დეპუტატების უმრავლესობამ “გამოთანაბრებითი ტრანსფერის” მნიშვნელობა არ იცის

საკითხს დეპუტატები დიდად არ დაუინტერესებია, რადგან, როგორც ითქვა, კომისიებზე განიხილეს. დააზუსტეს მხოლოდ ის, გაითვალისწინა თუ არა გამგეობამ საკრებულოს მიერ გამოთქმული 30 შენიშვნა.

ლომინეიშვილის განმარტებით, გამგეობამ თითქმის ყველა შენიშვნა გაითვალისწინა, თუმცა, არ დაუკონკრეტებია, რომელი და ეს არც დეპუტატებს მოუთხოვიათ. ხალხის რჩეული დეპუტატები არ დაინტერესებულან 4 მილიონ  865 00 ლარიდან  რამდენია გამოთანაბრებითი და მიზნობრივი ტრანსფერი.  როგორც "გურია ნიუსმა" გაარკვია,  ეს ციფრი,  ჯამში, 3 მილიონ მილიონ 313 400 ლარია. აქედან, გამოთანაბრებითი ტრანსფერი 3 მილიონ 130 400 ლარია, მიზნობრივი კი _  83 ათასი ლარი.

"გურია ნიუსი" დაინტერესდა,  იციან თუ არა დეპუტატებმა, რას ნიშნავს გამოთანაბრებითი ტრანსფერი და ამ შეკითხვით დეპუტატებს სხდომის დასრულების შემდეგ მიმართა:

კობა კალანდაძე,  სოფელ ხიდისთავის  დამოუკიდებელი დეპუტატი: არა, ნამდვილად არ ვიცი.

მაია გიორგაძე, "კოალიცია ქართული ოცნების" სიით გასული დეპუტატი: კაით რა, არ გინდათ ეს შეკითხვები.

ლაშა თოლორდავა, კოალიცია "ქართული ოცნების" დეპუტატი  სოფელ გუთურიდან: არ ვიცი.

გოჩა თოდრია, "კოალიცია ქართული ოცნების" დეპუტატი სოფელ ხევში: არ ვიცი.

აკაკი ყაჭეიშვილი, დამოუკიდებელი დეპუტატი  სოფელ გოგოლესუბნის თემში: არ ვიცი.

ირაკლი ახობაძე, კოალიცია "ქართული ოცნების" სიით გასული დეპუტატი: ფინანსურად სუსტი მუნიციპალიტეტები, რომლებიც საკუთარი შემოსავლებით ვერ უზრუნველყოფენ თავიანთი  უფლებამოსილების გახორციელებას,  ცენტრალური ბიუჯეტიდან იღებენ ფინანსურ დახმარებას.  ეს არის გამოთანაბრებითი ტრანსფერი.  როგორც ვიცი, ორი მუნიციპალიტეტია საქართველოში, რომელიც გამოთანაბრებით ტრანსფერს არ იღებს, ბოლნისი და თუ არ ვცდები, ბორჯომი.

გოდერძი გოგიშვილი  "პატრიოტთა ალიანსის"  სიით გასული დეპუტატი: "არ ვიცი ნამდვილად. ისე, თქვენ გაზეთი ხართ და მასეთ შეკითხვებს კი არ უნდა სვამდეთ, უცხო სიტყვებს რომ ნახავთ, იმის განმარტება უნდა გააკეთოთ. ჩვენ წავიკითხავთ და გვეცოდინება".

აღსანიშნავია, რომ ამ მოკლე ინტერვიუების ჩაწერის დროს, დეპუტატების დიდმა ნაწილმა სხდომათა დარბაზი დატოვა. უფრო მეტიც, რამდენიმე მათგანმა შენობაც კი დატოვა, სავარაუდოდ, იმ მიზეზით, რომ ეს შეკითხვა მათთვის არ დაგვესვა.

რაც შეეხება გამოთანაბრებით ტრანსფერს _  გამოთანაბრებითი ტრანსფერი ექსკლუზიურ უფლებამოსილებათა განხორციელების უზრუნველსაყოფად ადგილობრივი თვითმმართველი ერთეულის ბიუჯეტისათვის საქართველოს სახელმწიფო ბიუჯეტიდან "ადგილობრივი თვითმმართველი ერთეულის ბიუჯეტის შესახებ"  კანონით განსაზღვრული ფორმულით, ფინანსური დახმარების სახით გამოყოფილი სახსრებია, რომელთა გამოყენების მიმართულებებს დამოუკიდებლად განსაზღვრავს ადგილობრივი თვითმმართველობის წარმომადგენლობითი ორგანო.

დეპუტატებისთვის, რომელთა ერთ-ერთი პრეროგატივა და ვალდებულება ბიუჯეტის დამტკიცებაა, იმასაც განვმარტავთ, გამოთანაბრებითი ტრანსფერის გაანგარიშება საქართველოს ფინანსთა მინისტრის №936 ( 2008 წლის 22 დეკემბერი) ბრძანების საფუძველზე ხდება.

გამოთანაბრებითი ტრანსფერი გაიანგარიშება "ადგილობრივი თვითმმართველი ერთეულის ბიუჯეტის შესახებ" საქართველოს კანონით დამტკიცებული ფორმულის მიხედვით.

აქვე დაინტერესებული პირებისთვის მიზნობრივ ტრანსფერსაც გავმარტავთ _ მიზნობრივი ტრანსფერი ნიშნავს დელეგირებულ უფლებამოსილებათა გასახორციელებლად ადგილობრივი თვითმმართველი ერთეულის ბიუჯეტის მიერ საქართველოს სახელმწიფო ბიუჯეტიდან ან/და ავტონომიური რესპუბლიკების რესპუბლიკური ბიუჯეტებიდან ფინანსური დახმარების სახით მიღებული სახსრებს.

ეს ყველაფერი ერთად და უფრო კონკრეტულად კი გარკვევით წერია  საქართველოს კანონში "ადგილობრივი თვითმმართველი ერთეულის ბიუჯეტის შესახებ",  რომლის წაკითხვა დეპუტატებს ნამდვილად არ აწყენდათ.