კომპანია "კახური ტრადიციული მეღვინეობა" ჩოხატაურის რაიონში ხილის გადამამუშავებელ საწარმოს ააშენებს. ამის შესახებ "გურია ნიუსთან" კომპანიის ხელმძღვანელი ზურაბ ჩხაიძე-ასკანელი აცხადებს. მისი თქმით, ეს იქნება ერთ-ერთი მასშტაბური პროექტი, რომელიც დაიწყება ჩოხატაურში და შემდეგ გაგრძელდება ოზურგეთში.
კომპანიას საამისოდ საკმაოდ დიდი გამოცდილება და სათანადო რესურსი აქვს, როგორც კომპანიის დამფუძნებელი ჩვენთან საუბრისას აღნიშნავს, კომპანია "კახური ტრადიციული მეღვინეობა" (KTW) 2001 წელს დაარსდა. დღესდღეობით, "კახური ტრადიციული მეღვინეობა" ექსპორტს 15-მდე ქვეყანაში ახორციელებს. ბოლო წლებში კიდევ რამდენიმე მნიშვნელოვანი ბაზარი დაემატა.
შეგახსენებთ, რომ ktw ასევე ახორციელებს ინვეტიციას ოზურგეთის რაიონის სოფელ ასკანაში _ ღვინის მარნისა და ტურისტული კომპლექსის "Royal Askana" -ს მშენებლობას.
რაც შეეხება ხილის გადამამუშავებელი ქარხნის აშენების იდეა, რაც სულ მალე რეალობად იქცევა, ზურაბ ჩხაიძე-ასკანელის თქმით, ეს კეთდება გურულებისადმი დიდი პატივისცემისა და სიყვარულის ნიშნად:
ზურაბ ჩხაიძე-ასკანელი: "ჩემთვის, ყველაზე მნიშვნელოვანი ის არის, რომ ჩოხატაურის ხილის გადამამუშავებელ საწარმოში 50-მდე ადგილობრივი დასაქმდება, რაც ძალიან პრობლემატურია დღეს რეგიონებისთვის. აღსანიშნავია ისიც, რომ მინიმუმ 2000-მდე ოჯახი მიიღებს ეკონომიკურ სარგებელს. ამ საქმეში დიდი წვლილი შეიტანა ჩოხატაურის მაჟორიტარმა და ჩემმა მეგობარმა, დეპუტატმა ბატონმა თემურ ჭკუასელმა, რისთვისაც მადლობა მინდა გადავუხადო.
ახალი საწარმო ფერმერებისაგან სხვადასხვა სახეობის ხილის შესყიდვასა და გადამუშავებას უზრუნველყოფს. ქარხანაში მოხდება ასევე, ციტრუსის დახარისხება და შეფუთვაც. ჩვენ ასევე ინტენსიურად ჩავერთვებით იმაშიც, რომ ჩოხატაურში რაც შეიძლება მეტი ისეთი ჯიშის ხილი გაშენდეს, რომელიც ჩვენს მიერ მოთხოვნადი იქნება."
ზურაბ ჩხაიძე-ასკანელის თქმით, ქარხანა იქნება უახლესი, 2014 წლის ტექნოლოგიებით აღჭურვილი, რომლითაც საქართველო თამამად შეიძლება წარსდგეს ევროკავშირის ქვეყნების წინაშე, მით უმეტეს, მაშინ, როცა ჩვენ უკვე ხელი მოვაწერეთ ასოცირების ხელშეკრულებას: "საწარმოში იქნება თანამედროვე ტიპის ხილის შემნახავი მაცივრებიც. პროექტის განხორციელების მიზანია, რეგიონში მსგავსი საწარმოების შექმნა, უახლესი ტექნოლოგიური დანადგარებით აღჭურვა და მოსახლეობისთვის ხილის რეალიზაციის ხელშეწყობა".
რაც შეეხება ოზურგეთს, კომპანიის დამფუძნებლის თქმით, ანალოგიური პროექტის გახორციელება და ინვესტირება მომავალ წელს იგეგმება. ამისთვის მოსამზადებელი სამუშაოები უკვე ჩატარებულია და ტერიტორიაც შეძენილია:
" ზოგადად, KTW ჯგუფმა ვიცით, რა გვინდა და რა სახის პროდუქტი უნდა შევქმნათ სამომავლოდ. ჩვენ პროდუქციას რამდენიმე ქვეყანაში წარმატებულად ვყიდით. მთავარია ის, რომ ინვესტირების შიში გაქრა და ახლა იმაზე უნდა ვიზრუნოთ, რომ გურიისა და მთლიანად დასავლეთის რეგიონში რაც შეიძლება მეტი საწარმო შეიქმნას და ადგილობრივები დასაქმდნენ.
ნებისმიერ საქმეში, რაც არ უნდა წამოვიწყოთ, მთავარ პრინციპს _ "მხოლოდ უმაღლესი ხარისხის პროდუქცია!" _ ჩვენ არ ვღალატობთ. ასე გავაგრძელებთ მომავალშიც…" _ აცხადებს ზურაბ ჩხაიძე.
(R)
