8 ოქტომბერს, შსს ლანჩხუთის რაიონული განყოფილების თანამშრომლებმა ოზურგეთის მუნიციპალიტეტის ერთ-ერთ სოფელში მცხოვრები მოზარდი თ.ჩ დააკავეს და ლანჩუთის მუნიციპალიტეტის სოფელ ლესასა და გულიანში მაღაზიების გაქურდვაში დასდეს ბრალი. დაკავებული თ. ჩ.-ს ოჯახის წევრები და ახლობლები " გურია ნიუსთან" მის უდანაშაულობაზე საუბრობენ; მათი ინფორმაციით, 15 წლის მოზარდი პოლიციაში ცემეს და აიძულეს ეღიარებინა ქურდობის ფაქტები.ოჯახის წევრები ჰყვებიან, რომ არასრულწლოვნის პოლიციაში წაყვანის მიზნით, მისთვის სახლში მიუკითხავს სოფლის წარმომადგენელს სპარტაკ მამულაშვილს, რომელსაც თავდაპირველად ბავშვი სახლში არ დახვედრია, შემდეგ პოლიციასთან ერთად მოუძებნია და მოტყუებით გაუყვანიათ.
როგორც დაზარალებული ოჯახის ახლობლები და სოფლის მაცხოვრებელები აცხადებენ, არასრულწლოვანის დაკავებაში ასევე ურევია სოფლის დეპუტატი პაატა კიღურაძე; მათი აზრით, ეს იმის გამო მოხდა, რომ ადგილობრივი თვითმმართველობის არჩევნებში ოჯახი მის საწინააღმდეგოდ მუშაობდა და ხმა კიღურაძის კონკურენტს მისცეს.
თ.ჩ სოციალურად დაუცველი ოჯახიდანაა. ჰყავს 4 და-ძმა. ბავშვები მძიმე სოციალურ მდგომარეობაში ცხოვრობენ.
" გურია ნიუსის" ოჯახში მისვლისას, ეჭვმიტანილი დღიურ სამუშაოზე იყო წასული მამასთან ერთად _ მამა-შვილს, 100 ლარის საფასურად, 6000 კვმ ყანა უნდა აეღოთ.
ოჯახში იმყოფებოდა თ.ჩ-ს ნათლია ც. მინდიაშვილი, რომელიც ადასტურებს ინფორმაციას, რომ მოზარდი პოლიციელებმა ცემეს.
"ბავშვი მეხვეწებოდა, ციური ბებია, არასად არ ვყოფილვარ, ვეჯიბრებოდით ერთმანეთს ბავშვები ველოსიპედითო… როცა სახლში მოვიდა პოლიცია, ვუთხარი: ხელი არ მოკიდოთ ბავშვს, მე ჩავიცვამ და გამოგყვებით-მეთქი; ადგილი არ გვაქვს მანქანაშიო. მოუკლავთ ბავშვი ცემით და ისე ათქმევინეს… იმიტომ იყო შეშინებული. ჩალით არის ეს სოფელი დახურული, შვილო! პატრონი სად ჰყავს ამ სოფელს? _ ამბობს ც. მინდიაშვილი.
