გასული კვირის პარასკევს, ოზურგეთის დემოკრატიული ჩართულობის ცენტრში, სახალხო დამცველი უჩა ნანუაშვილი და სახალხო დამცველის აპარატის წარმომადგენლები ადგილობრივ მოსახლეობას შეხვდნენ.
უჩა ნანუაშვილის თქმით, ყველა მუნიციპალიტეტში გაიმართება მსგავსი ტიპის შეხვედრები, რადგან ახლოდან გაეცნონ მოსახლეობის პრობლემებს.
შეხვედრაზე თავისი პრობლემის შესახებ ოზურგეთელმა მურთაზ აბაშიძემ ისაუბრა.
"ორი თვეა, თქვენთან მაქვს გამოგზავნილი წერილი, რომელზეც რეაგირება ამ დრომდე არ არის. მოვიგე ორი სასამართლო პროცესი და მჭირდება თქვენი მხარდაჭერა. ჩემთვის ყველა წუთს და წამს აქვს მნიშვნელობა" _ თქვა შეხვედრაზე მურთაზ აბაშიძემ.
აპარატის წარმომადგენლის თქმით, მურთაზ აბაშიძის განცხადება ნამდვილად მიღებულია, მიმდინარეობს შესწავლა და ის რეაგირების გარეშე არ დარჩება.
უჩა ნანუაშვილს, ასევე, დახმარების თხოვნით მიმართა ოზურგეთის მუნიციპალიტეტის, დაბა ნასაკირალის მცხოვრებმა ამირან შავაძემ.
_ ბატონო უჩა, ძალიან გთხოვთ, დაინტერესდით ჩემი პრობლემით. ნასაკირალის საჯარო სკოლაში განუკითხაობაა. მე და ჩემი ძმა ვიყავით სამეურვეო საბჭოს წევრები, მაგრამ შემდეგ მოხდა ისე, რომ ახლა არც ერთი არ ვართ. ორი წლის შემდეგ გაახსენდათ სკოლაში, რომ სამეურვეო საბჭოს წევრები ერთი ოჯახის წარმომადგენლები არ უნდა ყოფილიყვნენ. ეს მაშინ მოხდა, როდესაც სკოლის დირექტორის მიმართ, როგორც მშობლებს პრეტენზია გაგვიჩნდა. რა არ ხდებოდა ჩვენს სკოლაში _ გაკვეთილები ცდებოდა, სხვა სკოლიდან მოდიოდნენ ბავშვები და მიდიოდა საქმის გარჩევები. გაკვეთილის დროს მოსწავლეები ფანჯრის რაფებზე იყვნენ შემომსხდარნი. როდესაც ამის შესახებ განვაცხადე პედაგოგებთან, მითხრეს, შენი საქმე არ არისო. ასევე, უსამართლოდ ექცევიან ჩემს შვილებს სკოლაში, გადავწყვიტე, აღარ გამეშვა, სანამ სკოლის დირექტორი არ გადადგება. მართვის მოწმობა არ გააჩნიათ იმ მძღოლებს, რომლებსაც ბავშვები გადაჰყავთ სკოლაში. ამ ინფორმაციის გავრცელების შემდეგ, მცემეს, მაგრამ არავინ არ ინტერესდება ამ საქმით. სკოლის დირექტორი და სოფლის რწმუნებული ერთად არიან და საერთოდ არ ცნობენ სამართლიანობას. როდესაც, თქვენთან მოვდიოდი შეხვედრაზე, დამირეკეს და მითხრეს, თუ არ გაჩერდებით, სოფლიდან გაგაძევებთო. რა გავაკეთე ასეთი? ოთხი შვილი მყავს, კარგად სწავლობენ, მაგრამ ერთ-ერთ შვილს, რომელიც მეშვიდე კლასშია, ინგლისურის პედაგოგმა ნორმალური ნიშანი არ აღირსა, რადგან დირექტორი გადამტერებული მყავს, _ თქვა ამირან შავაძემ.
შეხვედრას ესწრებოდა ოზურგეთის საგანმანათლებლო რესურსცენტრის უფროსი ლელა იმედაშვილი. იმედაშვილის ინფორმაციით, ამირან შავაძემ რესურსცენტრს 2015 წლის 28 იანვარს მიმართა. განათლების სამინისტროს გენერალურმა ინსპექციამ დაიწყო დროულად მუშაობა და თებერვალში ამირან შავაძემ მიიღო პასუხი.
_ განათლების მინისტრმა, მოკვლეული მასალების საფუძველზე, მიიღო გადაწყვეტილება და სკოლამ მიიღო წერილობით შენიშვნა, რაც, მოგეხსენებათ, სკოლის შემდგომი აკრედიტაციისთვის ძალიან სერიოზული ხარვეზია.
