ლანჩხუთში, აღმაშენებლის ქუჩაზე, რომლის სრული რეაბილიტაციიდან ჯერ კიდევ ერთი წელიც არაა გასული და რომლითაც ჩქაროსული ავტომაგისტრალი ქალაქს უკავშირდება, საკანალიზაციო ჭა ჩავარდა.
ინფორმაციას იმის თაობაზე, რომ ჩქაროსული ავტომაგისტრალის ჯაპანა-ლანჩხუთის 14 კმ-იანი მონაკვეთი, ავარიული მდგომარეობის გამო გარკვეული ხნით იხურება, ლანჩხუთში ამაზე ბოლო პერიოდში აქტიურად საუბრობენ. ამბობენ, რომ ავტობანზე პრობლემები ხიდებთან დაკავშირებით წარმოიშვა.
ენმ-ის ადგილობრივი ორგანიზაციის ხელმძღვანელმა კახა ასკურავამ ამის შესახებ სოციალურ ქსელშიც დაწერა. მან ხელისუფლებას მავნებლობაში დასდო ბრალი და აქცენტი უხარისხოდ შესრულებულ სამუშაოებზე გააკეთა.
„ჯაპანა-ლანჩხუთის საავტომობილო ავტობანის მონაკვეთი, რომელიც ბევრი წვალებისა და დიდი ფულის მოტეხვის ხარჯზე, ერთი წლის უკან, როგორც იქნა, გაიხსნა, გაურკვეველი დროით ისევ იკეტება.
მიზეზი ავტობანზე არსებული ხიდების ჩაწევაა, რომელიც სახიფათო ზღვარზეა უკვე. ავტობანი, რომლის სამივე ლოტიც უნდა დასრულებულიყო 2016 სრულად, მისი ერთი მონაკვეთი გაიხსნა წელიწადნახევრის უკან და ისიც ისე უვარგისია, რომ უკვე იკეტება და პასუხისმგებელი არაა არავინ.
არადა მილიონობით ლარია სესხად აღებული ამ პროექტის გახორციელების მიზნით.
მავნებლები ხართ მოკალათებული ხელისუფლებაში!” -დაწერა ასკურავამ.
ასკურავას ამ ბრალდების პასუხად საავტომობილო გზების დეპარტამენტში გავრცელებულ ინფორმაციას მცდარი უწოდეს და ჩქაროსნული ავტომაგისტრალის აღინშნული მონაკვეთის მოსალოდნელი ჩაკეტვა არ დაადასტურეს.
შესაძლოა ავტობანის ზემონახსენები მონაკვეთის ჩაკეტვა, მართლაც არ იგეგმება, თუმცა აღმაშენებლის ქუჩაზე მომხდარი ფაქტით თუ ვიმსჯელებთ, აქ შესრულებული სამუშაოები მაღალი ხარისხით არ უნდა გამოირჩეოდეს.
,,ღამის საათებში ჩავარდა, იმხელა ხმა იყო, ვიფიქრე კაი არ ხდება-თქო. გამოვედით და ეს სიტუაცია დაგვხვდა. კარგა მოზრდილი სარი ჩავარჭვე ღია ადგილზე, ზედ წითელი ნაჭერიც დავამაგრე, რომ გამვლელებმა დაინახონ და რამე არ დაემართოთ. გაიარა წეღან დიდმა ტრაილერმა და ეს სარი სულ არ შეუმჩნევია, ისე მიატეხა. ან პატრული სადაა, დღეში 9-ჯერ რომ დადის, ან სხვა სამსახურები რას შობა? ნუთუ ვერ ხედავენ, რაც ხდება. 2 მილიონ 900 ათასი რაში დაიხარჯა, 6 თვეში რომ გაფუჭებულიყო?! ე.წ. ზებრა გადასასვლელები ზრდილობის გულიზაა უფრო დახაზული. კაი ხანს უნდა იდგე, რომ გადახვიდე. თითქმის არავინ არ აჩერებს. სანამდე ვიყოთ ამ ნერვების თამაშში?!“ – გულისტკივილით საუბრობენ ადგილობრივები.
