საკრებულოს ფრაქციამ “ქართული ოცნება _ დემოკრატიული საქართველო” საკრებულოს თავმჯდომარეს რიგი შენიშვნები მიაწოდა და დასაბუთებულად მოითხოვა მხარჯავი დაწესებულებების ხარჯების 70 200 ლარით შემცირება.
ეს შენიშვნები გამგეობამ გაითვალისწინა და ფრაქციის მოთხოვნით, საკრებულოს 13 500 ლარის ხარჯი მოაკლდა. აქედან, 8 000 ლარი _ წარმომადგენლობითი ხარჯიდან, 2 000 ლარი _ ქვეყნის გარეთ მივლინებიდან, 100 ლარი _ “ფლეშკების” შესაძენი თანხიდან, 40 ლარი _ კომპიუტერის “მაუსების” შესაძენი ხარჯიდან; 300 ლარი _ მაგიდების შეძენის ხარჯიდან; 2 000 ლარი _ ბენზინის ხარჯიდან და 1 000 ლარი _ კომპიუტერის შესაძენი ხარჯიდან.
გამგეობის ხელმძღვანელობას 10 950 ლარი მოაკლდა: 5 000 ლარი _ წარმომადგენლობითი ხარჯებიდან, 400 ლარი _ ტელევიზორის შესაძენი თანხიდან, 500 ლარი _ მობილურის შესაძენი თანხიდან, 350 ლარი _ ავეჯის შესაძენი თანხიდან, 3 700 ლარი _ მანქანების მოვლა-შენახვის ხარჯიდან და 1 000 ლარი _ ბენზინის შესაძენი ხარჯიდან. ეკონომიკის სამსახურს მოაკლდა 2 000 ლარი: 700 ლარი _ კომპიუტერის შესაძენი თანხიდან, 300 ლარი _ ფოტოაპარატის შესაძენი თანხიდან, 500 ლარი _ რემონტის ხარჯიდან და 500 ლარი _ ბენზინის ხარჯიდან. 200 ლარი მოაკლდა იურიდიულ სამსახურს, რომელიც რბილი სკამის შესაძენად ჰქონდათ ბიუჯეტში ჩასმული. შესყიდვების სამსახურის ბიუჯეტი 2 700 ლარით შემცირდა: 600 ლარი მიმდინარე რემონტის ხარჯს მოაკლდა, 100 ლარი _ საწვავ-საპოხ მასალას და 2 000 ლარი _ ბენზინს. 500 ლარი ჩამოაკლეს ქონების მართვის სამსახურის ბიუჯეტს. აღნიშნული თანხიდან 200 ლარი ტელევიზორის შესაძენად იყო განკუთვნილი, ხოლო სამასი ლარი _ სათადარიგო ნაწილებისთვის. 100 ლარით შემცირდა ზედამხედველობის სამსახურის ბიუჯეტი: აქედან, 300 ლარი ტელევიზორისთვის იყო განკუთვნილი, 300 ლარი _ კომპიუტერის მაგიდისთვის, ხოლო 400 ლარი _ სათადარიგო ნაწილებისთვის.
ადმინისტრაციის ხარჯები შემცირდა 2000 ლარით: აქედან, 16 ლარი კედლის საათის შესაძენად იყო განკუთვნილი, 32 ლარი _ კედლის კალენდრისთვის, 30 ლარი _ ელექტრო ჩაიდნისთვის, 20 ლარი _ ყავის მადუღარისთვის, 45 ლარი _ წყლის 20 ცალი ჭიქის შესაძენად, 20 ლარი წყლის დოქისთვის, 200 ლარი _ კერტრიჯისთვის, 1 000 ლარი _ საოფისე ავეჯისთვის, 60 ლარი _ დინამიკებისთვის და 580 ლარი _ საწვავისთვის.