თ. ჩ-ს დედა: _ მეშინია, რომ ვთქვა რამე, ბავშვაც ეშინია… სტატიის გამოქვეყნების მერე უარესს ხომ არ გაუკეთებენ ჩემს შვილს? რა ვქნა აღარ ვიცი… ვიფიქრეთ, გვეჩივლა, მაგრამ ისეა ბავშვი შენაშინები, გავჩერდით. უკან რომ დამაბრუნონ, დედიკო, რა მეშველებაო,- ამბობს. ახლა ყანაშია სამუშაოდ, 100 ლარს უხდიან მას და მამამისს 6 000 მეტრი ყანის მოტეხვაში, მამას ეხმარება. არ ვთაკილობთ არანაირ ფიზიკურ სამუშაოს; ისე სულ შრომობს 15 წლის თოთო ბავშვი… ახლა რა მეშველება? იმის მერე ჭკუაზე არ ვარ _ ნაცემიც არის… პოლიციაში რომ წაიყვანეს, იქ უცემიათ, თქვი, აღიარეო. 5 შვილის დედა ვარ, არ გაუკეთებია ჩემს შვილს და ტყუილად რატომ უნდა დაისაჯოს?! სადაც არ უნდა გაიკითხოთ, ყველა გეტყვით, რომ ნამდვილად წესიერი და პატიოსანი შვილი მყავს, ჩემს საფულეში არ ჩაუყვია ხელი, მჯერა, რომ უდანაშაულოა, არ გაუკეთებია რასაც აბრალებენ, არ ჩაუდენია ქურდობა… არ უნდა გეთქვა რაც არ გაგიკეთებია-მეთქი, ვუთხარი, ვუსაყვედურე. არადა, შიშის გამო რას არ იტყვის ბავშვი…
ახლა ისიც არ ვიცით რა გველის _ ჯარიმას გვაკისრებენ, იჭერენ, პირობითი ექნება თუ რა დაგვემართება… გაურკვეველ მდგომარეობაში ვართ.
დედა შვილის დაკითხვაზე წაყვანის ისტორიას ასე ჰყვება:
"დილით, 8 ოქტომბერს მოგვაკითხა სახლში რწმუნებულმა. იკითხა, სად არის ბავშვიო; ვუთხარი, მეზობელს ახლავს ცხენით და “კაჭკით" შეშის მოსატანად-თქო. არაფერი უთქვამს და მეორეჯერ უკვე პოლიციელებთან ერთად მოვიდა. მითხრეს, რომ მშობლის გარეშე ვერ წავიყვანთ და რომელიმე მშობელი გაგვყვესო. მე ვერ გავყვევი, მცირეწლოვანი ბავშვების გამო. რატომ დაკითხეს ჩემს გარეშე? ბავშვი გათიშული იყო ორი დღე, ვერ ლაპარაკობდა! 5 შვილის დედა ვარ, იმის მაგივრად, რომ სახელმწიფომ რამეში დახმარება გამიწიოს, პირიქით აკეთებენ?! მხოლოდ სოციალური დახმარების ამარა ვართ, საჭმელს ძლივს ვაჭმევთ ბავშვებს… იტყვიან, თუ გაჭირვებულია, რას აჩენს ამდენ შვილსო, მაგრამ მე მორწმუნე ვარ და შვილს სასიკვდილოდ ვერ გავიმეტებ! სახლში გვაწვიმს და იმაზე არ დაგვეხმარა არავინ….ნახეთ, რა მდგომარეობაში ვცხოვრობთ, იატაკი არ გვაქვს, ცემენტზე მყავს ბავშვები! სახლი ვერ გადავხურეთ, არც ძროხა გვყავს, არც ქათმები, 11 სული ვცხოვრობთ ამ “კუხნაში", 11 სული სოციალური დახმარების ფულით ვარსებობთ. ორი ტომარა ფქვილი გვინდა ყოველ თვეში. ჩვენ დიდები გავძლებთ მშივრები, ან რაც გვექნება, იმას შევჭამთ, მაგრამ პატარები მოითმენენ? ბავშვს გააჩუმებ მშიერს?
წინა ღამით მეზობლის ბავშვებთან ერთად იყო ჩემი შვილი წასული ველოსიპედით.. მამიდამისი სოფელ ჯუმათში ცხოვრობს. ღამე იყო, იქ შეხვედრია პატრული _ ბავშვებს ველოსიპედის საბურავი გაუსკდათ და მისულან პატრულთან, დაგვეხმარეო; თუ რამის გამკეთებლები იყვნენ, პატრულს მიადგებოდნენ თუ პირიქით _ დაიმალებოდნენ? ამ პატრულს ჩაუწერია ბავშვების სახელი და გვარები და მეორე დღეს ასე დაიჭირეს ბავშვი… ოთხი ბავშვი იყო და ორი დაიჭირეს.
