საქართველოს ფინანსთა მინისტრის, ნოდარ ხადურის განცხადებით, სახელმწიფო ქონების უკანონოდ ჩამორთმევის შედეგად დაზარალებულ მოქალაქეებს გადახდის სხვადასხვა ალტერნატივას შეთავაზებს.
როგორც ხადურმა დღეს პროკურატურის ახალი დეპარტამენტის პრეზენტაციის შემდეგ განაცხადა, ბიუჯეტში ფონდი სასამართლო გადაწყვეტილების აღსრულებისთვის დღესაც დევს.
მისივე განმარტებით, შესაბამისი თანხა სასამართლო გადაწყვეტილების აღსრულების ფონდში ირიცხება.
"წინა ხელისუფლების დროს ჩამორთმეული ქონებების დიდი ნაწილი გაუსხვისებელია, მათ შორის ეკონომიკის სამინისტროს შეწყვეტილი ჰქონდა იმ ობიექტების პრივატიზაცია, რაზეც დავა მიმდინარეობდა. ჩვენ დაველოდებით გამოძიების დასრულებას და სასამართლო გადაწყვეტილების შესაბამისად ვიმოქმედებთ. დღესაც დევს ბიუჯეტში სასამართლო გადაწყვეტილების აღსრულების ფონდში ფული. თავისთავად ცხადია, იმის მიხედვით, რა თანხაზე იქნება საუბარი, დაზარალებულ მოქალაქეებს გადახდის სხვადასხვა ალტერნატივას შევთავაზებთ ", _ განაცხადა ხადურმა.
ეკონომიკისა და მდგრადი განვითარების მინისტრისა და ვიცე-პრემიერის, გიორგი კვირიკაშვილის გამცხადებით, სახელმწიფოს, ამ ორი წლის განმავლობაში საპრივატიზაციოდ არ გამოუტანია ის ქონებები, რომელთან დაკავშირებითაც არსებობდა ეჭვი, რომ კანონიერი მფლობელისთვის შესაძლოა, უკანონოდ ყოფილიყო ჩამორთმეული.
მისივე განმარტებით, იმ შემთხვევაში, თუ გამოძიება კონკრეტული პირისთვის ქონების უკანონოდ ჩამორთმევას დაადასტურებს, სახელმწიფოს მფლობელობაში არსებული შესაბამისი ქონება კანონიერ მფლობელს დაუბრუნდება.
"პროკურატურამ ძალიან მნიშვნელოვანი სამუშაოები ჩაატარა. მოხდა ყველა შემთხვევის სისტემატიზაცია და დახარისხება. ჩვენს სამინისტროსთან ერთად იქნა შეფასებული ის წინასწარი სურათი, რაც ქონების წართმევის შემთხვევას უკავშირდება. ჩვენ ამ ორი წლის განმავლობაში არ შევხებივართ იმ ქონებას და არ გაგვიტანია საპრივატიზაციოდ, რომელთა მიმართებაშიც იყო ინფორმაცია, რომ შესაძლოა, დანაშაულის ჩადენას ჰქონოდა კავშირი. შესაბამისად, თუკი გამოძიებით დადგინდება, რომ ადგილი ჰქონდა კანონიერი ქონების ჩამორთმევის ფაქტებს, რა თქმა უნდა, მთავრობა გადადგამს შესაბამის ნაბიჯებს და ქონება დაუბრუნდება კანონიერ მფლობელს", _ განაცხადა გიორგი კვირიკაშვილმა.
რაც შეეხება იმ შემთხვევას, როცა ჩამორთმეული ქონება სახელმწიფო საკუთრებაში არ ირიცხება, ვიცე-პრემიერის თქმით, ამ კუთხითაც მთავრობას კონკრეტული გეგმა აქვს.
"სახელმწიფოს აქვს სხვადასხვა მექანიზმი, მათ შორის, სხვა ქონებით ჩანაცვლების მექანიზმი, ასევე ეს არის ობლიგაციების მექანიზმი", _ აღნიშნა ვკვირიკაშვილმა და დასძინა, რომ სამართლიანობის აღდგენაზე "ორი აზრი არ არსებობს".
როგორც ეკონომიკის მინისტრმა განმარტა, სახელმწიფოს საკუთრებაში ამ დროისთვის შვიდასამდე ერთეულია, რომელთან დაკავშირებითაც უკანონოდ ჩამორთმევის შესახებ ეჭვი არსებობს.
იუსტიციის მინისტრის, თეა წულუკიანის განცხადებით კი, მრავალი საქმეა, რომელიც შეიძლება, ნაკლები ფინანსური დანახარჯით მოგვარდეს.
როგორც წულუკიანმა სამართალწარმოების პროცესში ჩადენილ დანაშაულის გამოძიების დეპარტამენტის პრეზენტაციის შემდეგ ჟურნალისტებს განუცხადა, არაერთი ქონება, რომლის ჩამორთმევაც წლების წინ უკანონოდ მოხდა, ჯერ კიდევ სახელმწიფოს ხელშია.
"მიუხედავად იმისა, რომ მრავალი მოქალაქისთვის სამართლიანობა უკვე აღდგა, ეს არ არის საკმარისი. საჭირო იყო სპეციალური ორგანოს არსებობა, რომ ეს საქმე მივიდეს ბოლომდე და დაუსჯელობის სინდრომი არა მხოლოდ აღმოიფხვრას, არამედ არასდროს არც ერთი ხელისუფლების პირობებში განმეორდეს მსგავსი რამ. ასე რომ, მინდა წარმატება ვუსურვო ამ დეპარტამენტს. რაც შეეხება დახარისხებულ საქმეებს, იკვეთება ერთი მარტივი რამ, რომ როგორც ჩვენ ვვარაუდობდით, ხდებოდა სახელმწიფოს ხელით ქონების ჩამორთმევა, რასთან დაკავშირებითაც რამდენიმე ასეული საქმე არსებობს. თუმცა მეორე მხრივ, კარგია ის, რომ არაერთი ქონება, თუ არა უმრავლესობა, ჯერ კიდევ სახელმწიფოს ხელშია და ეკონომიკის სამინისტრო იმუშავებს იმისთვის, რომ დაზარალებულებს უფლებები პირველ რიგში ამ ნაწილში აღუდგეს. საქმეების დახარისხება აჩვენებს, რომ არის მრავალი საქმე, რომელიც შეიძლება იყოს ნაკლები ფინანსური დანახარჯით მოგვარებული. ვგულისხმობ, სწორედ ამ ტიპის საქმეებს, რომელიც ეხება უკანონოდ ჩამორთმეულ ქონებებს", _ აღნიშნა წულუკიანმა.
ცნობისთის, 2012 წლის პირველი ოქტომბრიდან 2015 წლის პირველ იანვრამდე საქართველოს მთავარ პროკურატურაში ჯამში 52 530 საჩივარ-განცხადება შევიდა.
"პროკურატურაში შემოსული განცხადებების დახარისხების პროცესში გამოიკვეთა, რომ 697 ერთეული ქონება ჩამორთმევის ფაქტს შეეხება, რასთან დაკავშირებითაც, დაზარალებულები გამოძიების დაწყებას მოითხოვენ", _ აღნიშნავს ნადარეიშვილი.
ამავე თამაზე:
ვის დაუბრუნდება ქონება და რა საქმეებს გამოიძიებს პროკურატურის ახალი დეპარტამენტი
გონიოში 271 ოჯახი რამდენიმე საათში წართმეული მიწის დაბრუნებას ითხოვს
