" საყდრისის განადგურების გამო პასუხისმგებლობა ადრე თუ გვიან დაეკისრებათ არა მხოლოდ იმ ჩინოვნიკებსა და მეცნიერებს, რომლებმაც ძეგლს ჯერ სტატუსი მოუხსნეს, შემდეგ კი ააფეთქეს, არამედ თქვენც, საქართველოს პარლამენტის დეპუტატებს, რადგან თქვენი უმოქმედობით ხელს უწყობთ საყდრისზე ნგრევა-აფეთქებითი სამუშაოების გაგრძელებას და ხელოვნურად აჭიანურებთ საგამოძიებო კომისიის შექმნას.“-ნათქვამია განცხადებაში, რომლითაც საყდრისის გადარჩენის საზოგადოებრივი კომიტეტი საქართველოს პარლამენტის დეპუტატებს მიმართავს.
„საყდრისის გადარჩენის საზოგადოებრივმა კომიტეტმა“ 2015 წ. 26 იანვარს მოგაწოდათ ამომწურავი ინფორმაცია საყდრისის – მსოფლიოში აღიარებული ოქროს უძველესი მაღაროს შესახებ (მასალა გადმოგეგზავნათ პარლამენტის საიტზე მითითებულ თქვენს ელექტრონულ მისამართებზე).
ხოლო, „ ქართული ოცნებისა“ და „მრეწველების“ ფრაქციების წევრებს 2015 წ. 16 თებერვალს დამატებით დაგირიგდათ მიმართვა, სადაც კიდევ ერთხელ მოგიწოდებდით, რომ პატივი გეცათ პარლამენტის გადაწყვეტილებისათვის საყდრისის საკითხების შემსწავლელი საგამოძიებო კომისიის შექმნის მიზანშეწონილობასთან დაკავშირებით და დროულად წარმოგედგინათ კომისის წევრობის კანდიდატები.
საყდრისის უძველესი მაღაროს მიზანმიმართული განადგურებით, რაც დღესაც მიმდინარეობს, საქართველოს მთავრობამ უხეშად დაარღვია არა მარტო ადგილობრივი კანონმდებლობა, არამედ საერთაშორისოდ აღიარებული კონვენციები. დარღვეულია საქართველოს ძირითადი კანონის, საქართველოს კონსტიტუციის ყველა დებულება, რომელიც იცავს საქართველოს კულტურულ მემკვიდრეობას, კერძოდ, კონსტიტუციის 34 მუხლის 1 და მე-2 პუნქტი, 37 მუხლის მე- 3 და მე- 4 პუნქტები.
ამ ქმედებით საქართველომ დაარღვია ყველა უმნიშვნელოვანესი საერთაშორისო შეთანხმება კულტურის დარგში, კერძოდ, ორჰუსის კონვენციის მე-6 მუხლი, ადამიანის უფლებათა საყოველთაო დეკლარაცია (1948), ეკონომიკურ, სოციალურ და კულტურულ უფლებათა საერთაშორისო პაქტი (1966) და სამოქალაქო და პოლიტიკურ უფლებათა საერთაშორისო პაქტი (1966), 1972 წლის კონვენცია მსოფლიო ბუნებრივი და კულტუურლი მემკვიდრეობის დაცვის შესახებ.
საყდრისის განადგურების გამო პასუხისმგებლობა ადრე თუ გვიან დაეკისრებათ არა მხოლოდ იმ ჩინოვნიკებსა და მეცნიერებს, რომლებმაც ძეგლს ჯერ სტატუსი მოუხსნეს, შემდეგ კი ააფეთქეს, არამედ თქვენც, საქართველოს პარლამენტის დეპუტატებს, რადგან თქვენი უმოქმედობით ხელს უწყობთ საყდრისზე ნგრევა-აფეთქებითი სამუშაოების გაგრძელებას და ხელოვნურად აჭიანურებთ საგამოძიებო კომისიის შექმნას.
ყოველივე ზემოაღნიშნულიდან გამომდინარე მოვითხოვთ დროულად დააკომპლექტოთ საყდრისის საკითხების შემსწავლელი დროებითი კომისია, რათა ერთხელ და სამუდამოდ დადგინდეს პრეისტორიული ძეგლის განადგურების მიზანშეწონილობა. გადაწყვეტილების მისაღებად საჭიროა 76 ხმა. ჩვენს მიერ პარლამენტარებთან ჩატარებული წინასწარი კონსულტაციების მიხედვით ეს რაოდენობა თავისუფლად გროვდება, მაგრამ ამისთვის საჭიროა კომისიის შექმნის მომხრე ყველა პარლამენტარის დასწრება და მხარდაჭერა.
იმედი გვაქვს, რომ თქვენ, საქართველოს პარლამენტის წევრები, ღირსეულად შეასრულებთ თქვენს მოვალეობას და ერთდროულად გადარჩენთ როგორც ძეგლს ,ასევე ქვეყნის იმიჯს საერთშორისო ასპარეზზე. _ ნათქვამია მიმართვაში, რომელსაც საყდრისის გადარჩენის საზოგადოებრივი კომიტეტი ავრცელებს.
