საქართველოს რეგიონული განვითარებისა და ინფრასტრუქტურის მინისტრმა დავით ნარმანიამ ქვემო ქართლის გუბერნატორ გიორგი მღებრიშვილთან და მხარის გამგებლებსა და საკრებულოს თავმჯდომარეებთან შეხვედრა გამართა.
სამუშაო შეხვედრაზე მინისტრმა ადგილობრივი ხელისუფლების წარმომადგენლებს ინფორმაცია მიაწოდა იმ ინფრასტრუქტურული პროექტების შესახებ, რომლის განხორციელებასაც სამინისტრო 2014 წელს რეგიონში გეგმავს. საუბარი შეეხო საავტომობილო გზების რეაბილიტაციას, წყალმომარაგების სისტემების გამართვას, მყარი ნარჩენების მართვასთან დაკავშირებულ საკითხებსა და სხვა ინფრასტრუქტურულ პროექტებს.
ერთ-ერთი ყველაზე მნიშვნელოვანი პროექტი, რომელსაც საქართველოს რეგიონული განვითარებისა და ინფრასტრუქტურის სამინისტრო მუნიციპალური განვითარების ფონდთან ერთად იწყებს, თბილისი-რუსთავის ავტომაგისტრალის მშენებლობაა. სამუშაოებს ტენდერში გამარჯვებული კომპანია “სინოჰიდრო კორპორეიშენ ლიმიტედი” განახორციელებს. მიმდინარე წელს მშენებლობა პირველ და მესამე მონაკვეთებზე დაიწყება, ხოლო მეორე მონაკვეთზე დეტალური პროექტის მომზადება დასრულებულია და გადაგზავნილია დონორ ორგანიზაციასთან (აზიის განვითარების ბანკი). დონორის თანხმობის შემდეგ გამოცხადდება ტენდერი; პირველი და მესამე მონაკვეთების ბიუჯეტი 88,761,128.95 ლარია.
გარდა ამისა, 2014 წელს სამინისტროს, საავტომობილო გზების დეპარტამენტთან ერთად, დაგეგმილი აქვს თბილისი-წითელი-ხიდი (აზერბაიჯანის რესპუბლიკის საზღვარი) საავტომობილო გზის კმ46-კმ51 მონაკვეთის, თბილისი(პანტიანი)-მანგლისის საავტომობილო გზის 29-ე კმ-ში არსებული ქვის თაღოვანი სახიდე გადასასვლელის, წერეთელი-მირზოევკა-მუღანლო-ქესალოს საავტომობილო გზის კმ4-კმ16 მონაკვეთისა და ბოლნისი-სიონის მონასტერი-წუღრუღაშენის საავტომობილო გზის კმ1-კმ7 მონაკვეთის სარეაბილიტაციო სამუშაოები. გაგრძელდება, ასევე, დიდი დმანისი-დმანისი-გომარეთი-ბედიანი საავტომობილო გზის რეაბილიტაციაც.
გარდა საავტომობილო გზებისა, ინტენსიური სამუშაოებია დაგეგმილი წყალმომარაგების მოწესრიგების კუთხით. 2014 წელს მუნიციპალური განვითარების ფონდი ბოლნისში, წალკასა და თეთრიწყაროში წყალმომარაგების სისტემის მშენებლობა-რეაბილიტაციის სამუშაოებს დაიწყებს. გაგრძელდება, ასევე, სოფელ სართიჭალის წყალსადენი სისტემის რეაბილიტაციაც.
2014 წელსვე მყარი ნარჩენების მართვის კომპანიას მარნეულის ნაგავსაყრელის კეთილმოწყობა აქვს დაგეგმილი. აგრეთვე, ექსპლუატაციაში შევა ბოლნისის, წალკის, თეთრიწყაროსა და დმანისის ნაგავსაყრელები.
გარდა ამ მასშტაბური პროექტებისა, დაგეგმილია თბილისი-ბაკურციხე-ლაგოდეხის საავტომობილო გზის რკინიგზის გზაგამტარის იმ მონაკვეთის რეაბილიტაცია, რომელიც გარდაბნის მუნიციპალიტეტზე გადის. გარდაბანშივე დაგეგმილია ტროტუარების მოწყობა, ხოლო სოფელ ლემშვენიერაში შიდა გზების მოასფალტების სამუშაოები. ქალაქ რუსთავში მდინარე მტკვარზე, ძველ ხიდთან ჩატარდება ნაპირდამცავი სამუშაოები. რუსთავშივე დაგეგმილია ყაზბეგის ქუჩაზე არსებული ავარიული სახლის გამაგრების სამუშაოები.
გარდა რეგიონული განვითარების სამინისტროს ბიუჯეტით დაგეგმილი სამუშაოებისა, შეხვედრაზე, ასევე, განიხილეს რეგიონებში განსახორციელებელი პროექტების ფონდიდან ქვემო ქართლის მუნიციპალიტეტებისთვის დამტკიცებული პროექტები, მათი დაწყებისა და განხორციელების ვადები.
რეგიონული განვითარების სამთავრობო კომისიამ უკვე დაამტკიცა 49 პროექტი, რომელიც 2014 წელს ქვემო ქართლში განხორციელდება. რეგიონებში განსახორციელებელი პროექტების ფონდიდან დაფინანსდება გზებისა და ხიდების რეაბილიტაცია (14 პროექტი); საბავშვო ბაღებისა და სხვა შენობების რეაბილიტაცია (4 პროექტი); წყლისა და კანალიზაციის მოწესრიგება (29 პროექტი); სხვადასხვა ინფრასტრუქტურის მოწესრიგება (2 პროექტი).
მთლიანობაში, 2014 წელს საქართველოს რეგიონული განვითარებისა და ინფრასტრუქტურის სამინისტრო ქვემო ქართლის რეგიონში 17 მილიონ ლარზე მეტს დახარჯავს, ხოლო რეგიონებში განსახორციელებელი პროექტების ფონდიდან მუნიციპალიტეტები ინფრასტრუქტურული პროექტების განსახორციელებლად დამატებით 16 მილიონამდე ლარს მიიღებენ, რომლითაც 49 პროექტს განახორციელებენ. ჯამში, ქვემო ქართლში ინფრასტრუქტურულ პროექტებზე 33 მილიონ ლარზე მეტი დაიხარჯება.
