2014 წლის 10 სექტემბერს საქართველოს რეგიონული განვითარებისა და ინფრასტრუქტურის სამინისტროსთან შეთანხმებით, მიღებულ იქნა "ადგილობრივი თვითმმართველობის მოხელის ვაკანტური თანამდებობის დასაკავებლად გამოცხადებული კონკურსისა და ადგილობრივი თვითმმართველობის მოხელის ატესტაციის ტესტირების ეტაპების ჩატარების მეთოდიკის, თემატიკისა და შეფასების კრიტერიუმების დამტკიცების შესახებ" სსიპ საჯარო სამსახურის ბიუროს უფროსის 2014 წლის 10 სექტემბრის N73/სა ბრძანება.
ბრძანების თანახმად, ტესტირების მეთოდიკით განისაზღვრება ტესტის შედგენისა და ტესტირების ჩატარების პროცედურები.
ტესტი შედგება ორი ნაწილისაგან: ტესტის პირველი ნაწილი მიმართულია მონაწილის ცოდნის შესაფასებლად, ხოლო მეორე ნაწილი ემსახურება უნარ-ჩვევების დადგენას.
ტესტი შედგება ტესტური დავალებებისგან. ტესტური დავალება შედგება პირობისა და ოთხი სავარაუდო პასუხისგან, რომელთაგან მხოლოდ ერთია სწორი პასუხი. ცოდნის შეფასების ტესტები დგება ტესტირების თემატიკიდან გამომდინარე. ტესტირებაში მონაწილე პირის ამოცანაა თითოეულ ტესტური დავალების ოთხი სავარაუდო პასუხიდან გამოიცნოს სწორი პასუხი. სწორი პასუხი ფასდება 1 ქულით. არასწორი პასუხი ფასდება 0 ქულით.
ტესტზე პასუხის გასაცემად ტესტირების მონაწილეს ეძლევა 2 ასტრონომიული საათი. ტესტირებისათვის გამოყოფილი დროის ათვლა იწყება ტესტირების ინსტრუქტაჟის დამთავრებიდან. ტესტების დროის ამოწურვისას, მონაწილე აფიქსირებს ტესტზე მუშაობის დასრულებას. თუ მონაწილე ტესტირებისთვის გამოყოფილი დროის განმავლობაში ვერ მოასწრებს ყველა დავალებაზე პასუხის დაფიქსირებას, ტესტური დავალება შეფასდება მის მიერ გაცემული პასუხების რაოდენობის მიხედვით. პასუხგაუცემელი ტესტი შეფასდება 0 ქულით. ტესტირების დროის ამოწურვის შესახებ მონაწილეები მიიღებენ ორ გაფრთხილებას: ტესტირების დროის დამთავრებამდე 30 წუთით ადრე და 15 წუთით ადრე.
ტესტირება ტარდება ქართულ ენაზე, ხოლო ეთნიკური უმცირესობებით დასახლებული მუნიციპალიტეტების თხოვნით, ტესტი შედგენილ უნდა იქნას ორ ენაზე – ქართულად და ეთნიკური უმცირესობის ენაზე.
ტესტირების თემატიკის შესაბამისად ტესტების მომზადებას უზრუნველყოფს საქართველოს მთავრობის განკარგულებით განსაზღვრული დაწესებულება (შემდგომ -დაწესებულება).
ტესტებზე პასუხის გაცემის დაწყებამდე დაწესებულების უფლებამოსილი პირი ტესტირების მონაწილეებს უტარებს ინსტრუქტაჟს, დაწესებულების მიერ განსაზღვრული ტესტირების ინსტრუქციის შესაბამისად.
. ტესტირების დღეს ტესტირების მონაწილე უნდა გამოცხადდეს ტესტირების ჩატარების ადგილზე ტესტირების დაწყებამდე 1 საათით ადრე, დაწესებულების მიერ მონაწილისთვის დადგენილ დროს.
ტესტირების დაწყებამდე 1 საათის განმავლობაში, დაწესებულების მიერ დადგენილ დროს, ხდება მონაწილეთა რეგისტრაცია სპეციალურ ჟურნალში ხელმოწერით. ტესტირების დაწყებისას იხურება შენობის შესასვლელი და დაგვიანებული პირი (პირი რომელმაც განსაზღვრულ დროში ვერ გაიარა რეგისტრაცია) ტესტირებაზე არ დაიშვება.
