დღეს აგრარულ საკითხთა კომიტეტში, კომიტეტის წევრებისა და სოფლის მეურნეობის მეცნიერებათა აკადემიის წარმომადგენლების მონაწილეობით, გაიმართა სამუშაო შეხვედრა, რომელზეც "საქართველოს ტერიტორიაზე წარმოებული და იმპორტირებული მცენარეული ცხიმების და მათ ბაზაზე წარმოებულ პროდუქტებში არსებული ტრანს- იზომერული ცხიმების ადამიანის ჯანმრთელობაზე მავნე ზემოქმედების გამოვლენის ალბათობისა და სიმძიმის შეფასების" საკითხზე იმსჯელეს. სამუშაო შეხვედრაში და დისკუსიაში მონაწილეობდნენ ასევე სამთავრობო სტრუქტურებისა და არასამთავრობო ორგანიზაციების, ბიზნეს წრეების წარმომადგენლები, ექსპერტები.
აღნიშნულ თემაზე რისკის შეფასების სამეცნიერო საკონსულტაციო საბჭოს წევრების მიერ შესწავლილ და შემუშავებულ მეცნიერთა დასკვნასა და სურსათში ტრანს-იზომერული ცხიმების რეგულირებასთან დაკავშირებით რისკის შეფასების სამსახურის რეკომენდაციებზე სოფლის მეურნეობის მეცნიერებათა აკადემიის აკადემიკოსმა ზურაბ ცქიტიშვილმა ისაუბრა. მისი ინფორმაციით, მდგომარეობა შეიძლება ითქვას, რომ არა თუ სასურველი, საგანგაშოც კია.
ტრანს-ცხიმების გამოყენება კვების ინდუსტრიაში იწვევს უამრავ დაავადებას, მათ შორის: გულსისხლძარღვთა იშემიურ დაავადებებს, რეპროდუქციული ფუნქციის დაზიანებას, ასევე დიაბეტის, დეპრესიის, ალცჰეიმერისა და ონკოლოგიური დაავადებების განვითარებას.
აღნიშნულის თაობაზე მეტყველებს სხვადასხვა ქვეყნებსა და სამეცნიერო ცენტრებში განხორციელებული კვლევები. ჯანმრთელობის მსოფლიო ორგანიზაცია (WHO) რეკომენდაციასაც კი იძლევა, რომ 2025 წლისათვის ტრანს-ცხიმები საერთოდ უნდა იყოს გამქრალი ადამიანთა კვების რაციონიდან.
როგორც ზურაბ ცქიტიშვილმა განაცხადა, WHO-ს რეკომენდაციების საფუძველზე, ტრანს-ცხიმების გამოყენების შემცირების მიზნით, კარგი იქნება თუ კი განხორციელდება შემდეგი ღონისძიებები: საკვები პროდუქციის აუცილებელი მარკირება და ნაციონალურ დონეზე საკანონმდებლო აკრძალვის დაწესება, სწორედ ამ მოტივით მიმართავენ პარლამენტს.
რისკის შეფასების სამსახურის მიერ მოკვლეული და მოწოდებული მონაცემების საფუძველზე, ბევრ ქვეყანაში არსებული საკანონმდებლო რეგულაციებით, მაქსიმალურად იზღუდება ტრანს-ცხიმების გამოყენება კვების ინდუსტრიაში. ამავდროულად კი საქართველოს მოსახლეობის უმეტესი ნაწილის მიერ, რაციონში გამოყენებული ცხიმების მთლიან რაოდენობაში გაზრდილია სპრედებისა და მარგარინის ხვედრითი წილი, რაც მნიშვნელოვნად ზრდის მოხმარებული ცხიმის საერთო მოცულობაში ჰიდროგენიზებული ცხიმების და, შესაბამისად, რისკის შემცველი, ინდუსტრიული ტრანს-ცხიმების შემცველობის ალბათობას.
დისკუსიაში მონაწილეთა განცხადებით, აუცილებლად უნდა ვიფიქროთ ბავშვებზე, ახალგაზრდებზე, რომლებიც უმეტესწილად სწრაფი კვების ობიექტების მომხმარებლებს წარმოადგენენ, ეს ობიექტები კი მრავლადაა გაჯერებული აღნიშნული ცხიმებით. ყურადსაღებია ის ფაქტიც, თუ რითი იკვებებიან საბავშვო ბაღებსა და სკოლებში. ამ და სხვა ფაქტორების გათვალისწინებით, გამომსვლელები მიიჩნევენ, რომ უპირველესად, აუცილებელია მომხმარებელთა ინფორმირება, შემოსაღებია ასევე სავალდებულო ეტიკეტირება. გაჩნდა მოსაზრება, რომ პირველი რიგის ამოცანას შესაბამისი ლაბორატორიის შექმნა წარმოადგენს, რათა შესაბამისი კვლევის შესაძლებლობა ჩვენსავე ქვეყანაში იყოს. ამასთან დაკავშირებით, სოფლის მეურნეობის სამინისტროს წარმომადგენელმა განაცხადა, რომ უახლოეს ხანში შესაბამისად აღჭურვილი ლაბორატორია მზად იქნება.
დასასრულს, აგრარულ საკითხთა კომიტეტის თავმჯდომარემ გიგლა აგულაშვილმა მადლობა გადაუხადა პროცესის ყველა მონაწილეს და აქვე აღნიშნა, რომ ეს საკითხი, გამოთქმული წინადადებების საფუძველზე, სცდება მხოლოდ აგრარულ საკითხთა კომიტეტის ფუნქციებს.
„პრობლემა რომ აქტუალურია და მწვავე, ამაში ყველა ვთანხმდებით. ამასთანავე, ეს საკითხი სცდება ჩვენი კომიტეტის ფუნქციას და ვფიქრობ, ამ საკითხის გადაწყვეტაში დარგობრივი ეკონომიკისა და ეკონომიკური პოლიტიკისა და ჯანმრთელობის დაცვისა და სოციალურ საკითხთა კომიტეტებთან ერთად უნდა შევიმუშაოთ რეკომენდაციები“, – განაცხადა გიგლა აგულაშვილმა. მისი აზრით, პირველი, რითაც აღნიშნული საკითხის მოგვარება უნდა დაიწყოს, არის მოსახლეობის ინფორმირება და ეტიკეტირების საკითხი, და მხოლოდ ამის შემდეგ შეიძლება სხვა რეგულაციებზე ფიქრი.
