საქართველოს დემოკრატიული განვითარების კავშირი, სოციალურ ქსელში ოზურგეთში ხვალ დაგეგმილ საკრებულოს სხდომასთან დაკავშირებით, სპეციალურ განცხადებას ავრცელებს. რომელსაც "გურია ნიუსი" უცვლელად გთავაზობთ.
"როგორც საზოგადოებისთვის ცნობილია, 2014 წლის 25 ივლისს ოზურგეთის მუნიციპალიტეტის ოფიციალურ ვებ-გვერდზე გამოქვეყნდა ინფორმაცია ოზურგეთის მუნიციპალიტეტისა და ქალაქ ოზურგეთის მუნიციპალიტეტის ახალარჩეულ საკრებულოთა მიერ, მიმდინარე წლის, 2 აგვისტოს გასამართი პირველი სხდომების შესახებ.
პირველი, რაც, ძალაუნებურად, ხვდება თვალს, ის გახლავთ, რომ ორივე მუნიციპალიტეტის საკრებულოს სხდომის დღის წესრიგი ერთმანეთის იდენტური და უჩვეულოდ გადატვირთულია – ორივე მათგანი 22 საკითხს შეიცავს.
საკრებულოს უფლებამოსილების ცნობისა და საკრებულოს თანამდებობის პირთა (საკრებულოს თავმჯდომარე, მისი მოადგილე, კომისიათა თავმჯდომარეები) არჩევის, საკრებულოს ფრაქციის დაფუძნების ცნობად მიღების გარდა, ორივე საკრებულოს პირველ სხდომაზე გამოტანილია და იგეგმება, ასევე, ძალზე მნიშვნელოვანი ნორმატიული აქტების მიღებაც. კერძოდ, საკრებულოს რეგლამენტის (დებულების), საკრებულოს ხუთივე კომისიის დებულებების, ოზურგეთის მუნიციპალიტეტის გამგეობისა და ქალაქ ოზურგეთის მუნიციპალიტეტის მერიის დებულებების, ორივე მუნიციპალიტეტის საკრებულოს აპარატისა და გამგეობის (მერიის) საშტატო ნუსხისა და თანამდებობრივი სარგოების დამტკიცება.
ამასთან, მიუხედავად იმისა, რომ ყველა ამ ნორმატიული აქტების მიმართ მაღალი საზოგადოებრივი ინტერესი არსებობს, არცერთი მათგანის პროექტი წინასწარი საჯარო განხილვისთვის არ გამოქვეყნებულა.
მიგვაჩნია, რომ ქალაქ ოზურგეთისა და ოზურგეთის მუნიციპალიტეტების საკრებულოთა პირველივე სხდომაზე, ნორმატიული აქტების (მით უმეტეს, ერთბაშად ამდენის) მიღება, ეწინააღმდეგება კანონმდებლობის სავალდებულო მოთხოვნებს შემდეგ გარემოებათა გამო: ჯერ ერთი, დავიწყოთ იმით, რომ საკრებულოს პირველ სხდომაზე დასამტკიცებლად გამოტანილი ნორმატიული აქტებიდან, მაგალითად, მუნიციპალიტეტის საკრებულოს რეგლამენტსა და კომისიის დებულებას საკრებულოს დასამტკიცებლად, როგორც წესი, მუნიციპალიტეტის საკრებულოს თავმჯდომარე წარუდგენს. ეს უკანასკნელი კი ჯერ არჩეული არ არის და, შესაბამისად, უცნობია, თუ ვის მოუწევს ხსენებული ნორმატიული აქტების პროექტების მომზადებასა და წარდგენაზე პასუხისმგებლობის აღება. სხვა თუ არაფერი, უშუალოდ 2 აგვისტოს სხდომამდე სულაც უცნობი რჩება საკრებულოს სხდომაზე საკითხის ინიცირების უფლების მქონე და, შესაბამისად, მომხსენებლად გამოსასვლელი კომპეტენტური თანამდებობის პირის ვინაობა. ამასთან, მიუხედავად იმისა, რომ მავანს შეიძლება წინასწარ ჰქონდეს "გარკვეული" "რაღაც-რაღაცეები" საკრებულოს თავმჯდომარეობასთან მიმართებაში, საინტერესოა რა მოხდება მაშინ, თუკი საკრებულომ თავმჯდომარე ვერ აირჩია (რისი ალბათობაც, შესაძლოა, მცირეა, მაგრამ გამორიცხული არაა, თუნდაც იდეის დონეზე მაინც), ან ამ თანამდებობაზე სულაც სხვა პირი აირჩია.
