უმრავლესობის სხდომაზე პრემიერ-მინისტრმა, ირაკლი ღარიბაშვილმა განახლებული სამთავრობო პროგრამა "ძლიერი, დემოკრატიული, ერთიანი საქართველოსთვის" წარუდგინა დეპუტატებს. ღარიბაშვილის თქმით, პროგრამაში დეტალურადაა ასახული საქართველოს დემოკრატიული განვითარების სტრატეგია და გეგმები.
"მთავრობის პრიორიტეტი არის უცვლელი – ეს არის ძლიერი, ეფექტიანი და დემოკრატიული ინსტიტუტების მშენებლობა. ამ რეფორმებს ჩვენ ერთობლივი ძალისხმევით წარმატებით განვახორციელებთ“, – მიმართა პრემიერ-მინისტრმა უმრავლესობის წევრებს.
უმრავლესობის ლიდერმა, დავით საგანელიძემ უმცირესობის სხდომის მსვლელობა შეაფასა.
"დღეს კიდევ ერთხელ დარწმუნდებოდით, რა პირობებში და რა სიტუაციაში უწევთ უმრავლესობის წევრებს მუშაობა. ჩვენ, ალბათ, მართლა ტაში გვეკუთვნის იმიტომ, რომ 3 წელია ვისმენთ იმ დემაგოგიას, სიცრუეს და ტყუილს, რასაც თქვენ ისმენდით და რასაც ადგილი აქვს ამ დარბაზში“ – განაცხადა საგანელიძემ.
ამასთან, საპარლამენტო უმრავლესობის ლიდერმა სთხოვა მინისტრებს, შესაბამისი მიმართულებით გააკეთონ ანალიზი იმის თაობაზე, თუ რა გაკეთდა "ნაციონალური მოძრაობის“ ხელისუფლებაში ყოფნის პერიოდში და აღნიშნული ინფორმაცია უმცირესობის წევრებს მიაწოდონ.
"შესაძლებელია თუ არა, თითოეულმა სამინისტრომ გააკეთოს ანალიზი იმასთან დაკავშირებით, თუ რა გაკეთდა გასულ წლებში და რა კეთდება ახლა – მოგეხსენებათ, ყველაფერი ფარდობითია. თუნდაც, როცა საუბარია ნეპოტიზმზე – საინტერესოა, ვინ მუშაობდა სამინისტროებში წლების განმავლობაში, რამდენი იყო პრემიები, სამივლინებო ხარჯები და ა.შ. იმის გამო, რომ თქვენ არ კადრულობთ ამის გაკეთებას, არ გვაქვს ინფორმაცია, რომ ხშირად უტიფრობას სიმართლე დავუპირისპიროთ. ეს თითოეულ ჩვენგანს წაადგება იმ მუშაობაში, რასაც 3 წელია აქ ვიტანთ“, – აღნიშნა უმრავლესობის ლიდერმა.
პარლამენტის თავმჯდომარის მოადგილემ, გუბაზ სანიკიძემ ხელნაწერთა ეროვნულ ცენტრთან დაკავშირებით აღნიშნა, რომ საკითხი ძალიან სენსიტიურია და მასზე გადაწყვეტილება ცენტრის თანამშრომლების მოსაზრებების გათვალისწინებით უნდა იყოს მიღებული. მისივე თქმით, საქმეში უნდა ჩაერთოს პარლამენტიც.
"ხელნაწერთა ეროვნული ცენტრი არ ეკუთვნის ერთ რომელიმე მინისტრს, არც პარლამენტს, არც მთავრობას, ის ეკუთვნის ქართველ ხალხს. იქ მუშაობს ძალიან დამსახურებული ხალხი, რომლებიც ათწლეულების განმავლობაში იცავენ ჩვენს ეროვნულ სიამაყეს. მათ აქვთ საკმაოდ დაბალი ხელფასი და ძალიან დიდი ფასის ექსპონატებთან აქვთ ურთიერთობა. ისინი არიან ჩვენი ეროვნული გმირები. ძალიან დიდი კოლექტივია, რომელიც არის ჩვენი ერის საუკეთესო ნაწილი“, – განაცხადა გუბაზ სანიკიძემ.
