„ფაქტობრივად, ყველა ბოროტი ძალა, რომელიც „ნაციონალური მოძრაობის“ აგრესიულ ფრთას წარმოადგენდა, მმართველმა პარტიამ გვერდზე დაიყენა. უფრო მეტიც, „ქართულმა ოცნებამ“ ცხრა წლის პოლიტიკური შეფასებისგან თავი შეიკავა. ახლა გვიანია, მაგრამ როგორც იტყვიან, სჯობს გვიან ვიდრე არასდროს“, _ აღნიშნა „გურია ნიუსთან“ საუბრისას პროფესორმა ლადო პაპავამ წინასაარჩევნოდ შექმნილი პოლიტიკური პროცესების შეფასებისას.
პაპავა მთავრობის ინიციატივას გამოეხმაურა, რომლის მიხედვით, ე.წ. „შავ სიაში“ მოხვედრილ 600 000-ზე მეტ მოქალაქეს საბანკო დავალიანება გაუნულდება:
„თუ შევხედავთ მორალური თვალსაზრისით, რა თქმა უნდა, მოსყიდვის კომპონენტი იკვეთება, მაგრამ კანონი დაირღვა თუ არა, აღნიშნულზე იურისტებმა უნდა ისაუბრონ. ფინანსთა მინისტრობის დროს, ბატონი მამუკა ბახტაძე იძახდა, რომ ჭარბვალიანობის პრობლემა აუცილებლად უნდა გადაიჭრასო. გარდა ამისა, ბატონი ბიძინა პოლიტიკაში დაბრუნების შემდეგ ამბობდა, ეს საკითხი უნდა გადაწყდესო, ეს ყველაფერი გასაგებია, მაგრამ ჭარბვალიანობის პრობლემა საპრეზიდენტო არჩევნებამდე რამდენიმე დღით ადრე რატომ გაახსენდათ?!
ვალების განულებას პოზიტიური ეფექტი აქვს, ხალხი გათავისუფლდება ტვირთისგან, მაგრამ იჩაგრება ის ადამიანი, რომელიც ამ ვალს ისტუმრებდა.
იმისთვის, რომ საზოგადოებაში უსამართლობის განცდა არ დარჩეს, აუცილებელია, „შავი სიების“, ე.წ „რუხი სიებით“ ჩანაცვლება, რაც ნიშნავს, რომ სიაში მოხვედრილ ადამიანებს სამი წლით აეკრძალოთ სესხის აღება. ამის შემდეგ, ხალხი არ დაიწყებს ვალის აღებას იმ იმედით, რომ 2020 წელს ბიძინა ივანიშვილს ამომრჩევლის მოსყიდვა კვლავ დასჭირდება. ამ ქვეყანაში ყველაზე მეტი დასაკარგი ბატონ ბიძინას აქვს, თორემ საზოგადოების დიდ ნაწილს, მათ შორის მეც, დასაკარგი არაფერი აქვს “, _ აღნიშნა პაპავამ.
ინიციატივა, რომელიც საბანკო დავალიანების განულებას გულისხმობს, პრემიერმა მამუკა ბახტაძემ გუშინ, არჩევნებამდე რამდენიმე დღით ადრე გაახმოვანა. გავლენიანი არასამთავრობო ორგანიზაციები ფიქრობენ, რომ საკითხით პროკურატურა უნდა დაინტერესდეს, რადგან ინიციატივაში ამომრჩეველთა მოსყიდვის ელემენტები იკვეთება.
