დღეს, ლანჩხუთის მუნიციპალიტეტის საკრებულოს კიდევ ერთი რიგგარეშე სხდომა შედგა, რომლის დღის წესრიგი მხოლოდ ერთი საკითხით განისაზღვრა – ლანჩხუთის მუნიციპალიტეტში მიმდინარე წელს განსახორციელებელი ინფრასტრუქტურული პროექტების შერჩევის შესახებ.
სანამ უშუალოდ საკითხის განხილვა მოხდებოდა, მუნიციპალიტეტის გამგებელმა, ზაზა ურუშაძემ, განმარტება გააკეთა თუ რატომ დადგა ამ საკითხის განხილვის აუცილებლობა ასე საჩქაროდ. მისი საუბრიდან გაირკვა, რომ ინფრასტრუქტურის სამინისტრომ მოითხოვა მუნიციპალიტეტების საკრებულოებმა თებერვლამდე აუცილებლად მოახდინონ პროექტების საკრებულოს სხდომებზე განხილვა და შესაბამისი განკარგულებების დამტკიცებაო.
გასული წლის ბოლოს დეპუტატებმა მუნიციპალიტეტის განვითარების სტრატეგიული გეგმის შესახებ იმსჯელეს და 2015 წელს განსახორციელებელი ინფრასტრუქტურული პროექტების ირგვლივ კითხვები და შენიშვნები წესით არც უნდა ყოფილიყო. თუმცა საკითხზე მომხსენებელს, გამგეობის ინფრასტრუქტურისა და არქიტექტურის სამსახურის უფროსს, ლევან ჩხაიძეს რამდენიმე საკითხზე განმარტების გაკეთება მაინც დასჭირდა.
დეპუტატი, გია გოგუაძე ჩოჩხათი-გულიანის გზის რეაბილიტაციის თანხებით დაინტერესდა -"500 ათასი ლარი რატომ იხარჯება ჩვენი მხრიდან ამ გზის მშენებლობაზე, როცა მუნიციპალური განვითარების ფონდი (მგფ) ახორციელებს ამ პროექტს?"
ამ კითხვაზე ურუშაძემ გასცა პასუხი -"მოგეხსენებათ, ეს ორწლიანი პროექტია და თავიდან დაგეგმილ თანხას დაახლოებით 450 ათასი ლარი დაემატა და რამენაირად საამისო სახსრები გამოსაძებნი გვექნება".
სუფსის მაჟორიტარმა, ჯუმბერ ბლაგიძემ სუფსაში საბავშვო ბაღის რეაბილიტაციის თანხები ამ პროექტში ვერ მოიძია და აღმოჩნდა, რომ ბაღის განახლებას მგფ-ი განახორციელებს. აი, ლესელთა რჩეულმა ელისო ჭიჭინაძემ აქტიურად გააპროტესტა ის ფაქტი,რომ აღნიშნულ პროექტში ლესაზე არაფერი ეწერა.
დეპუტატი ზაზა ურუშაძემ დაამშვიდა -"არ ვიცი ლესა რატომ დარჩა ასე უყურადღებოდ, მაგრამ ვეცდებით ტენდერებიდან დარჩენილი ეკონომიის თანხებით გავითვალისწინოთ თქვენი პრობლემები."
ნაცმოძრაობის დეპუტატმა, კახა ასკურავამ გაზიფიცირების სამომავლო გეგმების შესახებ იკითხა.
"წინა ხელისუფლების დროს 2014 წელს გაზიფიცირება უნდა დაწყებულიყო შუხუთის და ნიგოითის ადმინისტრაციულ ერთეულებში და წელს უნდა დასრულებულიყო. დღესდღეობით კი არსად არაფერი კეთდება ამ მხრივ.
მოვიწვიოთ ერთი "სოკარის" წარმომადგენლები და გვითხრან თუ რა გეგმები აქვთ სამომავლოდ". ურუშაძემ მოგვიანებით უპასუხა ასკურავას და კახა კალაძესთან შეხვედრის დეტალებზე ისაუბრა , სადაც ენერგეტიკის მინისტრმა დაპირება მოგვცა, რამდენიმე სოფლის გაზიფიცირებას აუცილებლად განვახორციელებთ უახლოეს მომავალშიო.
შუხუთში მიმდინარე წელს ინფრასტრუქტურული პროექტების კუთხით მხოლოდ წყლის რეაბილიტაციის პროექტი უნდა განხორციელდეს. ამაზე უკმაყოფილო ჩანდა შუხუთის მაჟორიტარი დეპუტატი, აკაკი იმნაიშვილი. "სოფლის ცენტრში ძველი კლუბის უზარმაზარი შენობა თვალსა და ხელს შუა გვენგრევა,ცუდ მდგომარეობაშია ადმინისტრაციული შენობაც.
ახალ ბაღებს რომ ვაშენებთ, კარგია, მაგრამ ძველები რომ ინგრევა, ეს ცუდია. უნიკალური შენობაა შუხუთში, რომლის აღდგენა ქალაქის ბაღებსაც განტვირთავს, მაგრამ წელს ამაზე თეთრიც არაა დაგეგმილი. 2016 წლისთვის კი რაც დარჩა ისიც დაგვენგრევა", _ აღნიშნა იმნაიშვილმა.