რადგან სამინისტრომ არ გაათავისუფლა სკოლის დირექტორი, ამირან შავაძემ მეორედ შემოიტანა განცხადება. თავად შავაძე ამბობს, რომ სანამ სკოლის დირექტორი არ მოიხსენება, ბავშვებს არ მიიყვანს სკოლაში. გუშინ დასრულდა მოკვლევა და გაეგზავნება ამირან შავაძეს. ბატონი ამირანი საუბრობს, რომ ინგლისურის და დაწყებითი კლასის მასწავლებლის მხრიდან ირღვევა კანონი. გადაწყვეტილების მიმღები არის სამინისტრო და უახლოეს ხანში გახდება ყველაფერი ცნობილი. პარალელურად, ჩვენ მივმართეთ სოციალურ სააგენტოს, რადგან ბავშვების უფლებები ირღვეოდა. გუშინ (16 აპრილს, ავტ), სოციალურ სააგენტოში იმყოფებოდნენ სკოლის დირექტორი, ბავშვები და ბატონი ამირანი და მას მიეცა გარკვეული ვადა. მინდა გითხრათ, რომ, რადგან ბავშვებს არ უშვებს სკოლაში ბატონი ამირანი, ეს უკვე ბავშვის უფლებების დარღვევაა. გენერალური ინსპექციის მოკვლევის საფუძველზე შემიძლია გითხრათ, რომ ძალადობის ფაქტები არ დასტურდება, _ თქვა ლელა იმედაშვილმა.
შეხვედრაზე მოგვიანებით მოვიდა ოზურგეთის მუნიციპალიტეტის გამგებლის წარმომადგენელი დაბა ნასაკირალში ტარიელ ანთაძე.
_ არ არის სიმართლე, როდესაც ბატონი ამირანი საუბრობს, რომ ის სცემეს და საერთოდ, ვერ ვხვდები, მე რა შუაში ამ ამბავთან? _ თქვა ტარიელ ანთაძემ.
ოზურგეთელი მაია გეგეჭკორი კი სახალხო დამცველს უამბობს, რომ ოზურგეთში სამართალს ვერ მიაღწია.
_ ოზურგეთში ხუთი წელი არ ვიმყოფებოდით. სწორედ, ამ დროს შემოვიდა თურქული კომპანია და ჩვენს საკარმიდამო ნაკვეთზე ააშენეს შენობა. ყველა დოკუმენტი არსებობს, რომ მართალი ვარ. სად არ წავედი, ვის არ მივმართე, მაგრამ ყველგან პრობლემა არის, პროკურატურაში არის ჩემი საქმე, მაგრამ, ჯერჯერობით, არაფერია ცნობილი. ახლა სასამართლო პროცესი მიდის, რომელიც გავასაჩივრე და ველოდები უზენაესი სასამართლოს გადაწყვეტილებას. ერთხელ და სამუდამოდ ხომ უნდა გაირკვეს სიმართლე და ამ ქვეყანაში ზეიმობდეს სამართალი? ძალიან ვნერვიულობ. ირაკლი ღარიბაშვილსაც მივმართე, მთელმა ქვეყანამ იცის ჩემი ამბავი, მაგრამ სად არის სამართალი?! _ თქვა მაია გეგეჭკორმა.
უჩა ნანუაშვილის თქმით, ყველა იმ საქმით დაინტერესდება, რომელიც ოზურგეთში შეხვედრის დროს მოისმინა.
_ "ჩვენ გვაქვს სურვილი, გურიაში გვქონდეს ოფისი, რომელიც მთელ გურიას დაფარავს. გასულ წელს კახეთში გავხსენით ახალი ოფისი. სავარაუდოდ, მომავალ წელს შევძლებთ ოფისის გახსნას. მანამდე კი გვეყოლება საკონტაქტო პირი, რომელიც რეგულარულად მოგვაწვდის ინფორმაციას ადამიანის უფლებების დარღვევის შესახებ", _ თქვა ნანუაშვილმა.
შეხვედრის დასასრულ, "გურია ნიუსი" დაინტერესდა, გამოეხმაურა თუ არა სახელმწიფოს რომელიმე უწყება სახალხო დამცველის ანგარიშს, თუმცა, როგორც ნანუაშვილმა აღნიშნა, ამ ეტაპისთვის გამოხმაურება არ ყოფილა.
"სახალხო დამცველის 2014 წლის ანგარიში 900 გვერდზე მეტია და მოიცავს, თითქმის, ყველა სპექტრის ადამიანის უფლებებს. ჯერჯერობით, რაიმე სახის გამოხმაურება სამინისტროებისგან არ გვაქვს, ისევე, როგორც საქართველოს პარლამენტისგან. ჩვენი ინფორმაციით, ამ ეტაპზე მიმდინარეობს შესწავლა იმ კონკრეტული ინფორმაციების და რეკომენდაციების, რომელიც ასახულია ჩვენს საპარლამენტო ანგარიშში. იმედი მაქვს, ჩვენი ანგარიშის განხილვა მაისიდან დაიწყება. შესაბამისად, ჩვენ მზად ვართ, ყველა უწყებასთან გავიაროთ ის პრობლემები და იმ პრობლემებზე გვქონდეს საუბარი, რომელიც ანგარიში არის ასახული".