მოკლედ, საკრებულოს პირველ სხდომაზე დასამტკიცებლად ხსენებული ნორმატიული აქტების გამოტანა (მსუბუქად რომ ვთქვათ) მიზანშეუწონელი და გაუმართლებელია;
მეორე, საკრებულოს მიერ ნორმატიული აქტის მიღება სულაც არ არის ასეთი მარტივი პროცესი – მას კანონმდებლობით ცალსახად და არაორაზროვნად გაწერილი სავალდებულო წესებისა და პროცედურების გავლა (დაცვა) ესაჭიროება. "ნორმატიული აქტების შესახებ" საქართველოს კანონის თანახმად, საკრებულოს, როგორც კოლეგიური ორგანოს, ნორმატიული აქტის (ანუ საკრებულოს დადგენილების) მომზადებისა და მიღების მიმართ გამოიყენება საქართველოს ზოგადი ადმინისტრაციული კოდექსის VII თავით გათვალისწინებული ადმინისტრაციული წარმოება (იხ. მუხ. 1, პუნ. 3 და 4). ეს კი, ფაქტიურად, იმას ნიშნავს, რომ საკრებულომ თავისი ნორმატიული ადმინისტრაციულ-სამართლებრივი აქტის – დადგენილების მომზადება-მიღების პროცესში აუცილებლად უნდა დაიცვას ზოგადი ადმინისტრაციული კოდექსით (შემდეგში – "ზაკ") გათვალისწინებული შემდეგი მნიშვნელოვანი სავალდებულო მოთხოვნები:
1) საკრებულოს დადგენილების მისაღებად ადმინისტრაციული წარმოება უნდა დაიწყოს საკრებულოს მიერ შესაბამისი ინდივიდუალური ადმინისტრაციულ-სამართლებრივი აქტის – საკრებულოს განკარგულების გამოცემით (იხ. ზაკ, მუხ. 1061, ნაწ. 1-2); ე.ი. წერილობითი ფორმით უნდა გამოიცეს საკრებულოს განკარგულება საკრებულოს შესაბამისი ნორმატიული ადმინისტრაციულ-სამართლებრივი აქტის (საკრებულოს დადგენილების) მისაღებად ადმინისტრაციული წარმოების დაწყების თაობაზე. ამასთან, თუ კანონით ან მის საფუძველზე გამოცემული კანონქვემდებარე აქტით სხვა რამ არაა დადგენილი, საკრებულოს ნორმატიული აქტის მომზადებისა და მიღების ვადა განისაზღვრება სწორედ საკრებულოს ამ განკარგულებით (იხ. ზაკ, მუხ. 1065);
2) საკრებულოს ნორმატიული აქტის (დადგენილების) პროექტი უნდა გამოქვეყნდეს საქართველოს ზოგადი ადმინისტრაციული კოდექსის 55-56-ე მუხლებით გათვალისწინებული წესების შესაბამისად ან საკრებულოს, როგორც კოლეგიური ადმინისტრაციული ორგანოს, ვებ-გვერდზე (იხ. ზაკ, მუხ. 1062, ნაწ. 1);
3) საკრებულოს ნორმატიული აქტის პროექტთან ერთად აუცილებლად უნდა გამოქვეყნდეს ასევე ცნობა ადმინისტრაციული წარმოების შესახებ, რომელშიც აღინიშნება: ა) კოლეგიური ადმინისტრაციული ორგანოს (მოცემულ შემთხვევაში – საკრებულოს) დასახელება, რომელშიც მიმდინარეობს ადმინისტრაციული წარმოება; ბ) ნორმატიული ადმინისტრაციულ-სამართლებრივი აქტის მიღების ვადა; გ) იმ კოლეგიური ადმინისტრაციული ორგანოს მისამართი, რომელშიც შესაძლებელია მოსაზრებების წარდგენა; დ) მოსაზრებების წარდგენის ვადა (იხ. ზაკ, მუხ. 1062, ნაწ. 2-3).
