სოფლის მეურნეობის სამინისტრომ ჟურნალისტებს კახეთის რეგიონში გახსნილი საწარმოები დაათვალიერებინა

სოფლის მეურნეობის სამინისტრომ, ახალი საწარმოების მოსანახულებლად, კახეთის რეგიონში 19-20 აპრილს მედიატური მოაწყო.

სამინისტროში ჟურნალისტებმა კახეთში დაფინანსებული 42 ახალი საწარმოდან, ლოტოტრონის პრინციპით, თავად შეარჩიეს მოსანახულებელი საწარმოები.

"საზოგადოებაში ძალიან დიდი მითქმა-მოთქმაა იმასთან დაკავშირებით, თუ სად არის დაპირებული ასი საწარმო. ჩვენ უკვე აგრარულ სექტორში დაფინანსებული გვაქვს 119 ბიზნესი და ვიწყებთ ჟურნალისტებისთვის მათ ჩვენებას. პირველი რეგიონი გახლავთ კახეთი, სადაც 36-ის ნაცვლად, უკვე 42 საწარმოს ნახვის საშუალება გვაქვს.  ლოტოტრონის პრინციპით შევარჩიეთ 8 საწარმო. ძალიან მნიშვნელოვანია, საზოგადობას მივაწოდოთ ობიექტური ინფორმაცია, თუ როგორი საწარმოები შეიქმნა სახელმწიფოს ხელშეწყობით", _  განაცხადა სოფლის მეურნეობის მინისტრმა ოთარ დანელიამ.

სამინისტროს ინფორმაციით, 119 საწარმოს დასაფინანსებლად განხორციელებული ინვესტიცია 100 მილიონ 800 ათას აშშ დოლარს, ხოლო ახალი სამუშაო ადგილების რაოდენობა, დაახლოებით, 3700 -ს შეადგენს. გაფართოვდა 600-ზე მეტი საწარმო და საერთო ჯამში შექმნილია 10 ათასამდე სამუშაო ადგილი.

რაც შეეხება კახეთის რეგიონს, დაფინანსებულ  42 ახალი საწარმოში, დასაქმებულია 1025 ადამიანი, განხორციელდა 39 700 000 აშშ დოლარის ინვესტიცია. დაფინანსებულია სოფლის მეურნეობის სხვადასხვა დარგი: 16 ღვინის წარმოება, 7 მესაქონლეობა, 7 სასაწყობო მეურნეობა, 3 მეფრინველეობა, 2 ცხვრის მოშენება, 2 ხილის გადამუშავება, 1 მეღორეობა, 1 ცხოველის საკვების წარმოება, 1 მუხის კასრების წარმოება და 1 სასათბურე მეურნეობა.

მედიატურის ფარგლებში ჟურნალისტებმა კახეთში, საგარეჯოს რაიონის სოფელ ნინოწმინდაში მდებარე შპს "ნინოწმინდა1" დაათვალიერეს. ფერმა თვეში 150 000 ცალ კვერცხს აწარმოებს, ხოლო რეალიზაცია ადგილობრივ ბაზარზე ხდება. ამჟამად საწარმოში 12 ადამიანია დასაქმებული, თუმცა როგორც "ნინოწმინდა1"-ის ხელმძღვანელი  მჭედლიშვილი გიორგი ამბობს, საწარმო ფართოვდება და, შესაბამისად, 20 ადამიანის დასაქმება იგეგმება.

"დაფინანსებაზე მაინც და მაინც დიდი პრობლემა არ გვქონია. მანამდე ფერმა გვქონდა, მაგრამ ვერ ვმუშაობდით, გვიჭირდა.  ვერც წიწილა შემოგვყავდა, ვერც ქათამი. მთავრობის მიერ შემოთავაზებული შეღავათიანი აგროკრედიტის ფარგლებში ავიღეთ 100 ათასი დოლარი. მერე წარმატებით რომ განვითარდა ბიზნესი,  კიდევ ავიღეთ 250 ათასი დოლარი, რის შედეგადაც თანამედროვე აპარატურა შემოვიტანეთ, ავაშენეთ საწყობი, გვაქვს წიწილის გამოსაყვანი გალიები. რეალიზაციას ძირითადად საქართველოში ვახდენთ. სესხი ერთპროცენტიანი განაკვეთით გვაქვს აღებული", _ გვითხრა გიორგი მჭედლიშვილმა.

