუყონებლივ მიიღოს შესაბამისი ზომები საყდრის-ყაჩაღიანისა და აბულმუგის ხეობის ტერიტორიაზე მიმდინარე დანაშაულებრივი ქმედებების წინააღმდეგ. ჩვენთვის კარგად არის ცნობილი ის ფაქტი, რომ კომპანია RMG Gold-მა ნებართვის გაცემამდე ააშენა გამოსატუტი მოედანი, რომელსაც შეეწირა არამარტო ადგილობრივი ლანდშაფტი და გარემო, არამედ კულტურული მემკვიდრეობის უამრავი მსოფლიო ღირებულების არქეოლოგიური ობიექტი, ზოგიერთი არაპროფესიონალური დაარაკომპეტენტური არქეოლოგიური ასოციაციებისა და ინსტიტუციების დახმარებით. ნუ გადააქცევთ ამ ტერიტორიას ონკოლოგიური დაავადებების ბუდედ, როგორც ეს მოხდა ბოლნისში! ნუ დააბინძურებთ ქვემო ქართლის მინდვრებს, სადაც მოყვანილი ბოსტნეულით მარაგდება საქართველოს მოსახლეობის ნაწილი!
ჩვენ ვეწინააღმდეგებით საქართველოს ეკონომიკური განვითარების ამგვარი განვითარების პოლიტიკას. ეს პოლიტიკა ეწინააღმდეგება ადამიანის საყოველთაო უფლებათა დეკლარაციას, საქართველოს კონსტიტუციას და მის ძირითად პრინციპებს, რომ ყველა ადამიანი თანასწორია კანონის წინაშე, რომ ყველა ადამიანი შექმნილია თანასწორად მიუხედავად მისი სოციალური, თუ სხვა სახის კუთვნილებისა და რომ ადამიანს გააჩნი აუფლება, იცხოვროს ჯანმრთელ გარემოში, თავისუფლად სარგებლობდეს ბუნებრივი და კულტურული გარემოთი. სახელმწიფო ვალდებულია, უზრუნველოს გარემოს დაცვა და ბუნებრივი რესურსებით რაციონალური სარგებლობა ქვეყნის მდგრადი განვითარებისთვის. საზოგადოებისთვის ეკონომიკური და ეკოლოგიური ინტერესების შესაბამისად ისე, რომ დროულად მიეწოდოს საზოგადოებას სრული და ობიექტური ინფორმაცია გარემოს მდგომარეობის შესახებ, რათა დაცული იყოს ადამიანის უფლება, ცხოვრობდეს ჯანმრთელობისთვის უვნებელ გარემოში (საქ. კონსტ. 37-ე მუხლი)”, _ ნათქვამია მოძრაობის მიერ გავრცელებულ მიმართვაში.
