სამინისტროს ინფორმაციით, 2013 წელს ევროპის საინვესტიციო ბანკის მიერ გამოყოფილი 40 მილიონი ევროს ოდენობით სესხის ფარგლებში 17 ქალაქში მასშტაბური სარეაბილიტაციო სამუშაოები დასრულებულია. გარდა ამისა, აზიის განვითარების ბანკის დაფინანსებით დაიწყო ქუთაისის, ფოთისა და ანაკლიის წყალმომარაგების 60-მილიონიანი პროექტი; დონორი ორგანიზაციებიდან 32 ქალაქის რეაბილიტაციისთვის მოზიდულ იქნა 300 მილიონ ლარამდე ინვესტიცია.
“2013 წელს შევიძინეთ წყლის ხარისხის თანამედროვე მობილური ლაბორატორიები და ქუთაისი, წყალტუბო, ოზურგეთი, ფოთი, გორი, ახალციხე, ბოლნისი და თელავი მოძრავი ლაბორატორიებით აღიჭურვა. ქუთაისის სერვის ცენტრსა და მცხეთის ტრენინგ ცენტრში დამონტაჟდა მრიცხველის შესამოწმებელი ლაბორატორიები. თუ საჭიროება იქნება მოძრავი ლაბორატორიები გარდა აღნიშნული ქალაქებისა წყლის ხარისხს სხვაგანაც შეამოწმებს. ამასთან, გაგრძელდება ქუთაისის, ანკლიისა და ფოთის წყალმომარაგების 60-მილიონიანი პროექტი. პროექტის შედეგად, ფოთსა და ანაკლიას მთლიანად, ასევე, ქუთაისის 75%-ს 24-საათიანი, ხოლო 25%-ს გაუმჯობესებული წყალმომარაგება ექნება. გაერთიანებული წყალმომარაგების კომპანიის ბიუჯეტით დამატებით 16 ქალაქში მოხდება წყლის ინფრასტრუქტურის მოწესრიგება, რისთვისაც კომპანია 6,7 მილიონ ლარს დახარჯავს,” _ აღნიშნა ნარმანიამ შეხვედრისას.
სამინისტროს ინფორმაციით, გაერთიანებულმა წყალმომარაგების კომპანიამ 2013 წელს დამატებით 36 ათასი აბონენტი გაამრიცხველიანა. თუ 2012 წელს აბონენტებისგან მთელი წლის განმავლობაში შემოსავალი მხოლოდ 213 ათასი ლარი იყო, 2013 წელს ეს ციფრი მილიონ ოთხასი ათას ლარამდე გაიზარდა.
2014 წელს ევროპის საინვესტიციო ბანკის მიერ კრედიტის სახით გამოყოფილი 40 მილიონი ევრო და გრანტის სახით გამოყოფილი 8 მილიონი ევრო მოხმარდება წყალმომარაგების გაუმჯობესებას. წყლის სისტემის რეაბილიტაცია 25 ქალაქსა და 3 დაბაში მოხდება.
ამასთან, სამინისტროს ინფორმაციით, მნიშვნელოვანი ყურადღება ეთმობა კონფლიქტისპირა სოფლების წყლით მომარაგებასაც.
“2013 წლის განმავლობაში კონფლიქტის ზონაში რამდენიმე მასშტაბური პროექტი განხორციელდა. მოხდა სალთვისი-ტირიფონის საირიგაციო სისტემის რეაბილიტაცია. სალთვისის სარწყავი არხით 16 სოფელს, ხოლო ტირიფონის სარწყავი არხით 23 სოფელს საირიგაციო წყლით მომარაგების პრობლემა მოეხსნა. ასევე, საქართველოს მთავრობის განკარგულებით, პატარა ლიახვის ხეობაში, ოკუპირებული ტერიტორიების მიმდებარე სოფლების – ზარდიანთკარის, დიდი ხურვალეთის, გუგუთაანთკარისა და კოშკას მოსახლეობის სასმელი წყლით უზრუნველყოფის გაუმჯობესების მიზნით, დამატებითი ჭაბურღილების ბურღვა განხორციელდა. პროექტის განხორციელების შედეგად, ოკუპირებული ტერიტორიების მიმდებარე სოფლებს წყალმომარაგების პრობლემა მოუგვარდა და მოსახლეობა წყალს ყოველდღიურად იღებს; კონფლიქტის ზონის სოფლებში რეაბილიტაცია ჩაუტარდა საღოლაშენი-დვანის, გორიჯვრის, ლამისყანა-ახმაჯი-თვაურების, კარალეთი-ქვეშის საავტომობილო გზებს. 2014 წელს კონფლიქტისპირა 9 სოფელში – დიდ ხურვალეთში, გუგუთაანთკარში, კოშკაში, ზარდიაანთკარში, დიცში, მერეთში, წაღვლში, ატოცსა და კნოლევში გაგრძელდება წყალმომარაგების სისტემის მოწესრიგება. ამ სოფლებიდან ოთხში ჭაბურღილები 2013 წელს გაიბურღა, 2014 წელს ამ სოფლებში აშენდება რეზერვუარები. გაგრძელდება სალთვისი-ტირიფონის საირიგაციო სისტემის მოწესრიგების სამუშაოები, რომლის დასრულების შემდეგაც მოირწყვება 18 200 ჰექტრამდე მიწა, რომელიც 30 სოფელს მოიცავს,” _ აღნიშნავენ სამინისტროს წარმომადგენლები.
საბოლოო ჯამში წალმომარაგების სისტემის რეაბილიტაციაზე, სანიაღვრე არხებისა და კანალიზაციის მოწესრიგებაზე რეგიონების მიხედვით, 116 პროექტია დაფინანსებული სოფლის მხარდაჭერის პროგრამის ფონდისა და რეგიონებში განსახორციელებელი პროექტების ფარგლებში. აქედან, გურიის რეგიონში 4 პროექტია, რომელიც წყლისა და სანიაღვრე არხების მოწესრიგებაზე იზრუნებს.
