თავდაცვისა და უშიშროების კომიტეტის სხდომაზე თავდაცვის მინისტრს, მინდია ჯანელიძეს მოუსმინეს. მინისტრმა კომიტეტის წინაშე სამინისტროში მიმდინარე რეფორმებზე, განხორციელებულ სამუშაოებზე და დაგეგმილ ღონისძიებებზე მოცულობითი ინფორმაცია წარმოადგინა. მისი ინფორმაციით, ოკუპირებული ტერიტორიების ე.წ. ხელისუფლების წარმომადგენლებსა და რუსეთის ფედერაციას შორის გაფორმებულმა ხელშეკრულებებმა საქართველოს უსაფრთხოების გარემო მნიშვნელოვნად შეცვალა და აღნიშნული ქმედებები მინისტრმა, რუსეთის მიერ ოკუპირებული ტერიტორიების ანექსიისკენ გადადგმულ ნაბიჯად შეაფასა.
მანვე ოკუპირებულ ტერიტორიებზე რუსეთის სამხედრო დისლოცირებულ კონტინგენტზე და იქ არსებულ ცოცხალ ძალასა და სამხედრო ტექნიკაზე ინფორმაცია წარმოადგინა. ანგარიშის წარდგენისას მინდია ჯანელიძემ განსაკუთრებული ყურადღება ნატო-საქართველოს ურთიერთობებზე გაამახვილა. მისი განცხადებით, უელსის სამიტზე საქართველოსთვის არსებითი პაკეტის მინიჭებით, ჩრდილოატლანტიკური ალიანსის ინტეგრაციის კუთხით მნიშვნელოვანი ნაბიჯი გადაიდგა.
_ ჩვენი წარმატებული სვლა ნატო-სკენ კიდევ უფრო გაღრმავდება ნატო-საქართველოს არსებითი პაკეტის იმპლემენტაციის პროცესში, რაც ხელს შეუწყობს ჩვენი ქვეყნის შეირაღებული ძალების შემდგომ განვითარებასა და ქვეყნის თავდაცვითი პოტენციალის გაძლიერებას, _ განაცხადა თავდაცვის მინისტრმა.
მისივე ინფორმაციით, ამ ეტაპზე აქტიური მოქმედებები მიმდინარეობს ნატოს ძირითადი ჯგუფის ჩამოყალიბების საკითხში და უკვე მაისის ბოლოს, საქართველოში ნატოს ჯგუფი იმუშავებს, რომელიც არსებითი პაკეტის იმპლემენტაციის პროცესს დააკვირდება და სპეციალურ კონცეფციებს შეიმუშავებს.
მინდია ჯანელიძემ საერთაშორისო მისიებში ქართველი სამხედრო მოსამსახურეების მონაწილეობაზე ისაუბრა და აღნიშნა, რომ სამხედრო კონტრიბუციის თვალსაზრისით საქართველო მეორე ადგილზეა მისიებში ჩართულ ქვეყნებს შორის. საერთაშორისო ურთიერთობებზე საუბრისას, მინისტრმა ცალკე გამოყო ორმხრივი ურთიერთობები და განაცხადა, რომ სამინისტრო ამ მიმართულებით აქტიურად განაგრძობს მუშაობას, რასაც მოწმობს ერთობლივი თეორიული და სამხედრო სწავლებები.
"პროფესიული სამხედრო დონის ამაღლებისთვის, როგორც სამოქალაქო, ასევე სამხედრო ოფისი მუდმივ კომუნიკაციაშია ჩვენ პარტნიორ ქვეყნებთან, რაც საქართველოს თავდაცვისუნარიანობის გამტკიცებას და გაძლიერებას განაპირობებს", – აღნიშნა მინდია ჯანელიძემ.
მინისტრმა ევროკავშირთან ურთიერთობის სამხედრო ნაწილიც მიმოიხილა და აღნიშნა, რომ აფრიკის სამშვიდობო მისიაში ქართველი ჯარისკაცების მონაწილეობა ევროკავშირთან ინტეგრაციის მიმართ მნიშვნელოვან ნაბიჯს წარმოადგენს.
საქმიანობის ანგარიშის წარდგენისას, თავდაცვის მინისტრმა უწყების ტრანსფორმაციის საკითხებზე, მიმდინარე რეფორმებზე და მოსალოდნელ შედეგებზე ისაუბრა. მან ყურადღება სამხედრო განათლებასა და პერსონალის მართვაზე, სამხედრო მოსამსახურეების კვებითი უზრუნველყოფის საკითხებზე, სოციალურ დაცვასა და პროფესიულ სასწავლო ცენტრების მნიშვნელობაზე გაამახვილა. მინდია ჯანელიძემ ლოგისტიკური უზრუნველყოფის გაუმჯობესების მიმართულებებზე, ავტოპარკის ახალ ელექტრონული მართვის სისტემებზე, სტანდარტიზაციის დანერგვასა და ხარისხის კონტროლის მექანიზმების შემოღებაზეც ისაუბრა და აღნიშნა, რომ ყველა ეს ღონისძიება და სამინისტროს ქმედება ნატოსთან თავსებადობის და მისი სტანდარტების დანერგვის უზრუნველყოფას უკავშირდება.
გამოსვლის დასრულების შემდეგ თავდაცვის მინისტრმა პარლამენტის წევრების მრავალრიცხოვან შეკითხვებს უპასუხა და რიგ საკითხებთან დაკავშირებით დამატებითი ინფორმაციები წარმოადგინა. მინისტრის შემდეგ საკომიტეტო ტრიბუნა ფრაქციების წარმომადგენლებს დაეთმოთ, რომლებმაც მინდია ჯანელიძის და სამხედრო უწყების საქმიანობას პოლიტიკური შეფასებები მისცეს.
კომიტეტის თავმჯდომარემ, ირაკლი სესიაშვილმა მადლობა გადაუხადა მინისტრს და შეიარაღებული ძალების წარმომადგენლებს კომიტეტში სტუმრობის და საინტერესო მოხსენების წარმოდგენის გამო. მისი განცხადებით, მიმდინარე მოწვევის პარლამენტმა კარგი ტრადიცია დანერგა, რაც მინისტრების საქმიანობის ანგარიშის გაცნობას შეეხება, ეს კი საკანონმდებლო ორგანოს კარგ საშუალებას აძლევს საზედამხედველო ფუნქციების უკეთ განხორციელებაში.
ირაკლი სესიაშვილმა სამხედო უწყებას და მის ხელმძღვანელობას ქვეყნის კეთილდღეობისათვის და თავდაცვისუნარიანობის გამტკიცების მიმართ სამომავლო საქმიანობაში წარმატებები უსურვა. ანგარიშის წარდგენის შემდეგ თავდაცვის მინისტრთან შეხვედრა ნდობის ჯგუფის წევრებთან დახურულ ფორმატში გაგრძელდა.
