საზოგადოებისთვის არაერთი შემთხვევაა ცნობილი, როდესაც სახელმწიფოსაგან სოციალურ დახმარებას იღებდა ოჯახი, რომელსაც ამის საჭიროება არ ჰქონდა და, პირიქით _ დახმარების გარეშე რჩებოდნენ რეალურად გაჭირვებული და შემოსავლის არმქონე პირები.
ქალაქ ოზურგეთში, წმინდა გიორგის ქუჩაზე მცხოვრებნი, და-ძმა ცირა და ავთო კაპატაძეები სოციალური მომსახურების სააგენტოდან წლების განმავლობაში იღებდნენ დახმარებას. მათ რამდენიმე თვის წინ დედა გარდაეცვალათ, შესაბამისად, დახმარებაც მოეხსნათ. ავთო კაპატაძე შრომისუუნაროა. და-ძმა, დედის სიცოცხლეში, თავს პენსიითა და სოციალური დახმარებით ირჩენდნენ, დღეს მათი ყოველდღიურობა ძალიან მძიმეა.
"უამრავი პრობლემა გვაქვს, არც ერთი არ ვმუშაობთ, ან სად არის სამუშაო? დამლაგებლის ადგილიც ვერ ვიშოვნე. ძმა ავადმყოფია, სმენადაქვეითებული, წამლები ყოველდღიურად ესაჭიროება, ორჯერ ინფარქტიც ჰქონდა და ფიზიკური შრომა არ შეუძლია, სოციალური დახმარება დედის გარდაცვალების შემდეგ მოგვიხსნეს. სად არ დავდივარ, ვითხოვ დახმარებას, მაგრამ არავინ ყურადღებას არ გვაქცევს. სოციალური დახმარება არ დაგვენიშნა. ვიყავი ქალაქ ოზურგეთის მერთან შეხვედრაზე, მან მითხრა, სოციალურ სააგენტოს მიმართეო. იქ მითხრეს, სანამ ერთი წელი არ გავა, განცხადების დაწერას აზრი არ აქვსო. დედა სანამ გვყავდა, მისი პენსიით და სოციალური დახმარებით ვირჩენდით თავს. ახლა არანაირი შემოსავალი არ გაგვაჩნია. მეზობლები გვაძლევენ საჭმელს", _ ამბობს ცირა კაპატაძე "გურია ნიუსთან".
ანალოგიურ მდგომარეობაშია ქალაქ ოზურგეთში, იაკობ შემოქმედელის ქუჩაზე მცხოვრები ელიკო ქარჩავას ოჯახი.
პენსიონერი ელიკო ქარჩავა უფასო სასადილოს ბენეფიციარია.
"სოციალურად დაუცველი ოჯახების სიაში წლების განმავლობაში ვიყავით. დახმარება მას შემდეგ მოგვიხსნეს, რაც ჩემი შვილი ციხიდან გამოუშვეს. უკანონო პატიმარი იყო. ციხეში დაავადმყოფდა, ხერხემლის პრობლემა აქვს, ფიზიკურად შრომის უუნაროა. არც პენსიას იღებს და არც დახმარებას. იქნებ, დაგვეხმაროთ, ხედავთ, სახლი რა მდგომარეობაშია _ თავზე გვაწვიმს. აქამდე თუ ვიღებდი სოციალურ დახმარებას, ახლა რამე მაქვს მომატებული? ყველა ჩემი პენსიის შემყურე ვართ _ ვიყოფთ ლუკმას. მე უფასო სასადილოს ბენეფიციარი ვარ. ამომაქვს ჩემი ულუფა საჭმელი სახლში და ხან მე ვჭამ, ხან _ ჩემი შვილი. გაზის მილი ჭიშკართან გვაქვს და სახლში ვერ შემოვიყვანე. როგორია შიმშილი, სიცივე და ავადმყოფობა ერთად? ამის მეტად ხელისუფლება ჩვენნაირ ღატაკებს არ უნდა დაეხმაროს?"_ ამბობს ელიკო ქარჩავა "გურია ნიუსთან".
სოციალური მომსახურების სააგენტოს გურიის სოციალური მომსახურების სამხარეო ცენტრის უფროსის მოადგილის მოვალეობის შემსრულებელი ვანო გოგოლაშვილი "გურია ნიუსთან" განმარტავს, რომ 1 აპრილიდან იცვლება ქულების მინიჭების წესები და არსებითად შეიცვლება ყველაფერი:
"რა თქმა უნდა, სიმდიდრით ეს ოჯახები არ გამოირჩევიან, მაგრამ აქვთ მაღალი ქულები, განსაკუთრებულს ვერაფერს გეტყვით _ ჩემს მოსაზრებას, ამ შემთხვევაში, აბსოლუტურად არანაირი მნიშვნელობა არ აქვს. ეს ხდება პროგრამულად, რაც კარგად იცის ყველამ. 1 აპრილიდან იცვლება ეს წესები და არსებითად შეიცვლება ყველაფერი. რაღაც ნივთებს აღარ ექნება მნიშვნელობა. ამ ოჯახებიდან ერთ-ერთს საპოლისე ქულები აქვს, რაც იმას ნიშნავს, რომ ის სახელმწიფოსგან დახმარებას იღებს, ეს გარკვეული შეღავათია.