სანიკიძის განცხადებას პრემიერ-მინისტრმა უპასუხა. მისი თქმით, ხელნაწერთა ეროვნული ცენტრისთვის წელს ახალი შენობის მშენებლობა დაიწყება. შენობა აშენდება მცხეთაში ან თბილისში. მან განათლების მინისტრს მიმართა, ხელნაწერთა ეროვნულ ცენტრთან დაკავშირებულ პროცესში პარლამენტის წევრები ჩართოს და საქმე მაქსიმალურად გამჭვირვალე გახადოს.
"ეს ისტორიული მოვლენა იქნება, რადგან საქმე არ ეხება ერთი კონკრეტული სამინისტროს კუთვნილებას. ეს არის ჩვენი ეროვნული საგანძური, რომელსაც სათანადო ყურადღების მიქცევა სჭირდება. წელს ვაპირებთ დავიწყოთ ახალი შენობის მშენებლობა.
საქართველოს ექნება შესაბამისი დონის ხელნაწერთა ეროვნული ცენტრის შენობა. ეს შეიძლება იყოს მცხეთაში ან თბილისში“, – განაცხადა ირაკლი ღარიბაშვილმა.
მინისტრებმა უმრავლესობის წევრების მიერ შესაბამისი დარგების მიხედვით დასმულ კითხვებს უპასუხეს. განათლებისა და მეცნიერების მინისტრის, თამარ სანიკიძის განცხადებით, პროფესიული განათლების თვალსაზრისით, ქვეყანაში მნიშვნელოვანი წინსვლაა. აღნიშნულ საკითხთან დაკავშირებით, მინისტრს ინფორმაციის მიწოდება დეპუტატმა, ზაქარია ქუცნაშვილმა სთხოვა. სანიკიძის თქმით, ამ მიმართულებით კანონპროექტი პარლამენტში განსახილველად უკვე შემოტანილია.
"კანონპროექტის მიღებით, გადავდივართ სწავლების სრულიად ახალ მეთოდებზე, რომლზეც ინტენსიურად ვიუმუშავეთ ევროკავშირთან და ევროსაბჭოსთან ერთად.
ეს არის მოდულარული პროგრამების დანერგვა ახალი სტანდარტებით. გადახალისდა სტანდარტებიც და პროგრამებიც. ამით შესაბამისობაში მოვდივართ იმ მოთხოვნებთან, რომელიც დაგვისახა ევროკავშირმა“, _ განაცხადა თამარ სანიკიძემ.
მინისტრი ქუთაისში ტექნოლოგიური უნივერსიტეტის გახსნის საკითხს გამოეხმაურა.
"ერთი უნივერსიტეტის თემა, ვფიქრობ, სხვადასხვა ჭრილში არის განსახილველი იმიტომ, რომ ტექნოლოგიური უნივერსიტეტი სხვადასხვა დროს სხვადასხვა ჭრილში განიხილებოდა. აუცილებლად უნდა ვიცოდეთ, რომ ის ტექნოლოგიური უნივერსიტეტი, რომელიც თავიდან იყო დანაპირები და უნდა გახსნილიყო მილენიუმის კორპორაციის ფარგლებში, გაიხსნა და ფუნქციონირებს სამ უმაღლეს დაწესებულებაში: თბილისში ეს არის ტექნიკური უნივერსიტეტი, ჯავახიშვილის უნივერსიტეტი და ილიაუნი. წელს უკვე პირველი მიღება გვექნება. სან დიეგო იწყებს პროგრამების განხორციელებას“,- განაცხადა თამარ სანიკიძემ.
როგორც მინისტრმა აღნიშნა, წელს, პირველად საქართველოში იწყება სკოლამდელი საგანმანათლებლო პროგრამების ამოქმედება.