4) ამის შემდეგ მოსაზრებების წარსადგენად განსაზღვრული ვადის განმავლობაში ნებისმიერ დაინტერესებულ პირს უფლება აქვს წარადგინოს საკუთარი მოსაზრება საკრებულოს დადგენილების პროექტთან დაკავშირებით (იხ. ზაკ, მუხ. 1064). იმის გათვალისწინებით, რომ, ზოგადი ადმინისტრაციული კოდექსის 103-ე მუხლის 11 ნაწილის შესაბამისად, საკრებულოს, როგორც კოლეგიური ადმინისტრაციული ორგანოს, მიერ ნორმატიული ადმინისტრაციულ-სამართლებრივი აქტის მიღებისას გამოიყენება საჯარო ადმინისტრაციული წარმოებისათვის დადგენილი წესები, დაინტერესებული პირის მიერ თავისი წერილობითი მოსაზრების წარდგენის ვადა შეადგენს 20 დღეს საკრებულოს დადგენილების პროექტის ან/და ადმინისტრაციული წარმოების შესახებ ცნობის გამოქვეყნების დღიდან (იხ. ზაკ, მუხ. 118, ნაწ. 1).
მხოლოდ კანონით განსაზღვრული ამ სავალდებულო მოთხოვნების დაცვის შემდეგ შეუძლია საკრებულოს თავის სხდომაზე განიხილოს და მიიღოს შესაბამისი ნორმატიული აქტი (საკრებულოს დადგენილება). წინააღმდეგ შემთხვევაში ეჭვქვეშ დგება თავად ნორმატიული აქტის იურიდიული ძალის საკითხი, რამეთუ "ნორმატიული აქტების შესახებ" კანონის მოთხოვნათა დარღვევით მიღებულ ნორმატიულ აქტს იურიდიული ძალა არა აქვს (იხ. ხსენებული კანონი, მუხ. 25, პუნ. 9), ხოლო ადმინისტრაციულ-სამართლებრივი აქტის მიღება კანონით გათვალისწინებული ადმინისტრაციული წარმოების სახისა და წესების დარღვევით სულაც ასეთი აქტის ბათილობას იწვევს (იხ. ზაკ, მუხ. 601, ნაწ. 1 და 2).
სავარაუდოდ, ქალაქ ოზურგეთისა და ოზურგეთის მუნიციპალიტეტების ახალარჩეულ საკრებულოთა პირველ სხდომებზე ზემოაღნიშნული ნორმატიული აქტების მიღების დასაბუთებისას მავანნი და მავანნი "გადაუდებელი აუცილებლობის" მომენტზე დაიწყებენ აპელირებას, თუმცა ასეთი მსჯელობა ყოველგვარ საფუძველს მოკლებული იქნება. სხვა თუ არაფერი, საქართველოს ზოგადი ადმინისტრაციული კოდექსი კოლეგიური ადმინისტრაციული ორგანოს მიერ ნორმატიული აქტის მისაღებად ადმინისტრაციულ წარმოებასთან მიმართებაში "გადაუდებელი აუცილებლობის" ცნების გამოყენებას არ ითვალისწინებს;
ამასთან, თუ ხსენებული ნორმატიული აქტები საკრებულოს პირველივე სხდომაზე არ იქნება მიღებული (დამტკიცებული), ამით არც კანონმდებლობა დაირღვევა და არც ისეთი სიტუაცია შეიქმნება, რაც დემოკრატიულ საზოგადოებაში რეალურ საფრთხეს შეუქმნის ადგილობრივი მუნიციპალური დაწესებულებების ფუნქციონირებას. საქმე ისაა, რომ ახალშექმნილი მუნიციპალიტეტების ახალარჩეული ორგანოების მიერ შესაბამისი ნორმატიული აქტების მიღებამდე (ანუ გარდამავალ პერიოდში) ამ მუნიციპალიტეტების ადმინისტრაციულ ტერიტორიებზე მოქმედებს იმ თვითმმართველი ერთეულის ადმინისტრაციულ-სამართლებრივი აქტები, რომლის გაყოფის შედეგადაც შეიქმნა ეს ახალი მუნიციპალიტეტები (იხ. საქართველოს ორგანული კანონი "ადგილობრივი თვითმმართველობის კოდექსი", მუხ. 161).
