მისივე განმარტებით, კრიზისების მართვის საბჭო ძირითადად შიდა საფრთხეებსა და კრიზისებზე იქნება ორიენტირებული და მას არ ექნება იურიდიული სტატუსი, უშიშროების საბჭოსგან განსხვავებით. სესიაშვილი ამბობს, რომ აღნიშნული საბჭოს შექმნა ჯერ კიდევ 4 წლის წინ იგეგმებოდა და ამისთვის თანხებიც იყო გამოყოფილი. თუმცა, წინა ხელისუფლებამ არ ისურვა მსგავსი ორგანოს არსებობა.
“პრეზიდენტს, უშიშროების საბჭოს ფარგლებში, მხოლოდ თავდაცვის საკითხებზე ორგანიზების კომპეტენცია დარჩა, მაგრამ უსაფრთხოება მოიცავს მრავალ ელემენტს, მათ შორის, შიდა უსაფრთხოება ყველაზე მთავარია და ეს გადაეცა პრემიერს, რადგან იგი არის აღმასრულებელი ხელისუფლების მეთაური და შესაბამისად, პასუხისმგებელია ქვეყნის უსაფრთხოებაზე. მთავარი საკითხი მაინც ის არის, რომ ქვეყანაში მოვახერხოთ უსაფრთხოების ნორმების დაცვა. ჯერ კიდევ რამდენიმე წლის წინ, დასავლეთი გვათავაზობდა, რომ ჩამოყალიბებულიყო კრიზისების მართვის ცენტრი. მეტიც – თანხაც იყო გამოყოფილი, აპარატურაც ქვეყანაში იყო, მაგრამ წინა ხელისუფლებამ ეს ვერ შეძლო. მივესალმები პრემიერის გადაწყვეტილებას კრიზისების მართვის ცენტის ჩამოყალიბებაზე. არანაირი დუბლირება არ მომხადარა. განსხვავება მდგომარეობს იმაში, რომ “უშიშროების საბჭო” არის პრეზიდენტის მრჩეველი ორგანო. რაც შეეხება “კრიზისების მართვის საბჭოს”, ეს არის სტრატეგიული, ოპერატიულ დონეზე არსებული სისტემა, რომელმაც კრიზისების არსებობის შემთხვევაში უშუალოდ უნდა მოახდინოს მისი მართვა, ორგანიზება და კრიზისების დაძლევა,” _ განაცხადა სესიაშვილმა.
