"სამართლიანმა არჩევნებმა" საქართველოს 71 თვითმმართველი ერთეულის საკრებულოს შემადგენლობა შეისწავლა. თითქმის ყველა მუნიციპალიტეტში შემაშფოთებელი გენდერული დისბალანსი გამოიკვეთა.
2014 წლის ადგილობრივი თვითმმართველობის არჩევნების შედეგების მიხედვით 2083 დეპუტატიდან მხოლოდ 242 ქალია.
"სამართლიანი არჩევნების" კვლევაში, დეტალურადაა მოცემული გენდერული ბალანსის გადანაწილების სტატისტიკა მაღალმთიანი და არამაღალმთიანი, მონოეთნიკური და მრავალეთნიკური რეგიონების მიხედვით.
მაგალითად, თელავის, ფოთის, მცხეთის, წალკის, ასპინძის საკრებულოებში, ქალი დეპუტატი საერთოდ არ არიან წარმოდგენილნი. აღნიშნული შედეგები შემაშფოთებელია, ვინაიდან, მოცემულ ქალაქებში საკმაოდ დიდია მოსახლეობის რაოდენობა. (თელავი – 71 000; მცხეთა – 60 000; ფოთი 41 000).
გარდა აღნიშნულისა, კვლევაში მოცემულია თუ როგორია გენდერული ბალანსი უშუალოდ პარტიების რიგებში. რომელ პარტიას ჰყავს ყველაზე მეტი ან ყველაზე ნაკლები წარმომადგენელი.
"სამართლიანი არჩევნების" კვლევაში მიმოხილულია საქართველოს საერთაშორისო ვალდებულებები გენდერული თანასწორობის გასაუმჯობესებლად. ორგანიზაცია მიიჩნევს, რომ სავალდებულოა გენდერული კვოტირების დროებითი ზომების შემოღება ქალთა პოლიტიკური წარმომადგენლობის ზრდის ხელშეწყობის მიზნით.
"სამართლიანმა არჩევნებმა" საქართველოს 71 თვითმმართველი ერთეულის საკრებულოს შემადგენლობა შეისწავლა.
საქართველოს ორგანული კანონის "ადგილობრივი თვითმმართველობის კოდექსი" მე-10 მუხლის მე-12 პუნქტისა და 151-ე მუხლის პირველი პუნქტის შესაბამისად, "მუნიციპალიტეტების გაყოფისა და თვითმმართველი თემების − მუნიციპალიტეტების შექმნის შესახებ" საქართველოს მთავრობის 2014 წლის 31 მარტის №515 განკარგულებით გათვალისწინებული საქართველოს მთავრობის წარდგინების საფუძველზე, საქართველოს პარლამენტმა დაადგინა ცვლილებები, რომლითაც განისაზღვრა, თვითმმართველი ქალაქების და თემების სტატუსი. შედეგად დეპუტატთა რაოდენობა 1550 დეპუტატიდან 2083 დეპუტატამდე გაიზარდა. 2010 წლის ადგილობრივი თვითმმართველობის არჩევნების შედეგად არჩეული საკრებულოების შემადგენლობაში მთელი ქვეყნის მასშტაბით, ქალთა პროცენტული წილი 11,1% შეადგენდა. 2014 წლის თვითმმართველობის არჩევნების შედეგებით კი მდგომარეობა ფაქტობრივად არ შეცვლილა და ქალთა წარმომადგენლობა 11,6% შეადგენს.
მიღებული შედეგები რაოდენობრივად შემდეგნაირად გამოიყურება: 2010 წელი: 1550 დეპუტატი, მათ შორის 171 ქალი; 2014 წელი: 2083 დეპუტატი, მათ შორის 242 ქალი.
საკრებულოებში ქალ დეპუტატთა ყველაზე მაღალი მაჩვენებელი (20% და მეტი) ფიქსირდება შემდეგი თვითმმართველი ერთეულების საკრებულოებში: ქალაქი ოზურგეთი (47%); სიღნაღის თემი (24%); ქალაქი თბილისი (22%); ხარაგაული თემი (21%); საჩხერის თემი (21%); ქ. ზუგდიდი (20%); სენაკის თემი (20%); ქალაქი ამბროლაური (20%); ონის თემი (20%); ახალციხის თემი (20%); ქალაქი ახალციხე (20%); ქალაქი რუსთავი (20%).
რიცხობრივად შედეგები შემდეგნაირად გამოიყურება: ქ. ოზურგეთი (7); სიღნაღი (7); ქ. თბილისი (11); ხარაგაული (7); საჩხერე (6); ქ. ზუგდიდი(3); სენაკი (6); ქ. ამბროლაური (3); ონი (7); ახალციხის თემი (6); ქ. ახალციხე (3); ქ. რუსთავი (5).
ასევე, არის საკრებულოები, რომლებშიც ქალები 5%-ზე ნაკლები რაოდენობით, ან საერთოდ არ არიან წარმოდგენილნი თელავის, ფოთის, მცხეთის, წალკის, ასპინძის საკრებულოებში, ქალი დეპუტატი საერთოდ არ არის წარმოდგენილი. მნიშვნელოვანია, რომ მცხეთის 2010 წლის საკრებულოს შემადგენლობაშიც ასევე არ გვხვდებოდა ქალი დეპუტატი. აღნიშნული შედეგები შემაშფოთებელია ვინაიდან, მოცემულ ქალაქებში საკმაოდ დიდია მოსახლეობის რაოდენობა. (თელავი – 71 000; მცხეთა – 60 000; ფოთი 41 000)
შედეგების მიხედვით, საქართველოს 4 რეგიონში გაუმჯობესება აღინიშნება, ესენია: თბილისი, გურიის, შიდა ქართლის და მცხეთა- მთიანეთის მხარე. 3 რეგიონში (სამეგრელო -ზემო სვანეთი, ქვემო ქართლი და აჭარა) კი პირიქით, 2014 წლის მონაცემების მიხედვით, ქალ დეპუტატთა პროცენტული წილი შემცირებულია. ხოლო 3 რეგიონში (რაჭა-ლეჩხუმი ქვემო სვანეთი, კახეთი და სამცხე-ჯავახეთი) მდგომარეობა უცვლელია.
