5 დეკემბერს, ლანჩხუთის მუნიციპალიტეტის საკრებულოს მორიგი სხდომა შედგა და როგორც მოსალოდნელი იყო, მწვავე დებატებითაც წარიმართა. ამის კონტურები ჯერ კიდევ 27 ნოემბრის საკრებულოს ბიუროს სხდომაზე გამოიკვეთა, სადაც დღის წესრიგის რამდენიმე საკითხს მწვავე შეფასებები მოჰყვა.
საკრებულოს სხდომის დღის წესრიგი ათი საკითხით კი წარსდგა დეპუტატთა წინაშე, მაგრამ მის დამტკიცებამდე მესამე საკითხად შემოტანილი _ ლანჩხუთის მუნიციპალიტეტის 2015-17 წლების სტრატეგიული განვითარების გეგმის დამტკიცება, სამერმისოდ გადაიდო. ცხრასაკითხიანი დღის წესრიგის დამტკიცებამ ბეწვის ხიდზე გაიარა და მხოლოდ 16 ხმით მოახერხა უმრავლესობამ მისი გატანა.
თავიდანვე ცხადი გახდა, რამდენიმე საკითხს დიდი წინააღმდეგობა რომ შეხვდებოდა და არა მარტო ოპოზიციის მხრიდან. საბოლოოდ, გამოჩნდა, რომ "ნაციონალ" და "პატრიოტ" დეპუტატებს, "თავისუფალი დემოკრატი", "რესპუბლიკელი" და რამდენიმე მაჟორიტარი დეპუტატიც მხარს უჭერდა და, როგორც ჩანდა, წინასწარ "შეკრულ" უმრავლესობას მძიმე დღე დაუდგა. თუმცა, "ზემოდან" დამოძღვრილთა თავგამოდებამ, მაინც თავისი გაიტანა და ყველა საკითხი მათთვის სასარგებლოდ გადაწყდა. არადა, როგორც დეპუტატი დარეჯან ბურჭულაძე ირწმუნება, კომისიის სხდომებზე რამდენიმე კოლეგა უმრავლესობიდან ერთს ამტკიცებდა, სხდომაზე კი მეორეს აკეთებდა.
პირველივე საკითხზე გამოჩნდა დეპუტატებს შორის "ჩატეხილი ხიდი". უკვე დეფიციტურად გამოცხადებულ 2014 წლის ბიუჯეტში ხარჯების ზრდამ ოპოზიცია აალაპარაკა. მართალია, მუნიციპალიტეტის მთავარმა ფინანსისტმა როლანდ ლაშხიამ განაცხადა, 80 ათასი ლარის მოთხოვნილებას მხოლოდ 14 ათასი ლარის საბიუჯეტო მატებით ვაკმაყოფილებთო, მაგრამ ესეც არ აღმოჩნდა საკმარისი ოპონენტთა დაშოშმინებისთვის.
დეპუტატმა "ნაცმოძრაობიდან" კახა ასკურავამ იკითხა, რამდენი პროცენტით არის ბიუჯეტი შესრულებულიო და გაიგო რა პასუხი (83%), დასძინა _ რისი იმედი გვაქვს, კიდევ რომ ვზრდით ისედაც განწირულ ბიუჯეტსო?
თანაპარტიელს არც გია გოგუაძე ჩამორჩა. რამდენიმე დეტალს მანაც გაუსვა ხაზი. კერძოდ, სოციალური სამსახურის მოხსენებითი ბარათი დაიწუნა, სადაც კლუბ "გურიას" დავალიანების დაფარვის აუცილებლობაზეა საუბარი: "ეს ბარათი ნულის ტოლია. ტყუილია, იქ რაც წერია და თუ ითხოვთ რამეს, ნორმალურად მაინც ახსენით", _ თქვა დეპუტატმა.
რაც შეეხება 300-ათასლარიან საბიუჯეტო დეფიციტს, ითქვა, რომ კომპანია "ბლექსისგან" ელიან თანხას, მაგრამ ეს კომპანია 2 წელია, თვალით არავის უნახავს და ვინმეს ჯერა, რომ ის ამ ვალს დაფარავსო?
ასე იყო თუ ისე, უმრავლესობამ საბიუჯეტო მატება მაინც გაიტანა და გამგებელმა ურუშაძემაც ამოისუნთქა. უფრო მეტი კამათი მოჰყვა გოგონათა სარაგბო-საფეხბურთო ა(ა)იპ-ის შექმნის საკითხს. მოვლენები ისე განვითარდა, გენდერული ბალანსის თემაც კი წამოიჭრა უნებლიეთ და პარადოქსული იყო, რომ ყველაზე მეტი წინააღმდეგობა მანდილოსანი დეპუტატების მხრიდან მოდიოდა. პოლემიკა ბევრ საკითხს შეეხო, დაწყებული ჰიგიენური პირობების დაცვით, დამთავრებული ისევ და ისევ ფინანსებით. მთავარი ხარვეზი კი ისე ჩანდა, მაინც საკითხის არაჯეროვნად მომზადება იყო. დეპუტატები შინაგანად ამ ა(ა)იპ-ის წინააღმდეგები არ იყვნენ, უბრალოდ, აინტერესებდათ, თუ საიდან მოხდებოდა მისი დაფინანსება.