1500 ლარით შემცირდა კულტურის სამსახურის ხარჯები. ამ თანხიდან 500 ლარი მივლინებისთვის იყოს განკუთვნილი, 400 ლარი _ კერტრიჯისთვის და 600 ლარი _ ვიდეო გადაღებისთვის.
სოციალური სამსახურის ბიუჯეტი ფრაქცია “ქართული ოცნება _ დემოკრატიული საქართველოს” მოთხოვნით, 5 250 ლარით შემცირდა. აქედან, 800 ლარი მაცივრისთვის იყო განკუთვნილი, 350 ლარი _ კომპიუტერის მაგიდისთვის, 150 ლარი _ საოფისე სკამისთვის, 300 ლარი _ მობილური ტელეფონისთვის, 1 500 ლარი _ მიმდინარე რემონტისთვის, 1 000 ლარი _ ლეპტოპისთვის, 550 ლარი _ პრინტერისთვის და 1 000 ლარი _ სათადარიგო ნაწილებისთვის.
საფინანსო სამსახურს ბიუჯეტი 2 700 ლარით შეუმცირეს. აქედან, 20 ლარი ელნათურებისთვის იყო განკუთვნილი, 40 ლარი _ ელდამცველებისთვის, 20 ლარი _ ელგამყვანისთვის, 20 ლარი _ საწმენდი ტილოსთვის, 200 ლარი _ საოფისე სავარძლისთვის, 500 ლარი _ ჟალუზებისთვის, 1 500 ლარი _ ბენზინისთვის და 200 ლარი _ ლეპტოპისთვის.
ხარჯვით ნაწილში დაფინანსება შეუმცირდათ არასამეწარმეო იურიდიულ პირებსაც: “სხივს” _ 13 794 ლარით, სამუზეუმო გაერთიანებას _ 4 500 ლარით; სამხატვრო სკოლას _ 5 000 ლარით; კულტურის ცენტრს _ 200 ლარით; სასპორტო სკოლას _ 200 ლარით; სამუსიკო სკოლას _ 1 200 ლარით; სპორტის განვითარების ცენტრს _ 100 ლარით; “კურორტ ბახმაროს” _ 200 ლარით; საბიბლიოთეკო გაერთიანებას _ 1000 ლარით; “მომავალს” _ 200 ლარით; მოსწავლე-ახალგაზრდობის სახლს _ 200 ლარით და საფეხბურთო კლუბ “ბახმაროს” _ 1 000 ლარით.
დაზოგილი თანხა მიიმართა სოციალური პროგრამების დასაფინანსებლად. კერძოდ, უსახლკაროდ დარჩენილი და გაუსაძლის საცხოვრებელ პირობებში მყოფი ოჯახების დახმარების თანხა 67 200 ლარით გაიზარდა და 3 000 ლარი სპორტის ცენტრისთვის მწვრთნელის შტატს მოხმარდება.
საბოლოოდ, ჩოხატაურის მუნიციპალიტეტის საკრებულომ 2014 წლის ბიუჯეტი, რომელიც 4 770,4 ათას ლარს შეადგენს, ერთხმად დაამტკიცა. 2013 წლის დამტკიცებულ ბიუჯეტთან შედარებით, ამ წლის ბიუჯეტი 1 307,4 ათასი ლარით არის გაზრდილი, ხოლო დაზუსტებულ ბიუჯეტთან შედარებით შემცირებულია 5 724,9 ათასი ლარით, რაც გამოწვეულია იმით, რომ ამ ეტაპზე ბიუჯეტში არ არის ასახული ინფრასტრუქტურის სამუშაოებზე გათვალისწინებული თანხა და სოფლის მხარდამჭერი პროგრამის თანხები.
2014 წლის ბიუჯეტის მთავარი პრიორიტეტი სოციალური სფეროა და ყველაზე მეტი თანხა ადგილობრივი ბიუჯეტიდან სწორედ ამ მიმართულებით დაიხარჯება.
