გურიის გუბერნატორმა გიორგი ჩხაიძემ მედიის წარმომადგენლებს გუბერნიაში ჩატარებული კონკურსის შედეგები გააცნო და თანამდებობებზე დანიშნული საჯარო მოხელეები წარუდგინა.
გიორგი ჩხაიძე გუბერნიაში ჩატარებული კონკურსით კმაყოფილია. მისი განცხადებით, კონკურსში გამარჯვებული პირები თავიანთი გონებით და ცოდნით მოხვდნენ აღნიშნულ თანამდებობებზე და არცერთი მათგანის არანაირი ლობირება არ ყოფილა.
"შემოსული განცხადებების განხილვის შედეგად, კონკურსის პირველი ეტაპი გადალახა 174-მა აპლიკანტმა, მეორე ეტაპი 28 ვაკანსიიდან წარმატებით გაიარა 23-მა აპლიკანტმა. ეს ის ადამიანები არიან, რომლებმაც საუკეთესო შედეგები აჩვენეს", _ აღნიშნა ჩხაიძემ პრესკონფერენციაზე.
მისივე თქმით, დანარჩენი ხუთი ვაკანსია კვლავ ღიად რჩება.
_ "5 ვაკანსია ვერ დააკმაყოფილა ვერცერთმა კონკურსანტმა, აქედან გამომდინარე, კონკურსი ხელმეორედ გამოცხადდება. ვფიქრობ, რომ ამიერიდან გუბერნია იმუშავებს უფრო ეფექტურად, რადგან ამ დრომდე, არ იყო სრულყოფილად დაკომპლექტებული", _ განაცხადა გუბერნატორმა.
გიორგი ჩხაიძემ, ახალი თანამშრომლების წარდგენის შემდეგ, "გურია ნიუსის" კითხვებს უპასუხა.
_ ბატონო გიორგი, რომელ ვაკანსიაზე შემოვიდა უფრო მეტი განცხადება?
_ შემოსული განცხადებების რაოდენობა 200-ს აღემატებოდა, თუმცა, საკონკურსოდ შეირჩა _ 174. აქედან, კონკურსის პირველ ეტაპზე 99 ადამიანი გამოცხადდა. მეორე ეტაპზე კი, ჩემდა სამწუხაროდ, 75 მათგანი არ მოვიდა. ვფიქრობ, ამის მიზეზი ის გახდა, რომ მათ გასაუბრება ადვილი ეგონათ. რამდენიმე კონკურსანტმა გააჟღერა კიდეც, რომ გასაუბრება სხვანაირი ეგონათ და მიაჩნდათ, რომ უფრო ადვილად გადალახავდნენ საფეხურებს. ხშირ შემთხვევაში, ბრალსაც გვდებდნენ, რომ ძალიან ბევრ შეკითხვას ვსვამდით და ასე შემდეგ.
_ რამდენიმე კონკურსანტი ჩვენთან საუბრისას ამბობს, რომ გასაუბრება უფრო მეტად ზეპირ გამოცდას ჰგავდა.
_ მოთხოვნაში იყო იმ კანონების ჩამონათვალი, რომელიც საჯარო მოსამსახურემ უნდა იცოდეს. თუ არ დავუსვამდით შეკითხვას კანონებთან მიმართებაში, ისე როგორ გაარკვევდით, იცისბთუ არა იმ ადამიანმა კანონები, რომლის ცოდნაც სავალდებულოა. აპლიკანტების წარსულ საქმიანობაზე საუბარი არ გვქონია. შესაძლოა, ბევრს ჰქონდა ამაზე საუბრის სურვილი, რადგან უმეტესობას ჰქონდა საკმაოდ დიდი გამოცდილება, მაგრამ პირველხარისხოვანი იმ კანონების ცოდნა იყო, რომელსაც კონკურსი ითვალისიწნებდა.
_ შეიძლებოდა თუ არა კითხვები წინასწარ ყოფილიყო შეთანხმებული ამა თუ იმ აპლიკანტთან?
_ კითხვარი არ დამზადებულა გუბერნიაში, არ დაუმზადებია კონკურსის წევრებს, ეს კითხვარი შეუკვეთა გუბერნიამ, რომელიც დალუქული ჩამოვიდა და მხოლოდ კონკურსის დღეს გაიხსნა.
_ რამდენ ადამიანს მოუწია სამსახურის დატოვება?
_ გუბერნიის დატოვება რამდენიმე ადამიანს მოუწია. სამწუხაროდ, ისინი იყვნენ ნაკლებად მომზადებულები. თუმცა, დრო ჰქონდათ საკმარისზე მეტი, რომ ყოფილიყვნენ უკეთესები. იყო ისეთი მომენტი, რომ გუბერნიაში დასაქმებულს სულ სხვა პირმა აჯობა, უკეთესად უპასუხა. შერჩევის მომენტში ხდებოდა შეფასება, იყო ბევრი კრიტერიუმი, _ გვითხრა ჩხაიძემ.
კონკურსში გამარჯვებული პირების ჩამონათვალი კი ასეთია:
აპარატის უფროსის თანამდებობაზე ნინო შეყილაძე დაინიშნა; აპარატის უფროსის მოადგილის _ ქეთი მოისწრაფეშვილი; მთავარი სპეციალისტის _ ნინო ლომჯარია; უფროსი სპეციალისტის _ სოფიო სალუქვაძე; უფროსი სპეციალისტის _ მაკა კვირკველია; სპეციალისტის _ თენგიზ ტოტოჩავა.
ადგილობრივი თვითმმართველობის ორგანოებთან ურთიერთობის სამსახური: სამსახურის უფროსის მოადგილის თანამდებობაზე მერაბ ჩხაიძე იმუშავებს; მთავარი სპეციალისტის _ ეკა გუჯაბიძე; მთავარი სპეციალისტის _ ლევან შახოვი; უფროსი სპეციალისტის _ მარიამ დიდმანიძე; უფროსი სპეციალისტის _ ნინო გიგინეიშვილი; უფროსი სპეციალისტის _ ვიქტორ ბერუჩაშვილი; უფროსი სპეციალისტის _ ნათია თოხაძე.
რეგიონული პროექტების კოორდინირების სამსახური: სამსახურის უფროსის ვაკანსიაზე ანა ჩუბინიძე; სამსახურის უფროსის მოადგილის _ კახაბერ ტოტოჩავა; მთავარი სპეციალისტის _ ვახტანგ გველებიანი; მთავარი სპეციალისტის _ ლია ღლონტი; უფროსი სპეციალისტის _ ნინო ვადაჭკორია; უფროსი სპეციალისტის _ ლაშა ღლონტი; სპეციალისტის _ ნანა ვარდოშვილი. საგანგებო სიტუაციების მართვის სამსახურის უფროსის მოადგილის _ ვლადიმერ მიქატაძე; სპეციალისტის ვაკანსიაზე _ სერგო ზაქარიაძე; მდივან-რეფერენტის ვაკანსიაზე ინგა სალუქვაძე დაინიშნა.