ტესტირებაზე გამოუცხადებლობის ან დაგვიანების შემთხვევაში, მიუხედავად გამოუცხადებლობის/დაგვიანების მიზეზისა (საპატიოა თუ არასაპატიო) მონაწილე ფასდება 0 ქულით.
ტესტირების დარბაზში დაიშვებიან ტესტირების მონაწილეები, საქართველოს მთავრობის მიერ განსაზღვრული ტესტირების ეტაპის განმახორციელებელი დაწესებულების წარმომადგენელი, (მათ შორის ამავე დაწესებულებების დამკვირვებელი), აგრეთვე სსიპ საჯარო სამსახურის ბიუროს, საქართველოს რეგიონული განვითარებისა და ინფრასტრუქტურის სამინისტროს, სსიპ „ვანო ხუხუნაიშვილის სახელობის ეფექტიანი მმართველობის სისტემის და ტერიტორიული მოწყობის რეფორმის ცენტრის წარმომადგენლები).
ტესტირება ტარდება ელექტრონულად, სპეციალური კომპიუტერული პროგრამის გამოყენებით. პროგრამაში შესაბამისი ველების შევსების შემდეგ, პროგრამა მონაწილეს შემთხვევითი შერჩევის საფუძველზე აძლევს ტესტურ დავალებებს, სადაც მან ოთხი სავარაუდო პასუხიდან უნდა აირჩიოს ერთ-ერთი. თუ ტესტირების მიმდინარეობისას, მონაწილეს ტექნიკური პრობლემის გამო, გარკვეული დროის განმავლობაში ხელი ეშლება ტესტზე მუშაობაში, მას მიეცემა დამატებითი დრო ტესტის დასასრულებლად.
ტესტირების მიმდინარეობისას, ტესტირების მონაწილეს უფლება აქვს გააპროტესტოს დაწესებულების უფლებამოსილი პირის მოქმედება. მონაწილის საჩივარს დაუყოვნებლივ იხილავს საჩივრების განხილვაზე უფლებამოსილი პირი. საჩივართან დაკავშირებით გადაწყვეტილება მიიღება ერთპიროვნულად.
ტესტზე მუშაობის დასრულების შემდეგ, პროგრამა ავტომატურად ითვლის სწორი და არასწორი პასუხების რაოდენობას.
დაწესებულების უფლებამოსილი პირი სპეციალურ უწყისში აღნიშნავს ტესტირების მონაწილის მიერ მიღებულ ქულათა რაოდენობას, რასაც მონაწილე ადასტურებს ხელმოწერით.
ადგილობრივი თვითმმართველობის მოხელის ვაკანტური თანამდებობის დასაკავებლად გამოცხადებულ კონკურსის ტესტირების ეტაპის მონაწილის შედეგი ძალაშია 2015 წლის 1 ივლისამდე.
ტესტის სისწორეზე პასუხისმგებელი დაწესებულებაა. ტესტირების შედეგების გასაჩივრების მიზნით, დაწესებულებაში იქმნება საპრეტენზიო კომისია, რომელიც შესაბამისი ტესტირების პროცესის დასრულებიდან (ტესტირების ჩატარების დღიდან)3 კალენდარული დღის ვადაში განიხილავს საჩივრებს და იღებს გადაწყვეტილებებს. საჩივარი ტესტირებაში მონაწილე პირმა საპრეტენზიო კომისიას უნდა წარუდგინოს შესაბამისი ტესტირების ჩატარების დღიდან ერთი კალენდარული დღის ვადაში. საპრეტენზიო კომისია მიღებულ გადაწყვეტილებებს დაუყოვნებლივ აწვდის შესაბამისი მუნიციპალიტეტის საკონკურსო-საატესტაციო კომისიას.
ტესტის შეფასება ხდება ქულათა სისტემით. მაქსიმალური ქულაა 60.
ტესტი მოიცავს 45 ტესტურ დავალებას საქართველოს კანონმდებლობიდან და ზემოთ აღნიშნული ბრძანებით გათვალისწინებული თემატიკის შესაბამისად და 15 ტესტურ დავალებას უნარ-ჩვევების ნაწილიდან.
ტესტირების ეტაპის მინიმალურ გამსვლელ ზღვარს ადგენს შესაბამისი მუნიციპალიტეტი, სწორი პასუხების მინუმუმ 50%, მაქსიმუმ 75% – ის ფარგლებში.