ჟურნალისტები გურჯაანში შპს "ქართული ხილის" კომპანიაშიც იმყოფებოდნენ. ეს არის ხილის გადამამუშავებელი საწარმო, სადაც წლიურად 200 ტონა ხილის შენახვა არის შესაძლებელი. გადამამუშავებელ საწარმოში პირველად ელოდებიან ატმის სეზონს, რომელიც ივნისის შუა რიცხვებიდან დაიწყება და სექტემბრის დასაწყისამდე გრძელდება.

მედიატურის ფარგლებში, ჟურნალისტებმა ყვარელში შპს "შალოშვილის მარანი" და გურჯაანში, სოფელ ველისციხეში შპს "კახური ტრადიციული მეღვინეობა" მოინახულეს. შალოშვილის მარანი შეღავათიანი აგროკრედიტის პროექტის ფარგლებში მიღებული 200 000 აშშ დოლარის კრედიტით დაფინანსდა, რითაც ქარხანამ გადამამუშავებელი დანადგარები – ღვინის გამაციებელი დანადგარი, ცისტერნა, ღვინის ფილტრაციის სისტემა შეიძინა. ამჟამად ქარხანაში დასაქმებულია 12 ადამიანი, ხოლო სეზონზე დასაქმებულთა რაოდენობა 65-მდე იზრდება. წელიწადში 100-120 ტონა ღვინის წარმოება და რუსეთში ექსპორტი იგეგმება. რაც შეეხება შპს "კახურ ტრადიციულ მეღვინეობას", შეღავათიანი აგროკრედიტის პროექტის ფარგლებში აღებული 600 000 აშშ დოლარის დახმარებით აშენდა ღვინის საწარმო, რომელიც წელიწადში 4500 ტონა ღვინოს აწარმოებს. საწარმოში 40 ადამიანია დასაქმებული. პროდუქცია ექსპორტზე 15 ქვეყანაში გადის.

"კახური ტრადიციული მეღვინეობა"  ცისტერნების გარდა ღვინოს ასევე ფრანგული მუხისგან დამზადებულ კასრებში აყენებს, რომელიც საქართველოშივე იწარმოება.

როგორც სააქციო საზოგადოება "პროფესიონალური მეღვინეების პროდუქტების“ წარმომადგენელმა ვასილ კალანდაძემ ჟურნალისტებთან საუბარში აღნიშნა, კასრების საწარმოც სახელმწიფოს მიერ გამოყოფილი შეღავათიანი აგროკრედიტის საშუალებით გააკეთა. ის აწვდის სწორედ "კახურ ტრადიციულ მეღვინეობას" კასრებს.

"ჩვენ კასრების ერთადერთი საწარმო გვაქვს კავკასიაში. 850 ათასის ინვესტიცია განხორციელდა ამისთვის. გვაქვს სპეციფიკური დანადგარები,  ესპანეთიდან ჩამოტანილი, რომელიც კასრის წარმოებას უნდა მოხმარდეს. ყაზახებთან გვაქვს მოლაპარაკება, იმპორტზე გასვლასაც ვაპირებთ. როგორც კი მოთხოვნა გაიზრდება, მუშახელსაც დავამატებთ. მასალა გვაქვს ფრანგულ-ამერიკული.  ჯერ-ჯერობით, საქართველოში ვუკეთებთ რეალიზაციას.  დასაქმებული გვყავს 15 ადამიანი. თვეში 120-დან 150 კასრამდე ვაწარმოებთ. შეკვეთებს არ ველოდებით, სულ ვამზადებთ“, უთხრა ჟურნალისტებს ვასილ კალანდაძემ.

როგორც სოფლის მეურნეობის მინისტრმა  აღნიშნა, სახელმწიფოს ხელშეწყობით დაფინანსებული საწარმოების დათვალიერება მედიატურის ფარგლებში სხვა რეგიონებშიც გაგრძელდება.