საკრებულოს თავმჯდომარემ ტრიბუნასთან დურმიშხან ჩხაიძე იხმო, რომელიც ამ ა(ა)იპ-ის თავკაცად მოიაზრება, ამჟამად კი ბავშვთა საფეხბურთო სკოლას ხელმძღვანელობს. მან ვრცლად ისაუბრა გოგონათა მიღწევებზე და ახალი სკოლის დაფუძნებაზეც, რაც საფუძველს მოკლებული არ იყო, თუმცა, დეპუტატთა შეკითხვებმა, ჩხაიძე, ცოტა არ იყოს, გააღიზიანა და მხოლოდ უმრავლესობის მხარდაჭერამ დაამშვიდა. გაირკვა, რომ ახალი ა(ა)იპ-ის ფინანსურად უზრუნველყოფა სწორედ ბავშვთა საფეხბურთო სკოლის ბიუჯეტიდან მოხდება და 2015 წლის ბიუჯეტში დაფიქსირებულ 200 ათას ლარს 50 ათასი გამოეყოფა.
ყველაზე მეტი ხმაური გამგეობის განათლების, კულტურის, სპორტისა და ახალგაზრდულ საქმეთა სამსახურის დებულების დამტკიცების შესახებ საკრებულოს დადგენილების მისაღებად ადმინისტრაციული წარმოების დაწყებას მოჰყვა. პარადოქსია, მაგრამ ფაქტია, ჯერ ადმინისტრაციული წარმოება არ იყო მიღებული და სესიაზე დიდი ვნებათაღელვა გაიმართა. საქმე იმაშია, რომ, დღესდღეობით, ლანჩხუთში ათი სამსახური ფუნქციონირებს. ამას დაამატეთ გამგებლის და მოადგილეების სამი შტატი, სულ _ 13 თანამდებობა. სწორედ ეს არის ის თანამდებობრივი კვოტა, რომელიც მოსახლეობის რაოდენობის მიხედვით, ლანჩხუთს ერგება. გამოდის, რომ აღნიშნული სამსახური ზედმეტია. თუმცა, გამგეობა ირწმუნება, რომ სახანძრო-სამაშველო სამსახური მის სტრუქტურაში არ შედის. თავის დროზე, შინაგან საქმეთა სამინისტრომ სახანძრო-სამაშველო სამსახურის თავის დაქვემდებარებაში გადაყვანა მოინდომა, მაგრამ ეს პროცესი შეჩერებულია მომავალი წლის იანვრამდე. თუ ეს მართლაც ასეა, გარკვეული პროცესები უკვე დაწყებული უნდა იყოს სამინისტროს მხრიდან, ინვენტარიზაციის კუთხით მაინც. ჯერჯერობით, ასეთი არაფერი ხდება. უფრო მეტიც, წლევანდელის მსგავსად, მომავალი წლის ბიუჯეტშიც სახანძრო-სამაშველო სამსახური გამგეობის სტრუქტურაშია ასახული და არაფერია ნათქვამი ახალ სამსახურზე.
სხდომაზე გაჟღერდა სოციალური სამსახურის უფროსის განმარტება სამსახურების გაყოფის თაობაზე: _ ძალიან რთული სფეროა და თავს ვერ ვართმევ, _ უთქვამს კეიდიას.
ახალი სამსახურის შექმნის ერთ-ერთი მიზეზი ეს არის, თუმცა, ჩვენი წყაროს ინფორმაციით, ყველაფერი ერთ კონკრეტულ პიროვნებამდე დადის, რომელსაც გამგებელმა თავშივე მისცა დაპირება _ ისევ დაგიბრუნებ სამსახურის უფროსობასო.
"რა გახდა ეს საკითხი, თუ არ გინდათ, ნუ განიხილავთ, თქვენი ნებაა", _ მიმართა ურუშაძემ კამათში ჩართულ დეპუტატებს.
საგულისხმოა, რომ თავად საკითხის გამომტანი რომან ბიწაძე იყო ყველაზე მეტად მოწადინებული, რომ საკითხი ჩავარდნილიყო _ მან, პროტესტის ნიშნად, ნაადრევად დატოვა კიდეც სხდომა. ბიწაძეს ელგუჯა ჩხაიძე და დარეჯან ბურჭულაძეც მიჰყვნენ, თუმცა ბურჭულაძე მალევე დაბრუნდა. პროტესტის ნიშნად დარბაზი დატოვეს გია გოგუაძემ და კახა ასკურავამაც.
დემარშმა უმრავლესობას გული ვერ აუჩუყა და საკითხიც ადმინისტრაციულ წარმოებაში გადაიტანა.
არ შეიძლება საკრებულოს პროცედურულ ხარვეზებზეც არ ვთქვათ _ გაუგებარია, საკრებულოს თავმჯდომარე საკითხზე მსჯელობისას რატომ არ აძლევს სიტყვას შესაბამისი სფეროს კომისიის თავმჯდომარეს, რომელმაც, წესით, საკუთარი კომისიის დასკვნა უნდა გაასაჯაროოს. გაუგებარია საკრებულოში არსებული ფრაქციების მოსაზრებებიც ამა თუ იმ საკითხზე. პროცედურულად დარღვეული იყო ბიუჯეტში ცვლილებების საკითხიც, რომელზეც, საკრებულოს რეგლამენტით, მუხლობრივად იყო კენჭისყრა ჩასატარებელი.
და ბოლოს, რეგლამენტი კიდევ ერთხელ დაირღვა იმით, რომ საკრებულოს სხდომა ორშაბათის ნაცვლად პარასკევს ტარდება. დეპუტატთა ეს შენიშვნა საკრებულოს თავმჯდომარემ გოგი ხელაძემ აღიარა და მომავალი წლიდან ამ ხარვეზის გამოსწორებას შეგვპირდა.
