“გავხადოთ ქველმოქმედება ჩვენს ყოველდღიურობად”

16 იანვარს, ჩოხატაურის მუნიციპალიტეტის საკრებულოს სხდომის დასრულების შემდეგ, დეპუტატებს საკრებულოს თავმჯდომარემ ზაალ მამალაძემ განცხადებით მიმართა.

ზაალ მამალაძემ კოლეგებს მოუწოდა, რომ ქველმოქმედება მათ ყოველდღიურობად უნდა აქციონ:

_ ძალიან დიდი მადლობა მინდა გადავუხადო ყველა დეპუტატს იმ ქველმოქმედებისთვის, რომელიც ახალი წლის დღეებში გაწიეთ. თითოეულმა ჩვენგანმა თანხა საკუთარი ჯიბიდან დადო და ამ თანხით მრავალშვილიან ოჯახებს საახალწლო ნობათები გადაეცათ. მე არ მინდა, რომ ეს აქცია იყოს ერთჯერადი; ამიტომაც მოგიწოდებთ, რომ ქველმოქმედება ჩვენს ყოველდღიურობად ვაქციოთ. გამგეობაში, საკრებულოში, აიპებში, ყველა საჯარო დაწესებულებებში დავდგათ ყუთები, სადაც თანხის ჩაგდების საშუალება ნებისმიერ ადამიანს ექნება. თანხის რაოდენობას მნიშვნელობა არ აქვს _ ვისაც რა საშუალება ექნება, იმდენს გაიღებს. მინდა, რომ ეს ყუთები დაიდგას სკოლებში და მომავალმა თაობამ ისწავლოს ქველმოქმედება. გარდა ამისა, გამოვყოთ ოთახი, სადაც მოგროვდება მეორადი ტანსაცმელი, საყოფაცხოვრებო ნვთები. ჩვენს ირგვლივ უამრავი ადამიანია, რომელსაც ეს სჭირდება და ამ დღეებში, როცა ოჯახებში დავდიოდით, ამაში კიდევ ერთხელ დავრწმუნდით, _ აღნიშნა მამალაძემ.

მისივე თქმით, შეიქმნება სპეციალური კომისია, რომელიც ამ ყველაფერს გააკონტროლებს: _ მინდა, ყველა დეპუტატს მოვუწოდო, რომ თქვენს სოფლებში კარდაკარ ჩამოიაროთ და შეაგროვოთ იმ ადამიანების მონაცემები, რომლებსაც ჩვენი დახმარება სჭირდებათ. შემდგომ, ერთად გადავწყვიტოთ, ვის როგორ დავეხმაროთ, _ აღნიშნა მამალაძემ.

მისივე განცხადებით, იმ ადამიანებისთვის, რომლებიც ეკლესიიდან, ჩოხატაურის მუნიციპალიტეტის დაფინანსებით მხოლოდ პურს იღებენ, მშრალი პროდუქტების შეძენაა შესაძლებელი: _ ამ ეტაპზე, რიგი მიზეზების გამო, ვერ მოხერხდა უფასო სასადილოს გაკეთება. ჩვენ არ გვაქვს მონაცემი, ვის როგორი კვება სჭირდება. შესაძლებელია, ბენეფიციარს ჰქონდეს დიაბეტი და ჩვენი მომზადებული საჭმელი მისთვის დახმარება კი არა, მავნებელიც კი იყოს. ამიტომ, სანამ ეს თემა საბოლოდ გაირკვევა, ჩემი იდეაა, რომ მათ მივაწოდოთ მშრალი პროდუქტები, რომლის შეძენას სწორედ იმ თანხით შევძლებთ, რომელსაც ჩვენი ჯიბიდან გავიღებთ; აგრეთვე, შემოსული შემოწირულობებიდან შეიძენთ, _ დასძინა მამალაძემ.

საკრებულოს თავმჯდომარემ კოოპერატივების შექმნაზეც ისაუბრა და დეპუტატებს მოუწოდა, რომ მათ ამომრჩევლებს ინფორმაცია მიაწოდონ:

_ გასულ წელს ჩოხატაურში ორი კოოპერატივი დაფინანსდა. ლანჩხუთში _ 11. ჩვენ პოტენცია და შესაძლებლობა გვაქვს, რომ ჩოხატაურში უფრო მეტი დაფინანსდეს. ამიტომაც, მიაწოდეთ თქვენს ამომრჩევლებს მეტი ინფორმაცია, დაეხმარეთ პროექტების მომზადებაში, რაც მათ შემოსავალზე პირდაპირ აისახება. ამ მიზნით ჩვენ მობილურ საბჭოსაც შევქმნით, _ აღნიშნა მამალაძემ.