აღნიშნულის გათვალისწინებით, ქალაქ ოზურგეთისა და ოზურგეთის მუნიციპალიტეტთა საკრებულოების მიერ კანონმდებლობის მოთხოვნათა შესაბამისად ახალი აქტების მიღებამდე ძალაშია და მოქმედებს ოზურგეთის მუნიციპალიტეტის 2010-2014 წლების მოწვევის საკრებულოს მიერ მიღებული სათანადო ნორმატიული აქტები (მაგალითად, საკრებულოს დებულება, კომისიათა დებულებები).
ხოლო ,რაც შეეხება თანამდებობრივი სარგოების დამტკიცების საკითხს (ალბათ, ბევრს ეს საკითხი, საკრებულოს თანამდებობებზე არჩევასთან ერთად, ყველაზე მეტად აღელვებს), პრობლემას არც ეს წარმოადგენს, რამეთუ თავისუფლად შეიძლება ახალარჩეული საკრებულოს მიერ შესაბამისი დადგენილების მოგვიანებით (კანონმდებლობის სავალდებულო მოთხოვნათა სრული დაცვით) მიღება და ამ დადგენილების უკუძალის (უკუმოქმედებითი ძალის) გავრცელება აღნიშნულ სფეროში 2014 წლის 2 აგვისტოდან წარმოშობილ ურთიერთობებზე. ასე რომ, არც ხელფასების მიღების მხრივ შეექმნება ვინმეს რაიმე პრობლემები.
ყოველივე ზემოაღნიშნულიდან გამომდინარე, მივმართავთ ქალაქ ოზურგეთის მუნიციპალიტეტისა და ოზურგეთის მუნიციპალიტეტის ახალარჩეულ საკრებულოებს: პირველივე სხდომიდან, კანონდარღვევების ხარჯზე, ნუ დაიწყებენ თავიანთ ფუნქციონირებას, თავიდანვე ნუ გაუკეთებენ იგნორირებას კანონის უზენაესობის პრინციპს;
საკრებულოს ზემოხსენებული დადგენილებების პროექტთა მომზადების, წარდგენის, განხილვისა და დამტკიცების (მიღების) მიმართ სრულად დაიცვან კანონმდებლობით დადგენილი ადმინისტრაციული წარმოების სავალდებულო წესები და პროცედურები და ჩვენც, საზოგადოების რიგით წევრებსაც, მოგვცენ შესაძლებლობა, სრულყოფილად ჩავერთოთ ამ (და არა მარტო ამ!) მნიშვნელოვანი ნორმატიული აქტების განხილვის პროცესში და წარვადგინოთ ჩვენი მოსაზრებები, შენიშვნები თუ რეკომენდაციები მათთან დაკავშირებით, მით უმეტეს, რომ, მაგალითად, სწორედ საკრებულოს რეგლამენტით (დებულებით) ხდება ისეთი მნიშვნელოვანი და ყველასათვის საინტერესო საკითხების რეგულირება, როგორიცაა ამომრჩევლებთან საკრებულოსა და მისი წევრების ურთიერთობის, ასევე ადგილობრივი თვითმმართველობის განხორციელების პროცესში მოქალაქეთა მონაწილეობის მნიშვნელოვანი ფორმების პროცედურული თვალსაზრისით გაწერა და კონკრეტიზაცია (დეტალიზაცია).
დაგვერწმუნეთ, რომ "პარტიზანული წესით" "იატაკქვეშეთში" მომზადებული და ნაუცბათევად მიღებული საკრებულოს დადგენილებები სასიკეთოდ არც საზოგადოებას წაადგება და არც თავად საკრებულოს."
