საქართველოს უმაღლეს სასწავლებლებში, ბაკალავრიატის საფეხურზე და საჯარო სკოლებში სასწავლო პროცესი დაიწყო.
ახალი სასწავლო წლის დაწყება საქართველოს მთავრობის მეთაურმა, ირაკლი ღარიბაშვილმა და საქართველოს განათლებისა და მეცნიერების მინისტრმა თამარ სანიკიძემ 133-ე სკოლის აღსაზრდელებსა და პედაგოგებს მიულოცეს. პრემიერის განცხადებით, სასიხარულოა, რომ მოსწავლეებს სასწავლო წლის დაწყება განახლებულ სკოლაში უწევთ.
"მე დღეს თქვენთან მოვედი იმიტომ, რომ მოგილოცოთ ახალი სასწავლო წლის დაწყება ამ მშვენიერ, განახლებულ სკოლაში! ვულოცავ თითოეულ მოსწავლეს! ვულოცავ პედაგოგებს! განსაკუთრებით ვულოცავ ამ დღეს პირველკლასელებს! მინდა, ყველას გისურვოთ წარმატებები! გისურვებთ, რომ აქ, ამ სკოლაში გატარებული წლები ყოფილიყოს გამორჩეულად საინტერესო პერიოდი თქვენს ცხოვრებაში. პედაგოგების როლი ბავშვის აღზრდასა და ჩამოყალიბებაში ძალიან მნიშვნელოვანია. ჩვენ გავაკეთებთ ყველაფერს, რომ პედაგოგის პროფესია გახდეს ღირსეული და დაფასებული, რათა მათ აღზარდონ ღირსეული თაობა,"-განაცხადა ირაკლი ღარიბაშვილმა.
ახალი სასწავლო წლის დაწყება სტუდენტებს, თბილისის ივანე ჯავახიშვილის სახელობის სახელმწიფო უნივერსიტეტში, რექტორმა ვლადიმერ პაპავამ, დედაქალაქის მერმა დავით ნარმანიამ, ფაკულტეტების დეკანებმა, განათლებისა და მეცნიერების მინისტრის მოადგილემ გიორგი შარვაშიძემ მიულოცეს.
"ძვირფასო ახალგაზრდებო, გილოცავთ, ახალი სასწავლო წლის დაწყებას. ბევრი თქვენგანი ჩვენს ქვეყანაში ყველაზე უძველესი უნივერსიტეტის, თსუს სტუდენტი გახდა. ჩვენ ვიღებთ ვალდებულებას, თქვენი არჩევანი გავამართლოთ, რომ 4 წლის განმავლობაში აქ მიიღოთ ადეკვატური განათლება და რაც მთავარია, სტუდენტური ცხოვრება იყოს შინაარსიანი და საინტერესო", _ აღნიშნა ვლადიმერ პაპავამ.
თბილისის მერმა დავით ნარმანიამ ის დღე გაიხსენა, როდესაც თავადაც თბილისის სახელმწიფო უნივერსიტეტის სტუდენტი გახდა:
"გერქვას უნივერსიტეტელი და სწავლობდე თბილისის სახელმწიფო უნივერსიტეტში, ერთის მხრივ, განსაკუთრებული პასუხისმგებლობაა, მეორეს მხრივ, ტვირთი, რადგან ეს სახელი სათანადოდ უნდა ატარო. ძალიან კარგად მახსოვს ის დღე, როდესაც მეც თქვენსავით ვიდექი აქ, როცა უნივერსიტეტის სტუდენტი გავხდი. ძალიან მძიმე წლები იყო, მაგრამ კარგად დასამახსოვრებელი, იმიტომ რომ ჩემს ცხოვრებაში ახალი ერა დაიწყო. დარწმუნებული ვარ, დღეს თქვენთვისაც ახალი ერა დაიწყო. ყველაფერი უნდა გავაკეთოთ იმისთვის, რომ უკეთესი მომავალი შევიქმნათ. უკეთესი მომავლის შექმნა კი, პირველ რიგში, ხარისხიანი განათლების გარეშე შეუძლებელია. კვალიფიციური განათლების მიღების შანსი ხელიდან არ უნდა გაუშვათ. სწავლების თითოეული დღე უნივერსიტეტში მაქსიმალურად ეფექტიანად უნდა გამოიყენოთ", _ უთხრა დავით ნარმანიამ სტუდენტებს.
განათლებისა და მეცნიერების მინისტრის მოადგილემ, გიორგი შარვაშიძემ პირველკურსელებთან მისალმებისას ყურადღება სამინისტროს მიერ განათლების მიმართულებით გადადგმულ ნაბიჯებზე გაამახვილა:
"დღეს იწყება თქვენთვის აკადემიური კარიერა. სახელმწიფომ ბევრ სამაგისტრო და სადოქტორო პროგრამაზე სწავლა უფასო გახადა. ეს საშუალებას მისცემს თითოეულ თქვენგანს, ეზიაროს პროფესიულ მწვერვალებს და გახდეს პროფესიონალი იმ დარგში, რომელიც აირჩია. მოგილოცავთ ახალი გზის დაწყებას და გისურვებთ წარმატებებს!“, _ მიმართა გიორგი შარვაშიძემ სტუდენტებს.
თბილისის სახელმწიფო უნივერსიტეტის ეზოში სტუდენტური ჰიმნი "გაუდიამუსი" შესრულდა, რომლის ტექსტის მნიშვნელობაზე სტუდენტებს ჰუმანიტარულ მეცნიერებათა ფაკულტეტის დეკანი დარეჯან თვალთვაძე ესაუბრა:
"დღეს ყველანაირ სხვა ემოციას, სიხარულის გრძნობა ფარავს. დღეს სტუდენტები გიწოდეს პირველად. დაიმახსოვრეთ ეს დღე! უკან დარჩა გამოცდებისთვის მოსამზადებელი, აბიტურიენტობის მძიმე პერიოდი. დღეიდან თქვენი ცხოვრება უნივერსიტეტის სახელს დაუკავშირდა. დღეს განასაკუთრებული დღეა ჩვენთვისაც, ვინც უნივერსიტეტის კედლებში გვხვდებით. ცოტა ხნის წინ თქვენ „გაუდიამუსის“ ტექსტი მოისმინეთ, რომელიც შეიქმნა საერთაშორისო უნივერსიტეტების კურსდამთავრებულების მიერ. კარგად დაუკვირდით ჰიმნის პირველ სიტყვას. ლათინურად „გაუდიამუს“ ნიშნავს სიხარულის გამოხატვას, მხიარულებას. იმ გრძნობას, რომელსაც დღეს ჩვენ ყველაზე მეტად განვიცდით. გისურვებთ, 4 წლის შემდეგ, როდესაც უნივერსიტეტის დამთავრების ცერემონაზე შევხდებით, გეთქვათ ილიას ეს სიტყვები:"ოო, ძვირფასო ოთხო წელიწადო, ბედნიერი ვარ, რომ რიგიანად მოგიხმარე“, _აღნიშნა დარეჯან თვალთვაძემ.
ღონისძიებაზე რექტორის სტიპენდიანტი, წარჩინებული სტუდენტი დაჯილდოვდა, ჯილდო გადაეცათ 2013/14 სასწავლო წლის საუკეთესო პედაგოგებს, რომელთა შერჩევაში სტუდენტები მონაწილეობდნენ.
