ლანჩხუთის მუნიციპალიტეტის საკრებულოს საფინანსო-საბიუჯეტო კომისიამ, ალეკო სარიშვილის ხელმძღვანელობით, გასვლითი სხდომა ცენტრალური ბიბლიოთეკის დარბაზში გამართა, რომელსაც „post-ალიონისა“ და გაზეთ „გურია ნიუსის“ ერთობლივი პროექტის – „აირჩიე დემოკრატია“ ფარგლებში სკოლის მოსწავლეებიც ესწრებოდნენ. დარბაზში, განსახილველი საკითხებით დაინტერესებული სხვა მოქალაქეებიც იყვნენ.
ტრანსპორტის რეგულირების წესზე საკითხი „საგარეო ეკონომიკური ურთიერთობების, ინვესტიციების, ტურიზმის, ტრანსპორტისა და მეწარმეობის განვითარების ცენტრის“ უფროსმა გელა ზოიძემ გამოიტანა. კომისიის წევრები ერთსულოვანნი იყვნენ, რომ საკითხი მართლაც მტკივნეულია და აუცილებლად მოსაგვარებელი, ამიტომაც მას ერთხმად დაუჭირეს მხარი. დეპუტატთა განწყობა იგივე იყო გარევაჭრობის რეგულირების წესის განხილვისას.
როცა გამგეობის საფინანსო-საბიუჯეტო და მუნიციპალური შესყიდვების სამსახურის უფროსმა, როლანდ ლაშხიამ, 2014 წლის ბიუჯეტის ანგარიშის შესახებ ისაუბრა, კომისიის წევრთა ერთსულოვნებაც გაქრა.
ლაშხიას მოხსენებიდან, რომელიც ციფრებს უხვად მოიცავდა გაირკვა, რომ ბიუჯეტი 100% -ით ვერ შესრულდა, მაშინ, როცა საკრებულოსა და გამგეობას ნაშთის სახით საერთო ჯამში 264 ათასი ლარი დარჩა. მათ შორის გამგეობის სოციალურ სამსახურს აუთვისებელი 47 ათასი ლარი დარჩა, არადა, აღნიშნულ სამსახურში შემოსული 2000 განცხადებიდან მხოლოდ 500 დაკმაყოფილდა.
„ყველაფერი ეს არის არასწორი მენეჯმენტის ბრალი. სოციალური სამსახურის უფროსის უნიათობის შედეგია, რომ სამსახურმა სრულად ვერ აითვისა თანხა. ნაშთის სახით საკრებულოსა და გამგეობასაც დარჩა თანხები, არადა, ბიუჯეტი ვერ შესრულდა. ამაზე პასუხისმგებლობა პირდაპირ გამგებელს უნდა დაეკისროს. გახსოვთ, ალბათ, გამგეობის ერთ-ერთ სამსახურში ახალი საშტატო განრიგი დავამტკიცეთ, თუმცა, რატომღაც გამგებელმა ბრძანება არ დაწერა და ხელფასები ძველი საშტატო განრიგით იწერებოდა. ეს კრიმინალია, რაზეც პასუხი პირდაპირ გამგებელმა უნდა აგოს.
მაისში გაფორმდა ხელშეკრულება ტენდერში გამარჯვებულ ფირმასთან, ხუთი თვე არაფერი გაკეთებულა, მხოლოდ ხუთ ოქტომბერს გაუწყვიტეს ხელშეკრულება. ყველანი საარჩევნო რეჟიმში იყვნენ გადართულები, არავის ეცალა საქმის კეთებისთვის. აქ პირდაპირ უნდა დადგეს ინფრასტრუქტურისა და ზედამხედველობის სამსახურების პასუხისმგებლობის საკითხი“, -განაცხადა კომისიის წევრმა გია გოგუაძემ.
გოგუაძის არგუმენტები გარკვეულწილად გასათვალისწინებელი აღმოჩნდა კომისიის წევრებისთვის, რაც აისახა კიდეც საკითხის კენჭისყრისას. ანგარიშს ხელი ერთადერთმა, თავად კომისიის თავმჯდომარემ, ალექსანდრე სარიშვილმა აუწია, ოთხმა კი დაიწუნა, მათ შორის უმრავლესობის წევრმაც. სამმა კომისიის წევრმა თავი შეიკავა, საკრებულოს სხდომამდე საკითხში უკეთ გარკვევის არგუმენტით, თუმცა, რეგლამენტით თავის შეკავება იგივე უარის თქმის ტოლფასია. ამ პროცედურამ ცხადყო, რომ 30 აპრილის საკრებულოს სხდომაზე მთავარი საბიუჯეტო კომისიის წევრთა პოზიცია, განგაშის საფუძველს უქმნის გამგეობას ანგარიშის უარყოფითი დასკვნის დადების კუთხით.
სხვადასხვა საკითხებზე მსჯელობისას კომისიის წევრი, შუხუთის მაჟორიტარი დეპუტატი აკაკი იმნაიშვილი დაინტერესდა, რატომ აქვს „ვეტო დადებული“ შუხუთს.
„გამგებელი დამპირდა ინფრასტრუქტურიდან 25 ათას ლარს დაგვიმატებდა, თუმცა, დღემდე არაფერი ჩანს. სტიქიაზეც მხოლოდ 12 ათასი გამოგვიყვეს. შუხუთი დანგრევის პირასაა, ინგრევა სკოლა, საბავშვო ბაღი, არაერთხელ მივმართე სათანადო ინსტანციებს დახმარებისთვის, თუმცა, შედეგი ნულია. მრჩება შთაბეჭდილება და ჩემი თანასოფლელებიც ამას მეუბნებიან, ყველაფერი ეს იმიტომ ხდება, რომ სოფელმა მე ამირჩია.
გამგებელმა ისიც მითხრა, მუნიციპალური განვითარების ფონდიდანაც მივიღებდით თანხებსო, თუმცა, წავიდა გუბერნატორი და წაყვა თანხაც“, – განაცხადა იმნაიშვილმა.