თ.ჩ-ს ბებია: _ სოფლის რწმუნებულმა რომ მიაკითხა სახლში ბავშვს წასაყვანად, მან არ იცის ჩემი შვილიშვილი როგორია? პირველი კლასიდან დღემდე ერთად სწავლობენ მისი შვილი და ჩემი შვილიშვილი. დახმარებაა აგი, შვილო? რწმუნებულს ვთხოვდი, ეთქვა რაში იყო საქმე, რამე ხომ არ დააშავა და მომატყუა: არაფერი, ნაზიკო ბიცოლა, სკოლის ამბავზე ვართ მოსულებიო. ამას ხომ ვერ იუარებს?
სულ იმას ვამბობდით, რომ სოციალური დახმარება გაგვიკეთა-თქო; დეპუტატიც ჩვენი ნათესავია; ხომ უნდა გავეფრთხილებინეთ ასეთი ამბავიაო, მაგრამ მოტყუებით წაიყვანეს ბავშვი. დაკავების შემდეგ, ჩვენთან არც დეპუტატი მოსულა და არც რწმუნებული ამბის საკითხავად, პოლიცაში მისულან. რა უნდა გავაკეთოთ, არ ვიცი _ ერთი თეთრიც არ გაგვაჩნია. სულ ავად ვარ მოხუცებული, წამლის ფული არ მაქვს, იმდენი ვალი მაქვს ჩვენი სოფლის ექიმი… ამ ჩვილ ბავშვებთან ერთად რამდენი პრობლემაა, მეცოდება ჩემი შვილიშვილი, დაგვეხმარეთ რაიმე, თუ შეგიძლიათ…"
" გურია ნიუსი" სოფლის წარმომადგენელს სპარტაკ მამულაშვილს და დეპუტატს პაატა კიღურაძეს.
სპარტაკ მამულაშვილი: _ სოფელში ვიყავი იმ მომეტში, დამიკავშირდა პოლიცია, ამა და ამ ბავშვის აყვანა გვინდაო და მიგვყევი ოჯახშიო. მე ვალდებული ვარ ნებისმიერ ადამიანს მივყვე და დავეხმარო, პოლიციამ მითხრა, რომ ეს ბავშვები შემჩნეული არიან ქურდობაშიო და უნდა ავიყვანოთო. მოგვიანებით, ერთ საათში მე და სოფლის დეპუტატი პაატა კიღურაძეც მივედით ლანჩხუთის პოლიციაში. იქ გამოიკვეთა, რომ მოხდა ქურდობა, დაკითხვას ესწრებოდნენ მშობლებიც.
_ ბატონო ნიკო, დედა აცხადებს, რომ ის არ დასწრებია დაკითხვის პროცესს.
_როგორ არა, მე მითხრეს, რომ ახლდა მშობლებიო.
_ თქვენი აზრით, რატომ დააკავეს ორი ბავშვი და რატომ გამოუშვეს დანარჩენები?
_ამათ აღიარესო და მეტი არ ვიცი. ორმა აღიარა და ორმა არაო. მე პოლიციელებთან არ მისაუბრია მაგის თაობაზე და არ ვიცი. ახლა იქნება სასამართლო და რას მიუსჯიან არ ვიცი. ჩემთან ერთად იყო დეპუტატიც. სოციალურად დაუცველები არიან და მე იქ ჩემს სათქმელს ვიტყვი, – გვითხრა რწმუნებულმა.
პაატა კიღურაძე: მე რა უნდა გითხრათ, ოჯახმა გითხრას…
_ ბატონო პაატა, თქვენ რას გვეტყვით ამ ოჯახთან დაკავშირებით?
_ ოჯახმა რა გითხრათ?
_ოჯახი აცხადებს, რომ ბავშვი უდანაშაულოა და ის ტყუილუბრალოდ დაიჭირეს.
_რაღაცა მაგი მასე არაა მგონი...
_ თქვენ როგორ ფიქრობთ, ჩაიდინეს ამ ბავშვებმა ქურდობა?
