პრემიერ-მინისტრი, დღეს, პედაგოგებს შეხვდა და განათლების სფეროში მიმდინარე რეფორმები და სიახლეები გააცნო.
ირაკლი ღარიბაშვილმა კონფერენციაზე – "მასწავლებელთა მომზადება, პროფესიული განვითარება და კარიერული ზრდა" – აღნიშნა, რომ 2015 წელს დამატებით გამოიყოფა ფინანსური რესურსები და მასწავლებლის სახელფასო პოლიტიკის მოწესრიგება დაიწყება. შესაბამისად, მომდევნო წლებში მასწავლებლის ხელფასები გაიზრდება.
პრემიერმა განათლების ხელმისაწვდომობის კუთხით მიღწეულ შედეგებზეც ისაუბრა. მისი ინფორმაციით, განხორციელებული რეფორმების შედეგად 60 – პროცენტით შემცირდა ოჯახის წლიური დანახარჯი ზოგად განათლებაზე; შენდება ახალი სკოლები, გარემონტდა 1000-ზე მეტი სკოლა, სოფლებში 50- ათასზე მეტ სკოლის მოსწავლეს ემსახურება ტრანსპორტი; საჯარო სკოლებში დაინერგა ისეთი სპეციალური სერვისები, როგორიცაა ფსიქოლოგის, სპეციალური მასწავლებლისა და ახლა უკვე ექიმის მომსახურება; ხელმისაწვდომი გახდა ინკლუზიური განათლება.
ხელფასების მატებას დადებითად აფასებენ თავად პედაგოგები. როგორც თბილისის კლასიკური გიმნაზიის მასწავლებელი ქეთი იმერლიშვილი ამბობს, გაზრდილი ხელფასი პედაგოგებისთვის დიდი სტიმული იქნება.
"მასწავლებლებისთვის ხელფასის მომატება ძალიან კარგია. უფრო ნაყოფიერად იმუშავებენ ბავშვებთან. მე ვარ ე.წ. "ათასლარიანი" მასწავლებელი. სამწუხაროდ, არ ვიცი, იმ პედაგოგებთან, რომლებსაც არ აქვთ სერთიფიკატები, რა მდგომარეობაა, მაგრამ ვიცი, რომ ჩემი ხელფასი აუცილებლად შემინარჩუნდება. დანარჩენ დეტალებს, ალბათ, ახალი დირექტორი გაგვაცნობს", _ ამბობს ქეთი იმერლიშვილი.
კლასიკური გიმნაზიის პედაგოგი განათლების სისტემაში მიმდინარე სხვა რეფორმებსაც ეხმაურება:
"მესმის, რომ ყველა რეფორმა, რომელიც განათლებისა და მეცნიერების სამინისტროდან მოდის, მიზნად ისახავს არსებული სიტუაციის გაუმჯობესებას. კერძოდ, სკოლებში თანამედროვე მეთოდებით სწავლების და მიდგომების დანერგვას, პროფესიონალი პედაგოგების ჯგუფის არსებობას და შესაბამისად, მოსწავლეებში განათლების დონის ამაღლებას.
თუმცა, ბოლო დროს ჩატარებულ კვლევებს თუ დავეყრდნობით, პედაგოგობა საკმაოდ არაპრესტიჟულად იქცა, რის გამოც ახალგაზრდა კადრის შემოდინება ამ პროფესიაში, საგრძნობლად შემცირდა. ძალიან ცოტაა, 20-დან 40 წლამდე მასწავლებელთა რიცხვი, 40 წელს გადაცილებული მასწავლებლებთან შედარებით. შესაბამისად, ბუნებრივიც არის, რომ თანამედროვე მეთოდებითა და მიდგომებით სწავლება ისეთი ხარისხით ვერ იარსებებს, როგორც უნდა იყოს. ჩემი აზრით, მასწავლებლის სტატუსის საზოგადოებაში ამაღლება უნდა მოხდეს და ხელფასების მატება, ამ მხრივ, ერთ-ერთი წინგადადგმული ნაბჯია", _ აღნიშნავს ქეთი იმერლიშვილი.
პედაგოგი ნინო გორგოძე განათლების სფეროში მიმდინარე რეფორმებიდან "სკოლის ბაზაზე მასწავლებელთა პროფესიული განვითარების'' ტრენინგებს გამოჰყოფს და ამბობს, რომ სწავლების ამ ფორმამ მართლაც აამაღლა მასწავლებელთა პროფესიონალიზმი , თუმცა ნინო ყურადღებას პედაგოგთა მიმართ არაჯანსაღ დამოკიდებულებაზე ამახვილებს:
"ის სქემა, რომელზეც პრემიერი საუბრობს, არანორმალურ შრომას მოითხოვს, რაც იმას ნიშნავს, რომ პედაგოგს სახლში, კერძო მუშაობისთვის დრო აღარ რჩება. 300-400 ლარით კი არათუ ოჯახის, არამედ საკუთარი თავის გატანაც შეუძლებელია. სკოლა თვითონვე გააუფასურეს. ვითომ საატესტატო გამოცდებზე წერა-კითხვის უცოდინარი ბავშვები გადიან და ქულები გამოაქვთ. რა პრინციპით აფასებენ, გაურკვეველია. მერე მასხრად გვიგდებენ პედაგოგებს – აი, თუ არ ჩავაბარეთო", _ აღნიშნავს ნინო გორგოძე.
რაც შეეხებათ მშობლებს, განათლების სფეროში განხორციელებული ნაბიჯებიდან ყველაზე მეტად სახელმძღვანელოების მოსწავლეებისთვის უფასოდ დარიგება მოსწონთ, თუმცა არც პრობლემებზე საუბარს ერიდებიან:
"დიდი შეღავათი იყო, წიგნების უფასოდ დარიგება მოსწავლეებისთვის. 200 ლარი მაინც გვეხარჯებოდა სასკოლო წიგნების შეძენისთვის. ვისაც 2 და 3 შვილი ჰყავს, განსაკუთრებით მათთვისაა კარგი. თუმცა, ამ ეტაპზე, მე ძალიან მაღელვებს, ჩვენი სკოლის უკიდურესი მდგომარეობა. 61-ე საჯარო სკოლაში დადის ჩემი შვილი, დოლიძეზე, რომელიც რემონტდება, მაგრამ ანგრევენ და რა გვეშველება, ბავშვები სად ისწავლიან, არ ვიცი. ნამდვილად არ მომწონს სკოლებში სწავლის დონე. ძალიან დიდ თანხას ვხარჯავ რეპეტიტორებთან ბავშვის მომზადებაში. ესეც არაა საკმარისი და დამატებით კიდევ რამდენიმე საგანში უნდა მოვამზადო. კარგი იქნება, ამ მხრივ სიტუაცია თუ გამოსწორდება", _ ამბობს მარიამ გოგოლაშვილი.
