საქართველოს სახალხო დამცველი პრევენციის ეროვნული მექანიზმის ექსპერტთა შესარჩევ კონკურსს აცხადებს.
ომბუდსმენის აპარატის ინფორმაციით, პრევენციის ეროვნული მექანიზმის მიზნებიდან გამომდინარე, სასჯელაღსრულებით და სხვა დახურული ტიპის დაწესებულებებში ადამიანის უფლებათა ეფექტური დაცვა და მონიტორინგი საქართველოს სახალხო დამცველის უმნიშვნელოვანეს მოვალეობას წარმოადგენს.
“პრევენციის ეროვნული მექანიზმის ფარგლებში საქართველოს სახალხო დამცველის აპარატი პერმანენტულად ახდენს დაკავებულ, პატიმრობაში მყოფ ან სხვაგვარად თავისუფლებაშეზღუდულ პირთა და მსჯავრდებულთა, აგრეთვე ფსიქიატრიულ დაწესებულებებში, მოხუცთა თავშესაფრებსა და ბავშვთა სახლებში მოთავსებულ პირთა მდგომარეობის მონიტორინგს და ამოწმებს მათდამი მოპყრობას წამებისა და სხვა სასტიკი, არაადამიანური ან დამამცირებელი მოპყრობისაგან ან სასჯელისაგან დაცვის მიზნით, რეაგირებს არასათანადო მოპყრობის ფაქტებზე და სპეციალური და წლიური ანგარიშების მეშვეობით საზოგადოებას აწვდის ინფორმაციას არსებულ ვითარებაზე”, – აცხადებენ ომბუდსმენის აპარატში.
მათივე განმარტებით, პრევენციის ეროვნულ მექანიზმში მონაწილე ექსპერტები პერიოდულად იცვლებიან. ამ ეტაპზე გამოცხადებულია ვაკანსია 34 ექსპერტზე, რომელთაც სპეციალური კომისიის რეკომენდაციების საფუძველზე საქართველოს სახალხო დამცველი შეარჩევს.
კონკურსში მონაწილეობის მიღება პრევენციის ეროვნული მექანიზმის მოქმედ ექსპერტებსაც შეუძლიათ, რომელთაც უფლებამოსილება ახალი შემადგენლობის შერჩევისთანავე შეუწყდებათ.
“პრევენციის ეროვნული მექანიზმის ფარგლებში, სპეციალური პრევენციული ჯგუფის საქმიანობაში მონაწილეობას მიიღებენ დახურული ტიპის დაწესებულებების მონიტორინგის გამოცდილების მქონე იურისტები, ექიმები, ექსპერტი ჯანდაცვის საკითხებში, ფსიქიატრი, ფსიქოლოგი, სოციალური მუშაკი, დისკრიმინაციის ფაქტების იდენტიფიცირების ექსპერტები, შეზღუდული შესაძლებლობების მქონე პირი, არასრულწლოვანთა მართლმსაჯულების ექსპერტი, სამხედრო ნაწილებისა და ჰაუპტვახტების მონიტორინგის ექსპერტი”, – ამბობენ სახალხო დამცველის აპარატში.
ომბუდსმენის აპარატის ცნობით, პრევენციის ეროვნული მექანიზმის ფარგლებში, სპეციალური პრევენციული ჯგუფის წევრის საქმიანობა არ წარმოადგენს უვადო ან ვადიანი ხელშეკრულების საფუძველზე ყოველთვიურად ანაზღაურებად საქმიანობას. ჯგუფის წევრების მიერ ჩატარებული აქტივობები ანაზღაურდება ცალკეული მონიტორინგის ფარგლებში შესრულებული სამუშაოს გათვალისწინებით, ხელშეკრულების საფუძველზე.
შერჩეული კანდიდატები გაივლიან ტრენინგს საქართველოს პრევენციის ეროვნული მექანიზმის სტრუქტურის, მანდატისა და მუშაობის მეთოდოლოგიის შესახებ, ასევე გაეცნობიან მონიტორინგის როლსა და ფუნქციებს, ექსპერტების ანგარიშვალდებულების ფორმას, ქცევის წესებსა და პასუხიმგებლობის საკითხებს. ომბუდსმენის ცნობით, შერჩეული კანდიდატები გააფორმებენ ხელშეკრულებას სახალხო დამცველის აპარატთან, სადაც განსაზღვრული იქნება მხარეთა შესაბამისი უფლება-მოვალეობები და ქცევის კოდექსის დაცვის ვალდებულება.
ამასთან, სახალხო დამცველი აცხადებს, რომ პრევენციული ჯგუფის წევრები მოქმედებენ საქართველოს სახალხო დამცველის სპეციალური რწმუნების საფუძველზე და ანგარიშვალდებულნი არიან საქართველოს სახალხო დამცველის წინაშე.
