გურიის არცერთ მუნიციპალიტეტში 2015 წლის მთავარი დოკუმენტი ჯერ არ დამტკიცებულა, მაგრამ უკვე ცნობილია, რომ მომავალ წელს შეზღუდული შესაძლებლობის მქონე პირებისთვის კონკრეტული თანხა არის გამოყოფილი.
სანამ ამ თანხის რაოდენობას შევიტყობთ, მანამ "გურია ნიუსმა", ამ საკითხთან დაკავშირებით, რამდენიმე რესპონდენტი ჩაწერა.
ოზურგეთელი თამუნა ლურსმანაშვილი ამბობს, რომ მას 2015 წლის ბიუჯეტის პროექტის განხილვაში მონაწილეობა არ მიუღია და ახლა აპირებს გაეცნოს წლის მთავარ დოკუმენტს.
_ შეზღუდული შესაძლებლობების მქონე პირთა გურიის სარეაბილიტაციო ცენტრის 18 წლამდე ბენეფიციარები ფინანსდებიან ადგილობრივი ბიუჯეტიდან და აქედან გამომდინარე, კარგი იქნება, რომ მხოლოდ ამ ასაკამდე არ მოხდეს დაფინანსება. ასევე, არ ხდება შშმ პირების სასწავლო გადამზადება და შემდეგ დასაქმება. იშვიათად ნახავთ შშმ პირს, რომელიც დასაქმებულია. მე აუცილებლად ვაპირებ ყველა ამ საკითხთან დაკავშირებით ადგილობრივ ხელისუფლებასთან საუბარს. ასევე, ჩვენთან არ არის ადაპტირებული გარემო და ამას სერიოზულად უნდა მიექცეს ყურადღება, _ გვითხრა თამუნა ლურსმანაშვილმა.
ლანჩხუთის მუნიციპალიტეტში მცხოვრები მარი ნუცუბიძე ამბობს, რომ ზუსტად არ აქვს ინფორმაცია, თუ რა თანხა არის გამოყოფილი ადგილობრივი ბიუჯეტიდან.
_ "კოალიცია დამოუკიდებელი ცხოვრებისთვის" დახმარებით რვა თვეა, რაც აქტიურად ჩავები საზოგადოებრივ საქმიანობებში. სამწუხაროდ, არ ვყოფილვარ ლანჩხუთის მუნიციპალიტეტის 2015 წლის ბიუჯეტის პროექტის განხილვაზე. როგორც ვიცი, შშმ პირთათვის, დაახლოებით, 6000 ლარი არის გამოყოფილი, _ თქვა მარი ნუცუბიძემ.
ჩოხატაურელი ნინო ლომთათიძე 2015 წლის ბიუჯეტის პროექტის განხილვას დაესწრო.
_ საერთოდ მეორედ დავესწარი ბიუჯეტის პროექტის განხილვას და იმედია, რომ ჩემი შენიშვნა გათვალისწინებული იქნება. მე დავაყენე საკითხი, რომ ერთხელ და სამუდამო უნდა მოგვარდეს პანდუსების პრობლემა. ვნახოთ, რა იქნება გათვალისწინებული და როგორ მიუდგებიან ამ საკითხს ადგილობრივი ხელისუფლების წარმომადგენლები, _ ამბობს ნინო ლომთათიძე.
"გურია ნიუსმა" ამ საკითხთან დაკავშირებით ადგილობრივი ხელისუფლების წარმომადგენლები ჩაწერა.
დიმიტრი კვერღელიძე, ოზურგეთის მუნიციპალიტეტის საკრებულოს თავმჯდომარის მოადგილე: _ 18 წლამდე შეზღუდული შესაძლებლობის მქონე პირები, რომლების დადიან ოზურგეთს დღის ცენტრში, ფინანსდებიან ადგილობრივი ბიუჯეტიდან და ამისთვის გამოყოფილია 30 000 ათასი ლარი. 30 000 ლარში, ასევე, შედის მათი ორკვირიანი კურსები ურეკში. ეს თანხა დღის ცენტრმა მოითხოვა და აქედან გამომდინარე, ხდება კიდევაც დაფინანსება. ვიცი, რომ ეს თანხა არ არის საკმარისი, რადგან ადმინისტრაციულ და სხვა შენობებში აუცილებლად არის პანდუსების პრობლემა მოსაგვარებელი. კარგი იქნება, ამ საკითხით ბიზნეს-კომპანიები თუ დაინტერესდებიან, რადგან არც მაღაზიებში არის პანდუსები.
ქალაქ ოზურგეთის მერიის სოციალური დაცვის განყოფილების უფროსის თამარ დუმბაძის ინფორმაციით, ქალაქ ოზურგეთის მუნიციპალიტეტის მერიის 2015 წლის ბიუჯეტში შეზღუდული შესაძლებლობის მქონე პირთა დახმარებისთვის გამოყოფილია შემდეგი თანხები: "შეზღუდული შესაძლებლობის მქონე პირთა გურიის სარეაბილიტაციო ცენტრს" (18 წლის ზემოთ, 22 ბენეფიციარი) წლიური _ 51100 ლარი, რომელიც ყოველთვიურად, საშუალოდ, 4260 ლარს შეადგენს. აღნიშნული თანხა გამოიყენება ხელფასებზე, კომუნალურ ხარჯებზე, სამედიცინო მომსახურებაზე, მედიკამენტებზე, კვებაზე და სხვ.
მერია, ასევე, აფინანსებს უსინათლოებს (30 ბენეფიციარი). ბიუჯეტში გამოყოფილია თანხა– 4500 ლარი, რომელიც წელიწადში ერთხელ 150 ლარით დახმარებას ითვალისწინებს.
ჩოხატაურის მუნიციპალიტეტის გამგეობის საფინანსო სამსახურის უფროსის, გელა ლომინეიშვილის თქმით, 2015 წლის ბიუჯეტის პროექტში შშმ პირებისთვის განკუთვნილია 40 000 ლარი.
_ 5 000 ათასი ლარი განკუთვნილია სამედიცინო მომსახურებისთვის, 25 000 ათასი გამოყოფილია ყოველთვიური დახმარებისთვის, რომელიც წლის განმავლობაში ნაწილდება 70 ბავშვზე. კვებისთვის და კომუნალური მომსახურებისთვის კი 10 000 ლარია განკუთვნილი, _ გვითხრა გელა ლომინეიშვილმა.
ლანჩხუთის მუნიციპალიტეტის გამგეობის მთავარმა ფინანსისტმა როლანდ ლაშხიამ კი ჩვენთან სატელეფონო საუბრის დროს თქვა, რომ ამ ეტაპზე ზუსტი თანხა არ არის ცნობილი და ამ საკითხთან დაკავშირებით მოგვიანებით მოგვაწვდის ინფორმაციას.