"ერთი წლის წინ ჩვენ მივიღეთ ახალი კანონი, სადაც სკოლაში შესვლის ასაკად დავასახელეთ 6 წელი. ამისათვის საჭირო იყო წინასასკოლო მზაობის პროგრამების მომზადება და დანერგვა, პროგრამები მომზადდა UNICEF-თან ერთად. მას გავლილი აქვს აპრობაცია სხვადასხვა საგანმანათლებლო დაწესებულებებში“,– განაცხადა თამარ სანიკიძემ. მისი თქმით, იმ ბავშვებს, რომლებსაც ასაკის გამო არ უწევთ სკოლაში შესვლა, განათლებისა და მეცნიერების სამინისტრო შესთავაზებს სრულიად ახალ, ხარისხიან პროგრამებს.
შრომის, ჯანმრთელობისა და სოციალური დაცვის მინისტრმა, დავით სერგეენკომ შეზღუდული შესაძლებლობების მქონე პირთა მიმართ განხორციელებული ღონისძიებების თაობაზე უპასუხა პარლამენტის წევრის, გიორგი ვოლსკის კითხვას. მისი თქმით, 2013 წელს შეზღუდული შესაძლებლობის მქონე პირთა საკითხების მართვა განხორციელდა უშუალოდ პრემიერ-მინისტრის ხელმძღვანელობით. კერძოდ, მთავრობის ადმინისტრაციაში შეიქმნა სპეციალური საბჭო.
"საბჭოს მიერ დამტკიცებულ იქნა დოკუმენტი, რომელიც მოიცავს სტრატეგიულ განვითარებას შეზღუდული შესაძლებლობის მქონე პირებთან მიმართებაში“, – აღნიშნა დავით სერგეენკომ. მისი თქმით, დოკუმენტი მიზნად ისახავს თანაბარი პირობების შექმნას ამ ადამიანებისათვის.
თავდაცვის მინისტრის, თინათინ ხიდაშელის ინფორმაციით, 7 ივნისს თავდაცვის სამინისტრო გეგმავს თბილისში, მიცკევიჩის ქუჩიდან თავისუფლების მოედნამდე ღონისძიებას.
"ეს იქნება სპორტული ღონისძიება, რომელიც სწორედ შშმ პირებისთვის არის დაგეგმილი და ყველას მინდა გთხოვოთ, რომ შემოგვიერთდეთ“, – მიმართა თინა ხიდაშელმა დეპუტატებს და საზოგადოებას.
ეკონომიკისა და მდგრადი განვითარების მინისტრმა, გიორგი კვირიკაშვილმა, დეპოზიტების ლარში დაზღვევასთან დაკავშირებულ კითხვას უპასუხა.
"ეს საინტერესო ინიციატივაა, ჩვენ ვმუშაობთ საერთაშორისო საფინანსო ინსტიტუტებთან ამ პროექტზე, ფინანსთა სამინისტროსთან ერთად დ ამზად ვართ, რომ განვიხილოთ ეს ინიციატივა“-, განაცხადა გიორგი კვირიკაშვილმა.
მან დეპუტატებს ინდუსტრიული განვითარების საკითხებზე მიაწოდა ინფორმაცია. მისი თქმით, საქართველოს ეკონომიკისა და მდგრადი განვითარების სამინისტროში, სტრუქტურული დივერსიფიკაციის ხელშეწყობის მიზნით, მუშაობა მიმდინარეობს ინდუსტრიული განვითარების საკითხებზე.
პრემიერ-მინისტრმა, ირაკლი ღარიბაშვილმა იმ სტრატეგიულად მნიშვნელოვანი პროექტების შესახებ ისაუბრა, რომლის განხორციელებაც განახლებული სამთავრობო პროგრამითაა გათვალისწინებული.
სხდომის დასასრულს, ღარიბაშვილმა განაცხადა, რომ მოქმედმა ხელისუფლებამ არ უნდა გაიმეოროს იგივე შეცდომები, რაც წინა ხელისუფლებამ დაუშვა, მაგრამ, მეორე მხრივ, საჭიროა შედარების გაკეთება და მოსახლეობის მეტი ინფორმირებულობა.