_მე როგორც ვიცი … და მე როგორც სოფლიდან ვიცი … მე რაც ინფორმაცია მაქვს … მაგ ბავშვებმა მოიპარეს ნამდვილად. ვინც ნახა, მე როგორც ვიცი, ლანჩხუთის ტერიტორიაზე ნახეს, სადაც ქურდობა მოხდა… მე ასე ვარ ინფორმირებული. დეტალებში არ ვიცი…
_ბატონო პაატა, ოჯახი სოციალურად დაუცველია. თქვენ იყავით ორი მოწვევის საკრებულოს დეპუტატი, რა სახის დახმარება გაქვთ გაწეული ამ ოჯახისთვის?
_ ოჯახმა რა გითხრათ?
_ბატონო პაატა, თქვენ გეკითხებით_ როდის და რით გაუწიეთ დახმარება?
_ და ოჯახმა რა გითხრათ-მეთქი?
_ოჯახი აცხადებს, რომ არიან სოციალურად დაუცველები, ღარიბები, აწვიმთ თავზე, მცირეწლოვანი ბავშვები ულუკმაპუროდ ჰყავთ...
_მაგაში გეთანხმებით.
_ ბატონო პაატა, თქვენ სად იყავით არასრულწლოვანი ბავშვის დაკავების მომენტში?
_ ოჯახმა რა გითხრათ?
_თქვენ სად იყავით არ იცით?
_არ ვყოფილვარ.
_ბატონო პაატა, თქვენ რწმუნებულთან ერთად პოლიციაში არ მისულხართ?
_რწმუნებულთან ერთად პოლიციაში არ ვყოფილვარ; ისე მივედი, ამბავი ვიკითხე.
_ ბატონო პაატა, ამბობენ, რომ ოჯახმა ხმა თქვენ არ მოგცათ არჩევნებზე და ამის გამო მოხდა ამ ბავშვის დაკავება..
_ ახლა მართლა მინდა სახურავის თაობაზე დავეხმარო და გავუკეთო. არ ვიცი რა ბედი ეწევა ამ ბავშვს. ახლა მივალ ოჯახში და ვნახავ… არასწორი ინფორმაციაა ეს; ეს ოჯახი ჩემი ნათესავია. ოჯახი მაგას ჩემზე არ იტყოდა, სხვამ თუ გითხრათ, ეს არ ვიცი. მე რა უფლება მაქვს პოლიციისთვის ხელი შემეშალა? – გვითხრა კიღურაძემ.
შსს-ში აცხადებენ, რომ აღნიშნულ კომენტარზე პასუხი პროკურატურამ უნდა გაგვცეს.
ოზურგეთის რაიონული პროკურორის მოადგილე მალხაზ სირაძე "გურია ნიუსთან" აცხადებს, რომ აღნიშნულ საკითხთან დაკავშირებით აღძურულია სსკ 177 მუხლის 2 – ნაწილის ბ ქვეპუნქტით.
"ამ ეტაპზე, სისხლის სამართლის დევნა დაწყებული არ არის, მომავალში გადაწყდება მისი აღმკვეთი ღონისძიების შეფარდების საკითხი. რაც შეეხება, პოლიციის მხრიდან ცემის ფაქტს, ეს ინფორმაცია სიმართლეს არ შეესაბამება" _ გვითხრა პროკურორმა მალხაზ სირაძემ.
“გურია ნიუსი" მოუწოდეს არასამთავრობო ორგანიზაციებს, გააქტიურდნენ არასრულწლოვნის უფლებების დასაცავად და ამ საქმეში დახმარება გაუწიონ ოჯახს.
ჩვენ აუცილებლად დავუბრუნდებით ამ თემას, ყურადღებით დავაკვირდებით პროცესს; ოჯახის, მოზარდის მიმართ გახორციელებული ნებისმიერი უკანონო ქმედების შემთხვევაში, ინფორმაციას მივაწვდით მკითხველს, უფლებადამცველ და საერთაშორისო ორგანიზაციებს.
