დღეს, აგრარულ საკითხთა კომიტეტში გაიმართა სამუშაო შეხვედრა, რომელზეც 2015-2020 წლებისთვის ქვეყნის სოფლის მეურნეობის განვითარების სტრატეგიის ძირითადი მიმართულებები განიხილეს. შეხვედრას კომიტეტის თავმჯდომარე გიგლა აგულაშვილი უძღვებოდა.
შეხვედრაზე კანონმდებლებთან ერთად, მოწვეული იყვნენ აღმასრულებელი ხელისუფლების, პარლამენტის სხვადასხვა სტრუქტურული დანაყოფებისა და ორგანიზაციების წარმომადგენლები.
როგორც სტრატეგიის წარდგენისას სოფლის მეურნეობის მინისტრის მოადგილემ გოჩა ცოფურაშვილმა აღნიშნა, ჩვენი ქვეყნის ეკონომიკისათვის სასიცოცხლოდ მნიშვნელოვანია სოფლის მეურნეობის პოტენციალის მაქსიმალურად ათვისება და მისი მიზნობრივი გამოყენება.
სპეციალისტთა აზრით, კი დადებითი შედეგის მიღწევის უპირველესი გარანტია მკაფიოდ განსაზღვრული, კონკურენტუნარიანი წარმოებისაკენ მიმართული აგრარული პოლიტიკის შემუშავება და ეკონომიკის ამ სექტორში ფინანსური რესურსების მოზიდვის ხელშეწყობა იქნება. სწორედ ამის გათვალისწინებით, შემუშავდა აღნიშნული სტრატეგია, რომელიც ავტორთა თქმით, სოფლის მეურნეობის განვითარების ზოგად დოკუმენტს წარმოადგენს, და რომლის შემუშავებაში სამინისტროს თანამშრომლებთან ერთად მეცნიერებათა აკადემიის წევრები, ცალკეული დარგების სპეციალისტებიც მონაწილეობდნენ.
როგორც ითქვა, დოკუმენტი მომზადდა მდგრადი განვითარების პრინციპებზე დაყრდნობით და იმის გათვალისწინებით, რომ შეიქმნას ისეთი გარემო, რომელმაც ხელი უნდა შეუწყოს აგროსასურსათო სექტორში კონკურენტუნარიანობის ამაღლებას, მაღალხარისხიანი პროდუქციის წარმოების სტაბილურ ზრდას, სასურსათო უსაფრთხოების უზრუნველყოფას, სურსათის უვნებლობასა და სოფლად სიღარიბის დაძლევას.
მომხსენებლის განცხადებით, ასეთია სოფლის მეურნეობის განვითარების სტრატეგიული ხედვა 2015-2020 წლებისათვის.
წარმოდგენილი დოკუმენტით, სოფლის მეურნეობის განვითარების სტრატეგიული ხედვის განსახორციელებლად, განისაზღვრა შვიდი ძირითადი მიმართულება. ეს მიმართულებებია: აგრარულ სექტორში დასაქმებულთა კონკურენტუნარიანობის ამაღლება; ინსტიტუციური განვითარება; მელიორაცია და ნიადაგის ნაყოფიერება; რაციონალური და დარგობრივი განვითარება – დამატებული ღირებულების შემქმნელი სრული ციკლის წარმოების განვითარების ხელშეწყობა; სასურსათო უსაფრთხოება; სურსათის უვლებლობა, ვეტერინარია და მცენარეთა დაცვა; კლიმატის ცვლილებები, გარემო და ბიომრავალფეროვნების შენარჩუნება. ამ მიმართულებების გათვალისწინებით, დაიგეგმება შესაბამისი ღონისძიებები, რომელთა მიხედვით შემუშავდება კონკრეტული მიმართულებების სამოქმედო გეგმა, მათი განხორციელების ვადებისა და დაფინანსების წყაროების მითითებით.
სტრატეგიის დამტკიცების შემდგომ შემუშავდება კონკრეტული სამოქმედო გეგმა და დარგობრივი განვითარების პროგრამები, რომელიც წარმოდგენილი იქნება პრიორიტეტების, განხორციელების ვადებისა და დაფინანსების წყაროების გათვალისწინებით.
სოფლის მეურნეობის განვითარების სტრატეგიას, მის დამტკიცებამდე, აგრარულ საკითხთა კომიტეტის სხდომაზე დეტალურად განიხილავენ. სოფლის მეურნეობის სამინისტრო კი ამ სტრატეგიის პრეზენტაციას თებერვლის დასწყისში გეგმავს.