პირველი აპრილიდან მოვიდნენ ჩვენთან ამ ოჯახის წარმომადგენლები და გავივლი მათთან ერთად აღნიშნულ თემას", _ ამბობს გოგოლაშვილი.
ქალაქ ოზურგეთის მერიის პრესსამსახურში აღნიშნულ ოჯახებთან დაკავშირებით ასეთ კომენტარს აკეთებენ:
"ჩვენთვის ცნობილია ცირა და ავთო კაპატაძეების სოციალური მდგომარეობის შესახებ. შესაბამისად, კაპატაძეებს ქალაქის მერიის სოციალურმა სამსახურმა გასული წლის დეკემბერსა და მიმდინარე წლის დასაწყისში, ერთჯერადი დახმარების პროგრამის ფარგლებში, გაუწია დახმარება _ კაპატაძეებს ანგარიშზე 100-100 ლარი ჩაერიცხათ. რაც შეეხება ქალბატონ ელიკო ქარჩავას, მან ქალაქის მერიას განცხადებით 27 იანვარს მიმართა. განცხადების შემოტანიდან რამდენიმე დღეში, 3 თებერვალს მას ერთჯერადი დახმარების სახით ანგარიშზე 100 ლარი დაერიცხა", _ აღნიშნავს პრესსამსახური.
იურიდიული დახმარების იურისტი ია მემარნიშვილი "გურია ნიუსთან" აღნიშნავს, რომ ეს მოქალაქეები მიმართავენ დახმარებისთვის ადგილობრივ თვითმმართველობებს, გამგებლებს თუ ქალაქის მერებს, "მაგრამ მათი დახმარება მხოლოდ შემოიფარგლება იმით, გამგებელი თუ მერი დახმარებისთვის მისულ მოქალაქეს აგზავნიან იურისტებთან:
"ეს არ არის სწორი გზა. მათ კომპეტენციაში, მართალია, არ შედის სააგენტოებზე თავდასხმა და ხელის ქნევა, მაგრამ შეუძლიათ, უმუშევრობის გამო ღატაკად ქცეულ ჩვენს მოქალაქეებს უშუამდგომლონ ამ სამსახურებთან. შუამდგომლობებში აღნიშნონ, რომ უჭირთ ამ ადამიანებს ეკონომიურად, არ აქვთ შემოსავლის წყარო და მიეცეთ კანონით დადგენილი საარსებო შემწეობის მიღების შესაძლებლობა.
ზოგადად, ძალიან უჭირს ჩვენს მოსახლეობას. ხანდახან ვფიქრობ, ილუზიონისტები ვართ _ 6, 7, 8 -სულიანი ოჯახი მხოლოდ ერთი პირის პენსიით რომ არსებობს თვიდან თვემდე. რაც შეეხება ჩემთან მოსული მოქალაქეების გულისწყრომას, ისინი, თავიანთი ოჯახების არასწორად და უკანონოდ შეფასების გამო უჩივიან აგენტებს. მათი ასეთი ქმედებით ირღვევა კანონიერი უფლებები. მოქალაქე ელიკო ქარჩავა აღნიშნავს, რომ მას გასულ წელს ეძლეოდა საარსებო შემწეობა, მაგრამ მოხდა ოჯახის ხელმეორედ გადამოწმება და ოჯახი შეფასდა მაღალი სარეიტინგო ქულით. მის ოჯახში უარესი მდგომარეობაა, არათუ უკეთესი. ჰყავს ავადმყოფი შვილი, რომელსაც სისტემატურად ესაჭიროება სამედიცინო დახმარება; ჰყავს რძალი, რომელიც არ მუშაობს. მხოლოდ მისი პენსიაა ამ ოჯახის ერთადერთი შემოსავალი. რა კრიტერიუმით შეაფასა მასთან მისულმა სოციალურმა აგენტმა მათი ეკონომიკურ-სოციალური მდგომარეობა?! დეკლარაციაში, თითქოს, ყველაფერი განულებულია, მაგრამ სწორედ აქ იმალება, როგორც იტყვიან, "ძაღლის თავი" _ დეკლარაციის ბოლო გვერდს ავსებს აგენტი თავისი სუბიექტური მოსაზრების საფუძველზე. ამ ბოლო გვერდს, რატომღაც საიდუმლო ტაბუ ადევს და ყველასთვის, მით უფრო, რიგითი მოქალაქისთვის, ხელმიუწვდომელია!” _ ამბობს იურისტი.
ცირა კაპატაძე
ელიკო ქარჩავა
