ახმეტაში, ისევე როგორც საქართველოს სხვა რაიონებში, შეშის მოხმარების მასშტაბი რამდენჯერმე აღემატება ტყეში არსებული მერქნული რესურსის ენერგეტიკულ პოტენციალს.
ამ ინფორმაციას "კავკასიის გარემოსდაცვითი არასამთავრობო ორგანიზაციების ქსელი“ (CENN) ავრცელებს.
"გარემოსა და ბუნებრივი რესურსების სამინისტროს მიერ გასულ წლებში ჩატარებული კვლევის მიხედვით, ახმეტის მუნიციპალიტეტის მოსახლეობა ყოველწლიურად 71,400 მ³ შეშას მოიხმარს, მაშინ, როცა მდგრადი მეთოდებით ახმეტის ტყეებში მხოლოდ 13,500 მ³ საშეშე რესურსის მოპოვებაა შესაძლებელი. შეშის 81%-იანი დეფიციტის აღმოფხვრა, რომელიც 57,900 მ³-ს შეადგენს, რაიონის ტყეების არამდგრადი ათვისების ხარჯზე ხდება. შედეგად, ტყეების დეგრადაცია შეუქცევად ხასიათს იღებს, მისგან გამოწვეული ეკოლოგიური პრობლემები და ბუნებრივი კატასტროფების გაზრდილი რისკები კი კიდევ უფრო ამძიმებს მოსახლეობის სოციალურ მდგომარეობას და მნიშვნელოვან ზიანს აყენებს როგორც ადგილობრივ, ასევე სახელმწიფო ეკონომიკას.
საქართველოში შეშის მოხმარების მასშტაბების დადგენას გასულ წელს CENN შეეცადა. ამ მიზნით კახეთში 166 სოფელი გამოიკითხა.
გამოკითხულ რესპონდენტთან ინფორმაციით, XX საუკუნის 90-იანი წლებიდან ტყეების ეკოლოგიური მდგომარეობა თანდათან უარესდება. მცირდება ტყეების ბიომრავალფეროვნება და მათი რეკრეაციულ-ესთეტიკური ღირებულება, ძლიერდება ეროზიული, მეწყრული და ღვარცოფული პროცესების რისკი. ტყეების დეგრადაციის პროცესი განსაკუთრებით საგანგაშოდ არის შეფასებული კახეთში. რეგიონის სოფლების 20% ასევე საუბრობს ხე-ტყის უკანონო მოპოვების პრაქტიკაზე.
კახეთში განსაკუთრებით მაღალია საქართველოს წითელ წიგნსა და წითელ ნუსხაში შეტანილი სახეობების გამოყენების ფაქტებიც (წაბლი, კაკალი, მაღალმთის მუხა, უთხოვარი, ლაფანი). ასეთ ფაქტებზე რეგიონის სოფლების 37.9%-ში საუბრობენ“, _ აცხადებენ ორგანიზაცია "სენში“.
შეშის მოხმარების საკითხებზე ახმეტის მუნიციპალიტეტში 17 დეკემბერს იმსჯელეს. ღონისძიება ჩატარდა პროექტის "ტყეების მდგრადი მართვა საქართველოში" ფარგლებში. პროექტს ახორციელებს კავკასიის გარემოსდაცვითი არასამთავრობო ორგანიზაციების ქსელი (CENN) და ღია გარემოსდაცვითი სამოქალაქო ინიციატივა (OECI) ავსტრიის თანამშრომლობა განვითარებისთვის(ADC) ფინანსური მხარდაჭერით.
საქართველოს ენერგოპოლიტიკის პრობლემატიკაზე დაწყებული დისკუსიის ფარგლებში, რომელშიც საქართველოს რამდენიმე სამინისტრო მონაწილეობს, დაგეგმილია შეხვედრები ქვეყნის 50-მდე მუნიციპალიტეტსა და თვითმმართველ ქალაქში.
შეხვდრაზე ასევე იმსჯელეს მუნიციპალიტეტის ტერიტორიაზე ლიცენზიანტების საქმიანობის კანონიერების და სოციალური სამართლიანობის შესახებ. პრობლემურია ასევე დაცულ ტერიტორიებში არსებული რეჟიმები, რაც ადგილობრივ მოსახლეობას საარსებო მიზნებისათვის ბუნებრივი რესურსების გამოყენებას უზღუდავს. ახმეტელები ამ რესურსში, ძირითადად, ნაყარი და ზე-ხმელი ხე-ტყეს მოიაზრებენ.
"სენის“ ინფორმაციით, აღნიშნულ საკითხებთან დაკავშირებით, შეხვედრის ორგანიზატორების მხრიდან გარკვეული განმარტებები გაკეთდა.
