გუშინ, პარლამენტის პლენარული სხდომის დაწყების წინ რეგისტრაცია პარლამენტის 70-მა წევრმა გაიარა, პროცედურის თანახმად 15 წუთის შემდეგ განმეორებითი რეგისტრაცია ჩატარდა და ამჯერად, რეგისტრაცია 67-მა დეპუტატმა გაიარა. საქართველოს პარლამენტის რეგლამენტის თანახმად, პარლამენტის პლენარული სხდომა უფლებამოსილია, თუ მას პარლამენტის სრული შემადგენლობის უმრავლესობა ესწრება, შესაბამისად, კვორუმის არარსებობის გამო პარლამენტის პლენარული სხდომა ვერ გაიმართა.
პარლამენტის თავმჯდომარემ, დავით უსუფაშვილმა კოლეგებს საქართველოს პარლამენტის რეგლამენტით დადგენილი პროცედურული ნორმები შეახსენა და განმარტა, რომ თუ მომდევნო 45 წუთის განმავლობაში ჩატარებული ხელახალი რეგისტრაციის შემთხვევაში სხდომათა დარბაზში პარლამენტის წევრთა კანონით დადგენილი რაოდენობა არ იქნებოდა, რეგისტრაცია, იმავე პროცედურით, საღამოს სხდომაზე ჩატარდება, ასევე, განსაკუთრებულ შემთხვევაში, სხდომის თავმჯდომარე უფლებამოსილია, მიიღოს სხვა გადაწყვეტილება.
„მინდა, გაცნობოთ ჩემი, სხდომის თავმჯდომარის, სხვა გადაწყვეტილება, რომელიც მდგომარეობს შემდეგში, რომ თუ ახლა რეგისტრაცია ვერ ან არ გაიარა პარლამენტის წევრთა საკმარისმა რაოდენობამ, საღამოს სხდომაზე რეგისტრაცია აღარ ჩატარდება, ანუ დღეს სხდომა აღარ ჩატარდება“,- განაცხადა დავით უსუფაშვილმა.
პარლამენტის თავმჯდომარემ დეპუტატებს საქართველოს პარლამენტის რეგლამენტის 133-ე მუხლის მე-9 პუნქტიც შეახსენა, რომლის თანახმად, პარლამენტის წევრს პლენარული სხდომა არასაპატიო მიზეზით გაცდენილად არ ჩაეთვლება, თუ უმრავლესობა, უმცირესობა, ფრაქცია, დამოუკიდებელი პარლამენტის წევრი პოლიტიკური შეხედულებების გამო უარს აცხადებს პლენარულ სხდომაზე საკითხების განხილვასა და გადაწყვეტაში მონაწილეობაზე. ამის თაობაზე წერილობითი განცხადება წარედგინება სხდომის თავმჯდომარეს ან კეთდება ზეპირი განცხადება რეგისტრაციის დასრულების შემდეგ.
პლენარულ სხდომას ესწრებოდნენ საპარლამენტო უმცირესობის წარმომადგენლები, რომლებმაც რეგისტრაციის პროცედურაში მონაწილეობა არ მიიღეს. პარლამენტის თავმჯდომარემ, უმცირესობის წარმომადგენელს აღნიშნული გადაწყვეტილების მიღების განმარტებისთვის ზეპირი განცხადების საშუალება მისცა.
განცხადება გააკეთა „ერთიანი ნაციონალური მოძრაობის“ წევრმა, ზურაბ ჯაფარიძემ, რომელმაც განმარტა, რომ უმცირესობის ეს გადაწყვეტილება თბილისის სპეცდანიშნულების რაზმის ყოფილი ხელმძღვანელის, კახა ნაკანის პატიმრობას უკავშირდება.
განცხადების შემდეგ, ხელახლა ჩატარებული რეგისტრაცია პარლამენტის 68 წევრმა გაიარა.
„დღეს ჩვენ შევიკრიბეთ ძალიან მნიშვნელოვანი საკითხების განსახილველად, მათ შორის, კანონპროექტების, რომლებიც შემოტანილია სხვადასხვა მხრიდან, სხვადასხვა პოლიტიკური სპექტრის მხრიდან, ძალიან მნიშვნელოვან თემებზე, რომლებზეც კოლეგები გვეუბნებოდნენ, რომ ძალიან მნიშვნელოვანია ამ საკითხებს განხილვა, მაგრამ მათ ასე გადაწყვიტეს. ეს მათი უფლებაა, პატივი ვცეთ ერთმანეთის უფლებებს“,- განაცხადა დავით უსუფაშვილმა.
